Gênesis 15

ಅಬ್ರಾಮಾಚ್ಯಾ ವಾಂಗ್ಡಾ ದೆವಾಚೊ ಕರಾರ್

1 ಹೆ ಸಗ್ಳೆ ಹೊಲ್ಲ್ಯಾ ಮಾನಾ, ಸರ್ವೆಸ್ಪರ್ ದೆವ್ ಅಬ್ರಾಮಾಚ್ಯಾ ದರ್ಶನಾತ್ ದಿಸುನ್, ತೆಕಾ, "ಅಬ್ರಾಮ್ ತಿಯಾ ಬ್ಹಿಂವ್ ನಕ್ಕೊ; ಮಿಯಾ ತುಜೊ ಢಾಲ್ ಹೊವ್ನ್ ಹಾಯ್, ತುಕಾ ಮಿಯಾ ಮೊಟೊ ಭೊಮಾನ್ ದಿತಾ" ಮಟ್ಲ್ಯಾನ್.

2 ಖರೆ ಅಬ್ರಾಮಾನ್ ತೆಕಾ, "ಸರ್ವೆಸ್ಪರ್ ದೆವಾ, ತಿಯಾ ಕಾಯ್ ಬರೆ ಭೊಮಾನ್ ಮಾಕಾ ದಿಲ್ಯಾರ್ಬಿ ಆಜ್ ಪತರ್ ಮಾಕಾ ಪೊರಾ ನಾತ್ ನೈ? ಮಾಕಾ ವಾರಿಸ್ದಾರ್ ದಮಸ್ಕಾತ್ ರಾತಲೊ ಮಾಜೊ ಸೆವಕ್ ಎಲಿಯೆಜೆರುಚ್ ಹೊತಾ" ಮಟ್ಲ್ಯಾನ್. 3 ಅನಿ ಅಬ್ರಾಮಾನ್, "ತಿಯಾ ಮಾಕಾ ಪೊರ್ ದಿವ್ಕ್ ನೈ, ತೆಚ್ಯಾ ವೈನಾ ಮಾಜ್ಯಾ ಘರ್‍ಹಾತ್ ಉಪಾಜಲ್ಲೊ ಸೆವಕ್ ತೊ ಮಾಜಿ ಸಗ್ಳಿ ಆಸ್ತಿ ಅಧಿನಾತ್ ಕರುನ್ಗೆತಾ" ಮನುನ್ ಸಾಂಗ್ಲ್ಯಾನ್.

4 ತನ್ನಾ ಸರ್ವೆಸ್ಪರ್ ದೆವಾನ್ ಅಬ್ರಾಹಾಮಾಕ್, "ತುಜಿ ಆಸ್ತಿ ಪುರಾ ತುಜೊ ಸೆವಕ್ ಘೆಯ್ನಾ, ತುಜ್ಯಾಕ್ನಾ ಉಪಾಜಲ್ಲೊ ಲೆಕುಚ್ ತೆಚ್ಯಾ ಆಸ್ತಿಕ್ ವಾರಿಸ್ದಾರ್ ಹೊತಾ" ಮನುನ್ ಸಾಂಗ್ಲ್ಯಾನ್. 5 ಮಾನಾ ಸರ್ವೆಸ್ಪರ್ ದೆವಾನ್ ಅಬ್ರಾಹಾಮಾಕ್ ಭಾಯ್ರ್ ಬಲ್ವುನ್ ನೆವ್ನ್, "ಮಳ್ಬಾಕ್ ನದರ್ ಘಾಲುನ್ ಬಗ್ ಅನಿ ತುಜೆನ್ ಹೊಲ್ಯಾರ್ ಚುಕ್ಕಿಯಾ ಮೆಜ್ ಅನಿ ಅಸೆಚ್ ತುಜಿ ಪಿಳ್ಗಿಬಿ ಹೊತಾ!" ಮಟ್ಲ್ಯಾನ್.

6 ತನ್ನಾ ಅಬ್ರಾಮಾನ್ ಸರ್ವೆಸ್ಪರ್ ದೆವಾ ವರ್‍ತಿ ವಿಶ್ವಾಸ್ ಕರ್ಲ್ಯಾನ್, ತ್ಯಾ ವಿಶ್ವಾಸಾ ವೈನಾ ಸರ್ವೆಸ್ಪರ್ ಖುಶಿ ಹೊಲೊ ಅನಿ ತೆಕಾ ಸ್ವಿಕಾರ್ ಕರ್ಲ್ಯಾನ್.

7 ಮಾನಾ ತೆನಿ ಅಬ್ರಾಹಾಮಾಕ್ "ಕಲ್ದಿಯಾತ್ಲ್ಯಾ ಉರ್ ಶಾರಾಕ್ ತುಕಾ ಬಲ್ವುನ್ ಹಾನುನ್, ಹೊ ದೆಶ್ ದಿವ್ಚೆ ಮನುನ್ ಕರ್ಲಾ" ಮಟ್ಲ್ಯಾನ್.

8 ಖರೆ "ಸರ್ವೆಸ್ಪರಾ ಹ್ಯೊ ದೆಶ್ ಗಾವ್ತಾ ಮನುನ್ ಕಸೆ ಒಳ್ಕುನ್ ಗೆವ್ಕ್ ಹೊತಾ?" ಮನುನ್ ಅಬ್ರಾಮಾನ್ ಇಚಾರ್‍ಲ್ಯಾನಿ.

9 ದೆವಾನ್ ತನ್ನಾ, "ತಿನ್ ವರ್ಸಾಚಿ ಎಕ್ ಪಾಡಿ, ತಿನ್ ವರ್ಸಾಚೆ ಬಕ್ರೆ ಅನಿ ತಿನ್ ವರ್ಸಚಿ ಎಕ್ ಶೆಳಿ ಹಾನ್, ಅನಿ ಎಕ್ ಕೌಡೊ ಅನಿ ಎಕ್ ಪಾರಿವಾಳ್ ಘೆವ್ನ್ ಯೆ" ಮಟ್ಲ್ಯಾನ್. 10 ಸರ್ವೆಸ್ಪರ್ ದೆವಾನ್ ಸಾಂಗಲ್ಲೆ ಸಗ್ಳೆ ಅಬ್ರಾಮಾನ್ ಹಾನ್ಲ್ಯಾನ್, ಮಾನಾ ತೆ ಕಾತ್ರುನ್ ಅರ್ಧೆ ತುಕ್ಡೆ ಕರ್ಲ್ಯಾನ್, ಅನಿ ಅರ್ಧೆ ಕರಲ್ಯಾಕ್ ಕಾಪುನ್ ದೊನ್ ತುಕ್ಡೆ ಕರ್ತಾ, ಖರೆ ಫಾಕ್ರಾಕ್ನಿ ಕಾಪುಕ್ ನಾ. 11 ಮಾನಾ ಉಲ್ಲ್ಯಾ ಯೆಳಾನ್ ಹಳಿ ಹದ್ದಾ ಯೆತಾನಾ ಅಬ್ರಾಮಾನ್ ತೆಂಕಾ ಪಳ್ಸುನ್ ಘಾಟ್ಲ್ಯಾನ್.

12 ಮಾನಾ ಸಾಂಜ್ ಹೊಲಿ ದಿಸ್ ಬುಡುಲಾಲೆ ಅಬ್ರಾಹಾಮಾಕ್ ಮೊಟ್ಟಿ ನಿಜ್ ಲಾಗ್ಲಿ, ಮೊಟೊ ಅನಿ ಭಯಾನಕ್ ಕಾಳೊಕ್ ಹೊಲೊ.

13 ತನ್ನಾ ಅಬ್ರಾಹಾಮಾಕ್ ಸರ್ವೆಸ್ಪರ್ ದೆವಾನ್, ಚಾರ್ಸೆ ವರಿಸ್ ತುಜಿ ಲೊಕಾ ಕೊನ್ಬಿ ನತ್ತೆ ಹೊವ್ನ್ ಸ್ವತ್ಯಾಚ್ಯಾ ನೈ ಹೊಲ್ಲ್ಯಾ ದೆಸಾತ್ ವಸ್ತಿ ರ್‍ಹಾತಾತ್, ಅನಿ ಗುಲಾಮ್ ಗಿರಿತ್ ರ್‍ಹಾತಾತ್, ತೆ ತುಕಾ ಯಾದ್ ರಾಂವ್ದಿತ್.

14 ಖರೆ ತುಮಿ ತೊ ದೆಶ್ ಸೊಡುನ್ ಜಾತಾನಾ ತುಮ್ಕಾ ಗುಲಾಮ್ ಗಿರಿತ್ ಚಾಲ್ವುತಲ್ಯಾ ಲೊಕಾಕ್ನಿ ಮಿಯಾ ಶಿಕ್ಷ್ಯಾ ದಿತಾ ಅನಿ ತೆನಿ ಭಾಯ್ರ್ ಪಡ್ತಾನಾ ಲೈ ಸಾವ್ಕಾರಾ ಹೊವ್ನ್ ಯೆತಾತ್. 15 ತಿಯಾ ಮ್ಹಾತಾರ್ಯಾ ವೈಯಾತ್ ಲೈ ಸಮಾಧಾನಾನ್ ರಾತೈ ತುಜಿ ಮಾಟಿ ಶಾಂತ್ಪಾನಾನ್ ಹೊತಾ.

16 ಮಾನಾ ತುಜ್ಯಾ ಚಾರ್ವೆಚ್ಯಾ ಪಿಳ್ಗಿಚಿ ಲೊಕಾ ಪಾಟಿ ಪರ್‍ತುನ್ ಯೆತಾತ್, ಕಶ್ಯಾಕ್ ಮಟ್ಲ್ಯಾರ್ ತವ್ಡ್ಯಾ ಪತರ್ ಮಿಯಾ ಅಮೊರಿಯಾಕ್ನಿ ತ್ಯಾ ದೆಸಾತ್ನಾ ಭಾಯ್ರ್ ಕಾಡುನ್ ರ್‍ಹಾಯ್ನಾ, ತೆನಿ ಯೆವ್ನ್ ತೆಂಕಾ ಹಾರ್ವುತಾತ್ ಅನಿ ಮಿಯಾ ತೆಂಕಾ ಲೈ ಶಿಕ್ಷ್ಯಾ ದಿತಾ.

17 ಮಾನಾ ದಿಸ್ ಬುಡುನ್ ಲೈ ಕಾಳೊಕ್ ಹೊಲೊ, ತೆನಿ ಕರಲ್ಯಾ ಜನಾವರಾಂಚ್ಯಾ ಮಾಸಾಚ್ಯಾ ತುಕ್ಡ್ಯಾಂಚ್ಯಾ ಮದ್ನಾ ಡುಕ್ಟಾಚೆ ಗಾಡ್ಗೆ ಅನಿ ಆಗಿಚಿ ಚುಡ್ ದಾಟುನ್ ಗೆಲಿ. 18 ಮಾನಾ ಸರ್ವೆಸ್ಪರ್ ದೆವಾನ್ ಅಬ್ರಾಮಾಚ್ಯಾ ವಾಂಗ್ಡಾ ಆನ್ ಕರುನ್, "ಮಿಯಾ ತುಜ್ಯಾ ಪಿಳ್ಗಿಚ್ಯಾ ಲೊಕಾಕ್ನಿ, ಇಜಿಪ್ತಾಕ್ನಾ ಯುಪ್ರಟಿಕ್ ಮನ್ತಲ್ಯಾ ನ್ಹಯ್ ಪಾತರ್ಚೊ ಜಾಗೊ ದಿಲಾ, 19 ಕೆನಿಯಾ, ಕನಿಜಿಯಾ, ಕದ್ಮೊನಿಯಾ, 20 ಹಿತ್ತಿಯಾಂಚೊ, ಪೆರಿಜಿತಾಂಚೊ, ರಾಫಾಯಿತಾಂಚೊ, 21 ಅಮೊರಿತಾಂಚೊ, ಕಾನಾನ್ ಗಾರಾಂಚೊ, ಗಿರ್ಗಾಶಿತಾಂಚೊ, ಅನಿ ಜೆಬುಸಿಯಾಂಚೊ ದೆಶ್" ಮಿಯಾ ತುಕಾ ದಿತಾ ಮಟ್ಲ್ಯಾನ್.