पैदाइस 21

इसहाक को जलम

1 परमेस्वर ना सारा ला आसीरवाद दियो, जसो ओना वादा करयो होतो। 2 ✝21:2 इब्रानियो 11:11 सारा अबराहम लक पोट लक भयी अखीन वा अबराहम को लाय एक टूरा जलम दियो जसो का यहोवा ना कह्यो होतो। वा जब ऊ बूड़गा भय गयो त अबराहम को एक टूरा पैदा भयो। टूरा ठयरायो बेरा मा पैदा भयो होतो जब परमेस्वर न कह्यो होतो कि वा पैदा होयेत। 3 अबराहम ना अपरो ऊ बेटा को नाव जोन सारा लक पैदा भयो होतो इसहाक रख्यो। 4 ✝21:4 पैदाइस 17:12; पेरीत 7:8अवर जब इसहाक आठ दिन को भयो, तबा अबराहम ना ओको खतना करयो, जसो परमेस्वर ना हुकुम दियो होतो। 5 अपनो टूरा इसहाक को जलम को बेरा अबराहम सौ साल को होतो। 6 अवर सारा न कह्यो, "परमेस्वर ना मोला खुसी अवर हसी दियो एकोलायी जो कोनी एको बारे मा आयकन वालो भी मोरो संग हसेत।" 7 तबा ओना कह्यो, "अबराहम लक कोन कव्ह सकासे, का सारा लेकरा ला दूध पिलायेत? तबा भी मीना अबराहम ला ओको बुड़गापन मा टूरा ला जलम दियो।"

8 अवर उ लेकरा मोठो भयो, अऊर ओको दूध सुड़ायो गयो जोन दिवस इसहाक को दूध सोड़ायो गयो, ऊ दिन अबराहम न एक बहुत अच्छो जेवन दियो।

हाजिरा अऊर इस्माएल ला हेड़नो

9 एक दिन सारा न मिसरी हाजीरा को टूरा जोन अबराहम लक पैदा भयो होतो। वोको टूरा इसहाक को मसकरी करत होतो। 10 ✝21:10 गलातियो 4:29-30यो कारन लक सारा न अबराहम लक कह्यो, यो दासी ला वोको टूरा समेत हेड़ दे। काहेका यो दासी को टूरा मोरो टूरा इसहाक को संग वारिस नही होहेत। 11 अपरो टूरा इस्माएल को बारेमा असी गोस्टी अबराहम ला लगत बुरो लगयो। 12 ✝21:12 इब्रानियो 11:18; रोमियो 9:7तबा परमेस्वर ना अबराहम लक कह्यो "तू टूरा अखीन आपरो दासी को बारेमा बूरो नोको मान। जोन गोस्टी सारा तोरो लक सागंयो से ओला आयक! काहे का इसहाक लक तोरो खानदान को नाव बनयो रहेत। 13 मी दासी को टूरा लक एक रास्ट पैदा करहीन, काहेका उ तोरो सन्तान आय।"

14 एकोलाय अबराहम ना सक्कारी लवकर उठ के भाकर अखीन पानी लक भरयो चमड़ा की थैली भी हाजिरा ला दियो अखीन वोला हाजिरा को बख्खा पर रख दियो, अना टूरा समेत वोला सार करयो, हाजीरा गयी अखीन बेरसेबा को जंगल मा भटकन लगी। 15 जब थैली को पानी खतम होय गयो, तबा ओना टूरा ला एक झाड़ी को खाल्या सोड़ दियो। 16 अवर करीब सौ मिटर दूहूर*21:16 तीर को टप्पा की दूरी तक जायके बस गयी, वोना खुद लक कही "मी अपरो लेकरा ला मरतो हुयो नहीं चोव सकू।" तबा वा ओको पूढा दूहूर बसी, तबा टूरा जोर-जोर लक रोवन लग्यो। 17 परमेस्वर ना टूरा को रोवन की आवाज आयकीस, अवर परमेस्वर को दूत ना सरग लक हजीरा ला हाकलीस, ओ हाजीरा तोला काजक भयो से?नोको डराय ! काहेका परमेस्वर ना जिता टूरा पड़यो से उता लक परमेस्वर ना वोको आवाज आयको सेत। 18 उठ, अवर अपरो टूरा ला अपरो हात लक सतरक होयके सम्भाल काहेका मी वोको लक एक महान रास्ट बनाऊ 19 तबा परमेस्वर ना ओकी डोरा खोल दीयो, अवर ओला एक बिहर चोयो। तबा वा ओको जवर गयी, अवर थैली मा पानी भरके टूरा ला पिलायी। 20 अवर परमेस्वर टूरा को जवर होतो, अना जब ऊ मोठो होतो गयो, तबा ऊ सुनसान जघा मा रह्यतो- रह्यतो धनुस चलान वालो बन गयो। 21 वा सूनसान जघा को नाव परान होतो। ओकी माय न ओको लायी मिसर देस लक एक टूरी आनीस।

अबराहम अना अबीमेलेक को बीच समजोता

22 ✝ 21:22 पैदाइस 26:26 उन दिवस मा असो भयो कि राजा अबीमेलेक अपनो सेनापति पीकोल ला संग लेके अबराहम ला कव्हन लग्यो, "जोन काही तू करासे वोना काम मा परमेस्वर तोरो संग से। 23 एकोलायी अब मोरो लक इतानी परमेस्वर को कसम खाय, का तू मोरो लक अना मोरी सन्तान लक अना मोरो खानदान लक छल कपट नोको करजो, पर जसो मीना तोरो संग पिरेम को बरताव करयो सेव, वसोच तू भी मोरो संग अखीन यो देस को संग बरताव करजोस।" 24 अबराहम ना कह्यो, "मी कसम खावासू ।" 25 पर जब अबराहम ना अपरो एक बेहेर को बारे मा अबीमेलेक लक सीकायत करयो जोनको पर अबीमेलेक को दास गीनना कब्जा कर लियो होतो। 26 तबा अबीमेलेक ना कह्यो, "मोला मालूम नाहती कोन यो काम करयो से, अखीन तूना भी मोला नही सांगयो, अना मी अज तकन एको बारे मा नही आयकयो होतो।" 27 तबा अबराहम ना करप लक सेरी मेंढी, अवर गाई बईल अबीमेलेक ला भेंट दियो; अवर वोना दिवस मा एकमेक लक वादा करीन। 28 अबराहम ना मेंढी को सात मेंढी ला करप लक अलग रख्यो। 29 तबा अबीमेलेक न अबराहम लक पुसयो "इन सात मेंढी को पाठी ला तूना बेगरो करयो से एको काजक मतलब सेत?" 30 अबराहम ना जवाब दियो, "तू मोरो हात लक इन सात मेंढी को पाठी ला स्वीकार करजो अना तू मोरो गवाही बनजोस, का मी नाच यो बेहेर ला खन्दवायो सेऊ।" 31 उता दूई ना करार करयो एकोलायी ऊ जघा को नाम बेरसेबा*21:31कसम को बिहर पड़यो। 32 जब उनना बेरसेबा मा यो करार कियो तबा राजा अबीमेलेक अना ओको सेनापति पीकोल, उठ के पलिस्ती गिनको देसमा लवट गयीन। 33 ✝21:33 यसायाह 40:28; 1 तीमुथियुस 1:17 तबा अबराहम बेरसेबा मा झाऊ*21:33 इमली को जसो दिखन वालो को एक झाड़ लगायो, अना यहोवा परमेस्वर की आराधना करीस। 34 अखीन अबराहम लगत बेरा तकन पलिस्ती गिनको को देस मा रह्यो।