Lagumuhóun burí luéyuri Hosé
15 Kei buga hilá lan Hakobu, hariñaga líbirigu Hosé hóunguarügü:
—Háfuga iyereegutiwa lun Hosé, lafayeiragüdübadiwati luagu sun meha wuribati le wadügübei lun.
16 Aba hóunahan ariñaga lun Hosé:
—Lubaragiñe buga lounwen búguchi, ariñagati woun 17 lun wamuriahan buma lun feruduna bániwa luagu wuribati le wadügübei bun. Ligíati wamuriahanbei buma lun ferudunabani wuribani le buga wadügübei, ladüga idamuni wagía lun Lubungiute búguchi.
Sun añaha lan óunagülei íchigei uganu lun Hosé, anihán ayahua. 18 Aba hayabin líbirigu guánarügü, aba habuluchagun ligibugiñe darí ladagarun herebe múarugu, aba hariñagun lun:
—Awanhán, bidamun wagía.
19 Lariñaga Hosé houn:
—Manufudeda humá, siñati níchaagun nungua kei Bungiu. 20 Saminatün yebe meha hadügün wuribati nun, gama lumoun aba lasansiruni Bungiu wuribati ligía luagu buiti, lun ladügüni le warihubei uguñe weyu, lun lesefuruni habagari saragu gürigia. 21 Manufudeda humá lubeiti, níchuguba éigini hun luma houn hirahüñü.
Ítara liña líchugun Hosé dǘgüdaguaü houn, ani adimurehati houn lau saragu ínsiñeni.