1 तबा लाबान को टुरा गिन याकूब को बारेमा असो गोस्टी आयकीन, का याकूब ना आमरो अजी को अब काही हिसक लियो से, यो कारन वोकी मान बढ गयो से। 2 अना याकूब ना लाबान को तोन्ड चोव के ओरख लियो का वोको पिरेम अबा पहले को जसो नहात। 3 तबा यहोवा ना याकूब लक कह्यो, "अपरो घराना पुरखा गिनको देस अना आपरो जलम भूमी मा वापस चली जा, अना मी तोरो संग रहू।" 4 तबा याकूब ना राहेल अना लिआ ला मैदान मा आपरो सेरी-मेंढी को करप जवर बुलाय के कव्हयो, 5 "तुम्हरो अजी को तोन्ड चोवके मी जान लियो सेऊ का अबा वोको मोरो लक पहले जसो माया नहात, पर मोरो अजी को परमेस्वर मोरो संग से। 6 तुम भी जानासो, का मी तुमरो अजी को सेवा पूरो ताकत लक कियो सेत। 7 तबा भी तुम्हरो अजी ना छल करके मोरी बनी ला दहा बार बदल दियो, पर परमेस्वर ना मोरो काही बुरो करन नहीं दियो।" 8 जब ओना कह्यो, " हेड़ लक धब्बा वालो बच्चा तोरी बनी ठैयरेत", तबा सब सेरी मेंढी धब्बा वालो बच्चा जनन लगी, अना जब ओना कह्यो, "धारी वालो बच्चा तोरी बनी ठैयरेत। तबा सब सेरी मेंढी धारी वालो बच्चा जनन लगी।" 9 यो रीति लक परमेस्वर ना तुम्हरो अजी को जनावर लेके मोला दे दियो। 10 जब हेड़ को सेरी मेंढी गाभन होन को बेरा मी ना सपना चोयो का जोन बकरा सेरी गीन पर चघासेत वा धारी वालो, धब्बा वालो, अना चितबहाड़या। 11 तबा परमेस्वर को दूत ना सपना मा मोरो लक कह्यो, ओ याकूब, मी ना कह्यो काजक हुकुम से? 12 ओना कह्यो, "डोरा उठाय के हेड़ को सब बकरा ला चोव जोन सेरी पर चघ रह्यो से, का धारी वालो, धब्बा वालो, अऊर चितबहाड़या से? काहेका जोन काही लाबान तोरो लक करासे वोलामी चोवा सू, 13 ✝ मी वा बेतेल को परमेस्वर सेऊ, जिता तू ना एक गोटा को खम्बा मा तेल डाखयो होतो, अना मोरी मानता मानी होती। अब चल, यो देस लक हीट अना अपरी जलमभूमी मा वापस चली जाय।" 14 तबा राहेल अना लिआ ना याकूब लक कह्यो, "का हमरो अजी को घर मा अब भी हमरो लायी काही हिस्सा या जायजाद बचयो से? 15 का आमरो अजी ना अमीला परायो नही समजो ?चोव, ओना अमिला बीक दियो से, अना जोन धन अमीला हासिल भयो होतो ओला खुद खाय गयो से।" 16 एकोलायी परमेस्वर ना आमरो अजी लक जितरो धन ले लियो से, उ आमरो अना आमरो टुरा गीनको आय, अब जो काही परमेस्वर ना तोला कह्यो से वोच कर, 17 तबा याकूब ना अपरो टुरागीन अना बायको गिनला ऊंट गीनमा बसायो, 18 अना जितरो जनावर ला उ पद्दनराम की सीव मा जमा कर के धनवान भय गयो होतो, सब ला कनान देस मा अपरो अजी इसहाक को जवर जान को बिचार लक संग ले गयो। 19 लाबान अपरी मेंढी हेड़ गिन को ऊन कापन गयो होतो, जब ऊ बाहेर गयो तबा राहेल घर म घुसी अना अपरो अजी को घर को देव ला चुराय के ले गयी। 20 तबा याकूब लाबान अरामी बंस को जवर लक चोरी लक चली गयो, तबा लाबान ला याकूब ना नहीं सांगयो का मी परान वालो सेऊ। 21 याकूब ना अपरो परिवार अना सब काही लेके पराय गयो, अना फरात नद्दी को वोना गन जाय के आपरो तोन्ड गिलाद को कन करयो अना उ पहाड़ी देस को कन चल पड़यो।

22 तीसरो दिवस लाबान ला खबर भेटयो का याकूब पराय गयो। 23 एकोलायी लाबान न अपरो भाऊ गीनला संग लेके ओको सात दिवस तकन वोको पिच्छू जाय के अना गिलाद को पहाड़ी देस मा याकूब ला धर लियो गयो। 24 पर परमेस्वर ना रात को सपनो मा अरामी लाबान को जवर आय के कह्यो, " सतरक रव्हजो, तू याकूब लक भलो बुरो नोको कव्हजोस।" 25 तबा याकूब अपनो तम्बू गिलाद नाव की पहाड़ी देस मा ऊभो कियो होतो, अना लाबान ना भी अपनो भाऊ गिनको संग अपरो तम्बू वोच पहाड़ी देस मा उभो करयो। 26 तबा लाबान याकूब लक कव्हन लग्यो, "तू ना यो काजक करयो सेस? कि मोरो जवर लक चोरी लक चलयो आयो, अना मोरी टुरि गीनला जसो तरवार को बल मा कोनी बन्दी बनावासेत वसो तू ना आन लियो सेत? 27 तू कायको लाय चुपचाप लक पराय के आय गयो, अना मोरो लक काही भी नही सांगयो? तू ता मोरो जवर लक चोरी लक आय गयो सेत नही ता मी तोला बाजा-गाजा को संग सार करतो। 28 तू ना मोला अपरो टूरी नाती गिनको चुम्मा तक नहीं लेवन दियो? तूना मुरख को जसा काम करयो से। 29 तुम लोक को हानि करन की ताकत ता मोरो हात मा सेत। पर तोरो अजी को परमेस्वर ना मोरो लक रात मा सांगयो, सतरक रव्हजोस अना याकूब लक भलो-बूरो नोको कव्हजोस। 30 मोला पता से का अब तू ना अपरो अजी को घर जावन को लहाकी मा आय गयो पर मोरो देव ला काहे चोराके आनयो से?" 31 याकूब ना लाबान ला जवाब दियो, "मी ना यो सोच के डराय गयो होतो का तू आपरो टूरी गिनला मोरो लक हीसक लेवजोस। पर 32 जोन कोनी को जवर तोरो देवता गिनको मूरती हिटेत वा जीन्दो नहीं बचेत मोरो जवर तोरो जोन काही हिटेत वोला आपरो भाऊ गिनको समोर ओरख लेय।" काहेका याकूब नहीं जानत होतो का राहेल घर को देव को मूरती चोर के लायी सेस। 33 यो आयके लाबान याकूब को तम्बू मा गयो, अना वोको मघानी लिया को तम्बू मा गयो अना दूई दासी को तम्बू म गयो पर वोला देव को मूरती नही भेटयो। मघानी वा लिआ को तम्बू लक बाहेर हीट के अना राहेल को तम्बू मा आयो। 34 राहेल त घर को देव को मूरती मा ऊंट को वरता कपरा डाक के वोको पर बसी होती। लाबान ना पूरो तम्बू छान मारयो पर वोला देव को मूरती नही भेटयो। 35 राहेल ना अपनो बाप लक कह्यो, "ओ मोरो मालीक एको लक गुस्सा नोको होय का मी तोरो पूढा उभी नही भयी काहेका मी महावारी लक सेऊ।" असो परकार पूरो तम्बू मा वोको देव को मूरती नही भेटयो। 36 तबा याकूब गुस्सा मा आय के लाबान लक तन्टा करन लगयो। अना वोला कह्यो, "मोरो काजक अपराध से ? मोरो का पाप से का तूना इतरो गुस्सा मा आय के मोरो मघानी आयो से? 37 तूना जोन मोरो समान को तलासी लियो सेत, ता तोला आपरो घरको ओ काजक समान भेटयो? काही भेटयो से ता इता आन अना आपरो भाऊ गिनको जवर राख अना वोच आमरो न्याय करहेत। 38 इन बीस साल तकन मी तोरो जवर रह्यो, इनमा ना ता तोरी सेरी- मेंढी हेड़ को गाफ नही फेकयो, अना तोरो मेन्ढा को मटन जेयो। 39 जोन मेंढी ला जंगली जनावर मार डाकत होतो वोला मी तोरो जवर नही आनयो, अना मी खुदच वा हान को पूरती करत होतो। मेंढी की चोरी चाहे रात ला होय या दिवस मा तू मोरोच लक भरवात होतो। 40 मोरी ता असी दसा होती कि दिवस को घाम अना रात को खर्रा लक मोरो परान हीटत होतो अना मोरी डोरा लक जप पराय जात होतो। 41 मी बीस साल तकन तोरो घर म रह्यो, चवदा साल त मीना तोरी दूई टुरि गिनको लाय अना छय साल तकन तोरी सेरी-मेंढी हेड़ को लाय सेवा करयो, अना तूना मोरी बनी दहा बार बदलयो से। 42 मोरो अजी को परमेस्वर मजे अबराहम इसहाक को परमेस्वर जोनको डर हमी माना सेजन यदि मोरो पक्स मा नही होतो ता तू मोला जरूर रिकामो हात सार करतो, मोरो दुख अना मोरो हात को काम परमेस्वर ना चोय के तोला बितो रात मा परमेस्वर हड़काईस।"

43 लाबान न याकूब लक कह्यो, "यो टुरि ता मोरोच आय, अना यो लेकरा गीन भी मोरोच आय, अना यो सेरी मेंढी गिनकी हेड़ भी मोरीच आय, अना जोन काही तोला दिसासेत उ सब मोरोच आय। पर अब मी आपरो इन टुरीगीन अना इनको संतान लक मी काजक कर सकासू? 44 अब आव, मी अखीन तु दूई एकमेक लक करार करबीन। अना हेत लायी एक गोटा को मुन्डा उभो करबीन।" 45 तबा याकूब ना एक गोटा लेके वोको खम्भा ऊभो करयो। 46 तबा याकूब ना अपरो लोक हुन लक कह्यो, "गोटा जमा करो," यो आयक के उनना गोटा जमा करके एक ढेर लगायो, अना वाच ढेर को जवर उनना जेवन करयो। 47 उ ढेर को नाम लाबान न त यज्रसहादुथा* रख्यो, पर याकूब न गिलियाद रख्यो। 48 लाबान न कह्यो, "यो ढेर अज सी मोरो अना तोरो बीच गवाह रहेत।" यो कारन लक ओको नाम गिलियाद रख्यो गयो, 49 तबा लाबान न कह्यो, "जब अमी एकमेक लक बेगरो होबीन ता यहोवा मोरी अना तोरी देख भाल करतो रह्यो, एकोलायी ऊ जघा को नाम मिस्पा* भी रहेत।" 50 तबा लाबान न कह्यो, "यदि तू मोरी टुरि गिनला दूख देवजोस अना उनको अलावा अखीन दूसरी बायको बिहाव करबीन त हमरो लक कोनी मानूस ता नही रहेत पर चोव मोरो अना तोरो बीच परमेस्वर गवाही से।" 51 तबा लाबान न याकूब लक कह्यो, "यो ढेर ला चोव अना यो खम्भा ला भी चोव जोनला मीना तोरो अना मोरो बीच मा उभो करयो सेऊ। 52 यो ढेर अना यो खम्भा दोई यो गोस्टी को गवाही से का यो ढेर को पार कर के तोरो जवर हानि करन को बिचार लक मी नहीं आऊ, अना तू एना ढेर अना खम्भा ला पार कर के मोरो जवर नहीं आवजो।" 53 अबराहम अना नाहोर अना उनको अजी को परमेस्वर वोच अमी दूई को न्याय करेत। तबा याकूब न ओकी कसम खायी जेको डर ओको बाप इसहाक मानत होतो, 54 अना याकूब ना वोना पहाड़ी मा जनावर की बली चघायी, अना अपनो भाऊ बन्धु ला जेवन करन लायी बुलायो; तबा उनना जेवन कर के पहाड़ी पर रात बितायी। 55 दूसरो दिन भुसांरे ला लाबान उठयो, अना अपनो नाती गीनको चुम्मा ले के टुरि अलबिदा बोल क उनला आसीरवाद दियो, अना अपनो घर ला चली गयो।