Lucas 8

27 Ayesu pabhakatuluka mu ntumbwi nkolongwa na bhakakongana na mundu jumo jwa chenichela chilambo bhabhi bhapoganikwe na mahoka bhakahikila Ayesu. Nabhena amundu lichobha litandamaho bhakibha ngawala ngobho na wala kutama mu nyuumba, ila ku makabuli. 28 Pabhaakabhona Ayesu bhakachigwiha pahi ja pamakongono ga Ayesu bhakapota nyenye, na bhakalobhola kwa lilobhe likolongwa, "Ayesu mwana jwa Annoongo jwabhile nnani muno mpala kundenda chiniki? Ndenda kunnyopa nkoto kunagia!" 29 Kwa kubhehe Ayesu bhakaakulumikia lyenilyela lihoka lyabhoke bhenibhala amundu. Mala jijingi bhandu bhatendita kwaatabhila jono mundu kwa mandondolo mmakongono na ngamulo mmabhoko na kwaabheka pahi ja kwaalolekea. Nambo bhatendita kujitema gena mandondolo na ngamulo na kupelekwa na jono lihoka kululemba.

30 Bahi, Ayesu bhakaakonya, "Lihina linu nga aganiki?"

Bhena amundu bhakajangula, "Twenga nga lilubhalo lya manyemba elupu sita." Bhakajangula henela ligongo bhakibha na mahoka gajingi. 31 Genigala mahoka gatendita kwaapembelea Ayesu kwa chibhujila bhujila ili gakotokwaapelekanga mu lihembo litandamaho. 32 Penapo genigala mahoka gakaapembelea Ayesu gajende gakaajingile genigala magolobhe, na Ayesu gakaajeketela gatende handa chiipalikwa. 33 Mahoka hago gakaabhoka bhenibhala amundu, na kwaajingila genigala magolobhe, na libhoga lyoha likapolomondoka pa chiyelelo kwa chindema na kutibhila mu lilibha, na gakawee goha. 34 Bhenibhala bhabhakibha bhakuliya lyenilyela lilubhalo lya magolobhe pabhakalola gagabhokile, bhakabhutukanga, bhakajaulanga kutangachanga ngani hejo mu hijiji na mu hilambo. 35 Bhandu bhakabhoka kujaula kuchibhonela chichibhokile. Pabhakahika penapo pabhakibha Ayesu bhakaakolela bhenibhala amundu bhabhokilwe na mahoka bhatamite kubhandikila na Ayesu, bhakibha bhawalite ngobho yabhe kongo bhabhi malango gabhe gatekwaabhujila, bhenibhala bhandu bhakajogopanga muno.