1 Oo Yehowa, Tsaatsɛ Mawu, ye yi wami helɔ, i fo ya ngɛ o hɛ mi nyɔ kɛ pia. 2 Jehanɛ ɔ, moo bu ye kue fami ɔ tue, nɛ o nu ye ya fomi ɔ. 3 Ejakaa ye si himi pee kɛ haomi sɔuu, nɛ i su gbenɔ muɔ nya ta. 4 A bu mi kɛ piɛ ni gbogboe ɔmɛ a he. I ngɛ kaa nɔ ko nɛ be he wami. 5 A si mi ngɛ hiɛ ɔ nɛ ma gbo kaa nihi nɛ a gbe ngɛ ta nga nɔ nɛ o kai we mɛ hu, o je o hɛ ngɛ a nɔ.

6 O wlɔ mi si ngɛ muɔ voo nɛ mi wo diblii mi. 7 O mi mi fumi ngɛ ye nɔ wawɛɛ kaa bɔ nɛ oslɔke kuɔ kɛ pueɔ nɔ nɔ ɔ. 8 O ha nɛ ye huɛmɛ sume mi nɛ a si mi. I plɛ gbeye yemi nɔ́ kɛ ha mɛ. I pee kaa nɔ ko nɛ a wo lɛ tsu mi nɛ e be kpo nyɛe maa je hu. 9 Ye hɛ ngmɛ mi wo diblii kɛ vo nyu. I ngɛ mo pɛɛ kpae daa ligbi ke o ye kɛ bua mi. Oo Tsaatsɛ Mawu, i wo ye nine nɔ kɛ ngɛ mo pɛɛ kpae ke o na mi mɔbɔ.

10 E be kɛe nɛ be maa be. Mɛni se nami ma na ngɛ o nyakpɛ ni tsumi ɔmɛ a he, ke a wo mi kɛ wo gbogboe muɔ mi? Ke i gbo ɔ, kɛ ma plɛ ma je o yi kɛɛ? 11 Anɛ nihi nɛ ngɛ gbogboe muɔ mi ɔ, ma nyɛ je o suɔmi ɔ kpo kɛ tsɔɔ lo? Anɛ a ma nyɛ jaje o anɔkuale ɔ kɛ tsɔɔ lo? 12 A maa le o nyakpɛ ni tsumi ɔmɛ ngɛ diblii mi lo? Aloo a ma nyɛ tu o yemi kɛ buami ɔ he munyu ngɛ he nɛ hɛ jee nɔ nɔ ngɛ lo?

13 Oo Tsaatsɛ Mawu, i ngɛ mo pɛɛ kpae ngɛ ye wami he, nɛ i ma kpa mo pɛɛ daa kɛ daa. 14 Tsaatsɛ Mawu, mɛni he je o sake ye susuma kɛ fɔ he? Mɛni he je o ngɔ o hɛ mi kɛ laa mi? 15 Kɛ je ye jokuɛwi a si bebeebe nɛ i ngɛ hiɔ nue, nɛ i su gbenɔ he haa. Ye tue gblami ɔ gbede mi. 16 O mi mi fumi nɛ nya wa a pee mi pasaa. Nɛ o he gbeye ha ye hɛ mi kpata. 17 Daa je nanɛɛ ɔ, a bɔle mi kɛ kpe kaa nyu; a sa ye yi. 18 O je ye suɔli kɛ huɛmɛ tsuo kɛ je ye he, nɛ diblii wo mi ngɛ he fɛɛ he.