1 Nyɛ je Tsaatsɛ Mawu yi! Oo, nyɛɛ na Neneene Tsɛ ɔ si, ejakaa e hi, nɛ e mɔbɔ nami ngɛ daa. 2 Mɛnɔ ma nyɛ maa jaje Neneene Tsɛ ɔ ni tsumi ngua amɛ ngɔ tsɔɔ, aloo e ma nyɛ je e yi bɔ nɛ sa?

3 A gbaa nihi nɛ yeɔ dami sane nɛ a peeɔ nɔ́ nɛ da be tsuaa be.

4 Oo Tsaatsɛ Mawu, mo kai mi, nɛ o na ami hu mɔbɔ kaa bɔ nɛ o naa o nimli ɔmɛ mɔbɔ ɔ; mo he ye yi wami. 5 Mo ha nɛ ami hu ma na o nimli ɔmɛ nɛ o hla a a nɔ́ nami ɔ eko; nɛ ma na a bua jɔmi ɔ eko, nɛ ami hu ye nine nɛ su anunyami nɛ o kɛ ha mɛ ɔ nɔ.

6 Wɔ kɛ wa tsɛ ɔmɛ tsuo pee yayami; wa pee nɔ́ nɛ dɛ, kɛ yi mi wami níhi. 7 Wa tsɛ ɔmɛ nui o nyakpɛ níhi nɛ o tsu ha mɛ ngɛ Mizraim ɔ sisi; nɛ a kai we o suɔmi babauu ɔ, se mohu a tsɔ o hɛ mi atuã ngɛ Wo Tsutsu ɔ nya. 8 Se enɛ ɔmɛ kulaa se ɔ, o he a yi wami ngɛ o biɛ ɔ he je, bɔ nɛ pee nɛ o je o he wami ɔ kpo kɛ tsɔɔ je ɔ. 9 O nga Wo Tsutsu ɔ yi nɛ e mi gba nɛ e pee zugba gbigbli, nɛ o nyɛɛ a hɛ mi kɛ gu mi kaa nga nɔ. 10 Nɛ o kpɔ mɛ kɛ je a he nyɛli ɔmɛ a dɛ mi, kɛ a he wami sisi. 11 Kɛkɛ nɛ nyu ɔ kpale se kɛ ba ha he nyɛli ɔmɛ a nɔ nɛ a hɛ mi kpata; nɛ a ti nɔ kake hu piɛ.

12 Nɛ jehanɛ ɔ lɛɛ e nimli ɔmɛ he lɛ ye nɛ a la kɛ je e yi.

13 Se be bɔɔ se pɛ nɛ a hɛ je e ni tsumi ɔmɛ a nɔ ekohu, nɛ a mlɛ́ lɛ nɛ e wo mɛ ga. 14 A di niye ni ngɔngɔɛ se wawɛɛ ngɛ nga a nɔ nɛ a ka Tsaatsɛ Mawu. 15 E ha mɛ nɔ́ nɛ a bi lɛ ɔ, se e ha nɛ a ta he lo. 16 Nɛ a nyɛ Mose, kɛ Aaron hu nɛ ji Mawu nɔmlɔ ɔ. 17 Kɛkɛ nɛ zugba gba nɛ e mi Datan kɛ Abiram kɛ e we bi ɔmɛ. 18 Nɛ la hu je hiɔwe ba sa dikali nɛ piɛ ɔmɛ tsuo. 19 A ngɔ sika kɛ pee na bi amaga ngɛ Horeb nɛ a ja lɛ. 20 A ngɔ Mawu anunyami ɔ kɛ ha na nɛ kpeɔ nga. 21 A hɛ je a yi wami helɔ Mawu ɔ nɔ, nɔ nɛ tsu ni nguahi ngɛ Mizraim ɔ. 22 Nɔ nɛ tsu nyakpɛ nihi ngɛ Ham zugba a nɔ kɛ gbeye níhi hu ngɛ Wo Tsutsu ɔ mi ɔ. 23 Lɔ ɔ he je ɔ, Tsaatsɛ Mawu de ke e ma kpata a hɛ mi. Se Mose, Nɔmlɔ nɛ e hla a, da mi kɛ ha mɛ ngɛ Mawu hɛ mi, nɛ e kpa lɛ pɛɛ kaa e ngmɛɛ e mi mi fumi ɔ he nɛ e ko kpata a hɛ mi.

24 Jehanɛ ɔ, a kua Siwomi Zugba a nɔ yami, ejakaa a he we e munyu ɔ yi kaa e maa hyɛ a nɔ ɔ. 25 Se mohu a huhuɛ̃ ngɛ a bo tsu ɔmɛ a mi, nɛ a bui Neneene Tsɛ ɔ gbi tue. 26 Lɔ ɔ he je ɔ, e ka kita kaa e ma kpata a hɛ mi ngɛ nga a nɔ. 27 Nɛ e ma ha nɛ a bimɛ ma da; e maa gbɛ mɛ kɛ fia zugba kpahi a nɔ. 28 Nɛ a wo a he kɛ ya piɛ Baal amaga jali ngɛ Peor ɔ a he, nɛ a yeɔ wɔ nya niye ni. 29 A ni peemi ni nɛ ɔmɛ wo Tsaatsɛ Mawu mi mi la nɛ hiɔ ba sɛ a kpɛti nɛ e gbe mɛ kaa aja gbee kungwɔ. 30 Gbenɔ nɛ ɔ ngɛ nɔ yae kɛ ya si Pinehas te si nɛ e da mi kɛ ha mɛ. 31 Enɛ ɔ ha nɛ a bu lɛ dalɔ kɛ yaa yi nɔhi kulaa.

32 A wo e muklii mi la ngɛ Meriba hu nɛ a ha nɛ Mose na amane. 33 Ejakaa a ha nɛ e tsui hua nɛ e tu munyu yaya. 34 A ya bui Tsaatsɛ Mawu gbi tue, kaa a kpata nimli ɔmɛ a hɛ mi ngɛ zugba a nɔ ɔ. 35 Se mohu a ya futu wɔ jali ɔmɛ a kpɛti nɛ a kase a ni yayami peemi ni ɔmɛ. 36 Nɛ a sɔmɔ a amaga amɛ; nɛ enɛ ɔ je mɛ kɛ je Mawu he. 37 A wo a bimɛ tɛte kɛ sã bɔ kɛ ha jemɛ a wɔ ɔmɛ. 38 A kpata nihi nɛ pee we nɔ́ ko ɔ a hɛ mi, nɛ ji mɛ nitsɛmɛ a binyumuwi kɛ yiwi nɛ a ngɔ kɛ sã bɔ kɛ ha Kanaan amagahi, nɛ muɔ si puemi ɔ wo zugba a he mu. 39 A ni yayami peemi nɛ ɔmɛ wo mɛ nitsɛmɛ a he mu, ejakaa amaga jami ɔ, e ji ajuama bɔmi ngɛ Tsaatsɛ Mawu hɛ mi. 40 Enɛ ɔ he je nɛ Yehowa mi mi fu e nimli ɔmɛ ngɛ, nɛ a he pee lɛ tai. 41 Nɛ e ngmɛɛ a he kɛ ha a he nyɛli wɔ jali nɛ sume mɛ ɔ nɛ a ye a nɔ. 42 A hi a he nyɛli ɔmɛ a nɔ yemi kɛ a he wami sisi nɛ a wa mɛ yi mi.

43 E kpɔ mɛ si abɔ kɛ je nyɔguɛ yemi ɔ mi, se mɛ hu a ngɛ nɔ ngɛ atuã tsɔe, nɛ a yayami peemi ɔ nya ba wa. 44 Enɛ ɔ kulaa se ɔ, a nɔ́ nami pee lɛ mɔbɔ, nɛ e bu a ngmlaa kpami ɔ tue. 45 E kai e somi ɔ, nɛ e tsake e juɛmi, ejakaa e suɔmi kle. 46 E ha nɛ a nɔ yeli ɔmɛ tete na mɛ mɔbɔ.

47 "O Neneene Tsɛ, wa Mawu, mo he wa yi wami. Mo bua wa nya ekohu kɛ je ma amɛ a nɔ kɛ ba we, konɛ waa na mo si, nɛ wa nya, nɛ wa je o yi."

48 A je Neneene Tsɛ, Israel Mawu ɔ yi kɛ ya neneene. Nɛ nɔ fɛɛ nɔ nɛ de ke, "Amen!" Haleluya!