1 Tsaatsɛ Mawu, mo ji ye laami he! Mo ko kua mi! 2 Mo kpɔ mi kɛ je ye he nyɛli ɔmɛ a dɛ mi, ejakaa dalɔ ji mo! Mo kpɔ mi! Moo ba o tue si nɛ o bu ye pɛɛ kpami ɔ tue nɛ o he ye yi wami. 3 Moo pee o he Tɛ Sa agbo kɛ ha mi nɛ ma kpasa mo, he nɛ i ma hi daa, nɛ ye yi ma na wami kɛ je ye he nyɛli ɔmɛ a dɛ mi. Ejakaa o fa kaa a he ye yi wami. 4 Oo Tsaatsɛ Mawu, mo kpɔ mi kɛ je yayami peeli kɛ yi mi wali nɛ ɔmɛ a dɛ mi. 5 Oo Neneene Tsɛ, mo pɛ ji ye hɛ nɔ kami; i ngɔ ye hɛ kɛ fɔ o nɔ kɛ je ye jokuɛwi a si tɔɔ. 6 O kɛ mi ngɛ kɛ je ye fɔmi be mi tɔɔ, nɛ o ye kɛ bua mi be fɛɛ be, nɛ lɔ ɔ he je nɛ i ngɛ o yi jee daa nɛ ɔ nɛ. 7 Nɛ ye kunimi yemi nɛ peeɔ nihi fuu nyakpɛ ɔ ji kaa mo ji ye he bulɔ nɛ he wa. 8 Jena ligbi ɔ kulaa i ma je o yi nɛ i ma wo o hɛ mi nyami, oo Tsaatsɛ Mawu, ngɛ níhi tsuo nɛ o pee kɛ ha mi ɔ he.

9 Nɛ jehanɛ ɔ, mo ko ngmɛɛ ye he ngɛ ye bwɔmi si. Mo ko kua mi be mi nɛ ye he wami ngɛ gbɔjɔe nɛ ɔ. 10 Ye he nyɛli ɔmɛ ngɛ nya si hɔɔe ke, 11 "Mawu kua lɛ! Jehanɛ ɔ wa nine maa su e nɔ. Nɔ ko be nɛ maa ye kɛ bua lɛ hu." 12 Oo Tsaatsɛ Mawu, mo ko je ye he! Moo ba mla! Moo ye kɛ bua mi! 13 Mo kpata ye he nyɛli nɛ ɔmɛ a hɛ mi nɛ o ha a ni tsumi ɔ nɛ pee yaka gu, nɛ a hɛ mi nɛ pue si.

14 I ngɛ mo blɔ hyɛe nɛ o ye kɛ bua mi. I ma je o yi daa. 15 I be nyɛe ma kane si abɔ nɛ o je mi kɛ je oslaa mi ɔ. I ma de nɔ tsuaa nɔ bɔ nɛ o hi ha, kɛ bɔ nɛ o hyɛɔ ye nɔ daa be fɛɛ be ɔ. 16 Tsaatsɛ Mawu, o he wami nya nɛ i nyɛɛɔ ngɛ. I deɔ nɔ tsuaa nɔ ke mo pɛ ji dalɔ kɛ anɔkualetsɛ. 17 Oo Tsaatsɛ Mawu, o tsɔse mi kɛ je ye jokuɛwi a si tɔɔ, nɛ i yeɔ he odase kɛ deɔ nɔ fɛɛ nɔ be tsuaa be, nyakpɛ níhi nɛ o tsuɔ ɔ. 18 Amlɔ nɛ ɔ, i bwɔ nɛ ye yi hiɔ mua, mo ko kua mi. Mo ha mi be nɛ ma sɛɛ kɛ de yi nɔ bi nɛ ɔmɛ ke a bimɛ nɛ maa ba a, o he wami kɛ o nyakpɛ ni tsumi agbo ɔmɛ. 19 Tsaatsɛ Mawu, o he wami kɛ o dami ɔ ngɛ kɛ ya su hiɔwe tɔɔ. O tsu nyakpɛ ni tsumihi. Jije Mawu kpa ko ngɛ nɛ ngɛ kaa mo? 20 O ha nɛ i na haomi babauu. Se o maa ngɔ mi kɛ ba wami mi ekohu, kɛ je zugba a sisi tɔɔ. 21 O ma ha mi hɛ mi nyami nɛ kle pe kekle nɔ́ ɔ, nɛ i ma na bua jɔmi ekohu.

22 I ma la kɛ saku kɛ je o yi, nɛ i ma jaje mo Israel Nɔ Klɔuklɔu Kake ɔ, o anɔkuale si womi ɔmɛ kɛ tsɔɔ. 23 I ma kpa ngmlaa nɛ i ma la kɛ je o yi ngɛ kpɔmi nɛ o kpɔ mi ɔ he. 24 I ma jaje nɛ i ma de ni kpahi daa ligbi, o dami sane yemi kɛ o himi ɔ. Ejakaa nihi kulaa nɛ ngɛ hlae nɛ a ye mi awi ɔ, o pue a hɛ mi si, nɛ o gbe a he guɛ.