1 Oo ye susuma, mo je Tsaatsɛ Mawu yi. Oo Neneene Tsɛ, ye Mawu, o kle agbo. Bumi kɛ agbo jemi bɔle o he. 2 O ngɔ la kɛ ha o he kaa a buɔ bo. O ha kɛ kpe hiɔwe tsuo kaa tsu nya bo. 3 O ha nɛ zugba a hɛ mi wo muɔ voo nɛ e pee wo. Bɔ kuu ɔmɛ ji o trɔkehi. Nɛ o hii kɔɔhiɔ pɛli ɔmɛ a nɔ. 4 O pee o bɔfo ɔmɛ mumihi; nɛ la nɛ ngɛ tsoe ji o sɔmɔli.

5 O fia je ɔ ngɔ ma e sisi tomi ɔmɛ a nɔ bɔ nɛ e be hosoe ligbi ko. 6 O ha nyu ɔmɛ ha zugba a nɔ nɛ yoku ɔmɛ a yi laa. 7 O wo gbi, nɛ ngɛ o ngmlaa a nya a, nyu ɔmɛ bua a he nya nɛ e pee wo gbajaa. 8 A kuɔ yoku ɔmɛ nɛ a kple dɔ ɔmɛ a mi kɛ ya da he nɛ o to ha mɛ ɔ. 9 O to huzu ha wo ɔmɛ bɔ nɛ pee nɛ a ko ha zugba a nɔ hu.

10 O to nyuhi nɛ jiɔ kɛ jee zu mi ɔ ngɛ dɔhi a mi, kɛ pahi nɛ bee ɔ ngɛ yokuhi a kpɛti. 11 A haa nga mi lohwehi tsuo nyu nɛ a nuu, nɛ a gbee nga mi tejihi a kuma. 12 Lohwe pɛlitsɛhi maa tsu ngɛ a kasa mi, nɛ a laa ngɛ tso kɔnihi a nɔ. 13 O haa nɛ nyu nɛɛ kɛ pueɔ yoku ɔmɛ a nɔ nɛ tso yiblii woɔ ngɛ zugba a nɔ. 14 O ha nɛ nga puɛɛ kɛ ha nahi, kɛ tsohi hu nɛ nimli ma du, bɔ nɛ pee nɛ a na nya ngma kɛ je zu ɔ mi. 15 Nɛ e na wai kɛ wo e tsui bua, kɛ nu nɛ ma ha e he womi ma kpɛ, kɛ abolo nɛ maa wo lɛ he wami. 16 Tsaatsɛ Mawu ji nɔ nɛ du Lebanon sida tso ɔmɛ. A wa nɛ a ka gagaaga. 17 A mi nɛ lohwe pɛlitsɛhi maa tsu ngɛ, nɛ aklawahi hu peeɔ tsu ngɛ tso gaga amɛ a nɔ. 18 Nga mi apletsihi hii yoku gaga amɛ a nɔ, nɛ kahi laa ngɛ tɛ sahi a mi.

19 O bɔ hlami nɛ e tsɔɔ be ngɛ jeha a mi, kɛ pu hu nɛ e tsɔɔ ligbi. 20 O bɔ diblii nɛ ke e wo pɛ je jɔ, kɛkɛ nga mi lohwehi je kpo. 21 Jata bihi keɔ kɛ hlaa lohwe nɛ a nu; a hlaa a niye ni ke jee mo Tsaatsɛ Mawu o dɛ mi. 22 Makɛ mi pɛ a sɛ hue kɛ ya laa ngɛ muɔhi a mi. 23 Kɛkɛ adesahi hu ho ni tsumi ya kɛ ya si gbɔkuɛ mi. 24 Oo Tsaatsɛ Mawu, o nibɔ ni ɔmɛ ngɛ munomuno. Nile nɛ o kɛ pee kulaa. Zugba a nɔ hyi tɔ kɛ o nibɔ ni ɔmɛ.

25 Wo hu ji lɔ ɔ nɛ, e yi bli nɛ e mi hyi tɔ kɛ nibɔ ni slɔɔtohi nɛ ngɛ hɛ ngmle, ni nguahi kɛ ni tsɔwi tsuo. 26 E nɔ nɛ lɛhi nyɛɛɔ, nɛ e mi nɛ boso nɛ o bɔ ɔ jeɔ e hɛ ja ngɛ. 27 Nɛ ní nɛ ɔmɛ tsuo hyɛɔ mo blɔ nɛ o ha mɛ a niye ni ngɛ be nɔ. 28 O haa mɛ nɛ a buaa nya. O paa o dɛ mi nɛ a tɔɔ kɛ ni kpakpahi.

29 Ke o wo o hɛ mi ngɔ laa pɛ kɛkɛ a hao. Nɛ ke o ngɔ a mumi ɔmɛ ngɛ a dɛ ɔ, a yi taa nɛ a kpaleɔ kɛ hoɔ zu mi ya.

30 Ke o wo mumi pue a nɔ pɛ a plɛ nibɔ nihi, kɛkɛ zugba a hɛ mi pee ehe. 31 Neneene Tsɛ ɔ anunyami maa hi si daa. Tsaatsɛ Mawu bua maa jɔ e nibɔ ni ɔmɛ a he. 32 Ke e hyɛ zugba a pɛ kɛkɛ zugba a huanya; nɛ ke e ta yoku ɔmɛ a he pɛ a bɔni la su ku jemi!

33 I ma la ha Tsaatsɛ Mawu be abɔ nɛ i ngɛ je mi ɔ. I ma la kɛ je Neneene Tsɛ ɔ yi be abɔ nɛ i ngɛ wami mi ɔ. 34 I na nɛ ye yi mi susumi nɛ ɔmɛ sa e hɛ mi, ejakaa Tsaatsɛ Mawu pɛ ji nɔ nɛ haa mi bua jɔmi. 35 Ha nɛ yayami peeli a hɛ mi nɛ kpata ngɛ zugba a nɔ, nɛ dikali a ko hi si hu. Oo ye susuma, mo je Tsaatsɛ Mawu yi. Nyɛ je Neneene Tsɛ ɔ yi.