Gênesis 27

ಜಾಕೊಬಾಕ್ ಇಸಾಕಾಚೊ ಆಶಿರ್ವಾದ್

1 ಇಸಾಕ್ ಮ್ಹಾತಾರೊ ಹೊವ್ನ್ ಡೊಳೆ ದಿಸಿನಸಲ್ಯಾ ತವ್ಡೆ ಮಬ್ಬ್ ಹೊಲೆ, ತೆನಿ ಅಪ್ಲೊ ಥೊರ್ಲೊ ಲೆಕ್ ಎಸಾವಾಕ್, "ಲೆಕಾ" ಮನುನ್ ಬಲ್ವುತಾನಾ,

ಎಸಾವಾನ್, "ಅಬಕ್ ಮಿಯಾ ಹಿತ್ತೆಚ್ ಹಾಂವ್" ಮಟ್ಲ್ಯಾನ್.

2 ತನ್ನಾ ಇಸಾಕಾನ್ ತೆಕಾ, ಅಬಕ್ ಮಿಯಾ ಕನ್ನಾ ಮರ್ತಾ ಮನುನ್ ಗೊತ್ತ್ ನಾ ತವ್ಡೊ ಲೈ ಮ್ಹಾತಾರೊ ಹೊಲಾ; 3 ತಸೆ ಹೊವ್ನ್ ತುಜಿ ಹಾತ್‍ಯಾರಾ, ಅನಿ ಬಿಲ್ಬಾನ್ ಘೆವ್ನ್ ಡಂಗ್ಳಿಕ್ ಜಾವ್ನ್ ಶಿಕಾರ್ ಕರುನ್ ಶಿಕಾರಿಚೆ ಮಾಂಸ್ ಘೆವ್ನ್ ಯೆ; 4 ಅನಿ ಮಾಜ್ಯಾ ಮನಾಕ್ ಯೆತಲೆ ರುಚ್ ಜೆವಾನ್ ತಯಾರ್ ಕರುನ್ ವಾಡ್ ದ್ಯಾಯ್ ಭರುನ್ ಜೆವ್ತಾ ಅನಿ,

ಮಾಕಾ ಮರಾನ್ ಯೆವ್ಚ್ಯಾ ಪೈಲೆ ಮಾಜ್ಯಾ ಮನಾಕ್ ಯೆಯ್ ಸಾರ್ಕೆ ತುಕಾ ಆಶಿರ್ವಾದ್ ಕರ್ತಾ, ಮಟ್ಲ್ಯಾನ್.

5 ಇಸಾಕಾನ್ ಎಸಾವಾಕ್ ಸಾಂಗುಲಾಗಲಿ ಹಿ ಗೊಸ್ಟಿಯಾ ರೆಬೆಕ್ಕಾಚ್ಯಾ ಕಾನಾಕ್ ಪಡ್ಲಿ, ಎಸಾವ್ ಶಿಕಾರಿಕ್ ಮನುನ್ ಡಂಗ್ಳಿಕ್ ಗೆಲ್ಲ್ಯಾ ತನ್ನಾ, 6 ತಿನಿ ಅಪ್ಲೊ ಲೆಕ್ ಜಾಕೊಬಾಕ್ಡೆ, ತುಜೊ ಬಾಬಾ ತುಜೊ ಭಾವ್ ಎಸಾವಾಕ್ಡೆ ಬೊಲುಲಾಗಲೊ, 7 ತಿಯಾ ಜಾವ್ನ್ ಶಿಕಾರ್ ಕರುನ್ ಮಾಂಸ್ ಹಾನುನ್ ಬರೆ ಜೆವಾನ್ ತಯಾರ್ ಕರುನ್ ಮಾಕಾ ವಾಡ್; ಮಾಕಾ ಮರಾನ್ ಯೆವ್ಚ್ಯಾ ಪೈಲೆ ಸರ್ವೆಸ್ಪರ್ ದೆವಾಚ್ಯಾ ಇದ್ರಾಕ್ ತುಕಾ ಆಶಿರ್ವಾದ್ ದಿತಾ, ಮನುಕ್ಲಾಗಲೆ ಮಿಯಾ ಆಯ್ಕ್ಲೊ. 8 ತಸೆ ಹೊವ್ನ್ ಮಾಜ್ಯಾ ಲೆಕಾ ಮಿಯಾ ಸಾಂಗ್ತಲೆ ಕಾನ್ ದಿವ್ನ್ ಆಯ್ಕ್ ಅನಿ ಮಿಯಾ ಸಾಂಗಲ್ಯಾ ಸಾರ್ಕೆ ಕರ್; 9 ಶೆಳಿಯಾಂಚ್ಯಾ ತಾಂಡ್ಯಾಕ್ಡೆ ಲಗ್ಗುನಾ ಜಾ ಅನಿ ದೊನ್ ಶೆಳಿಯಾಂಚೆ ಪೆಟೆ ಹಾನ್, ಮಿಯಾ ತುಜ್ಯಾ ಬಾಬಾಕ್ ಮನಾಕ್ ಯೆತಲೆ ಜೆವಾನ್ ತಯಾರ್ ಕರುನ್ ದಿತಾ, 10 ತಿಯಾ ತೆ ನ್ಹೆವ್ನ್ ತೆಕಾ ವಾಡುಚೆ; ಹೆಜ್ಯಾ ವೈನಾ ತೊ ಮರುಚ್ಯಾ ಪೈಲೆ ತುಕಾಚ್ ಮನಾಕ್ ಯೆಯ್ ಸಾರ್ಕೆ ಆಶಿರ್ವಾದ್ ದಿತಾ, ಮಟ್ಲಿನ್.

11 ತನ್ನಾ ಜಾಕೊಬಾನ್, ಮಾಜ್ಯಾ ಭಾವಾಚ್ಯಾ ಆಂಗ್ಬರ್ ಕೆಸಾ ಹಾತ್, ಮಾಜೆ ಆಂಗ್ ತರ್ ಸಾಪ್ ಹಾಯ್,

12 ಬಾಬಾನ್ ಎಕ್ಎಳಾ ಮಾಕಾ ಅಪ್ಡುನ್ ಬಗಟ್ಲ್ಯಾರ್ ಮಿಯಾ ಪಸ್ವುಲೊ ಮನುನ್ ಕಳ್ಳ್ಯಾರ್ ಆಶಿರ್ವಾದ್ ದಿತಲ್ಯಾ ಬದ್ಲಾಕ್ ಶಾಪ್ ದಿಯ್ಲ್, ಮಟ್ಲ್ಯಾನ್.

13 ತನ್ನಾ ತೆಚ್ಯಾ ಬಾಯ್ನ್, ಲೆಕಾ ತೆನಿ ಶಾಪ್ ದಿಲ್ಯಾರ್ ತೊ ಶಾಪ್ ಮಾಕಾ ಲಾಗುಂದಿತ್; ತಿಯಾ ಮಾಜಿ ಗೊಸ್ಟ್ ಆಯ್ಕ್ ಅನಿ ಶೆಳಿಯಾಂಚೆ ಪೆಟೆ ಹಾನ್, ಮಟ್ಲಿನ್. 14 ತೆನಿ ಜಾವ್ನ್ ತೆ ಪೆಟೆ ಹಾನುನ್ ಬಾಯ್ಕ್ ದಿಲ್ಯಾನ್ ರೆಬೆಕ್ಕಾನ್ ತೆಚ್ಯಾ ಬಾಬಾಕ್ ಮನಾಕ್ ಯೆತಲೆ ಜೆವಾನ್ ರಾಂದ್ಲಿನ್. 15 ಅಪ್ಲೊ ಥೊರ್ಲೊ ಲೆಕ್ ಎಸಾವಾಚೆ ನ್ಹವೆ ಕಪ್ಡೆ ಘರ್‍ಹಾತ್ ತಿಚ್ಯಾಕ್ಡೆ ಹೊತ್ತ್ಯೆ, ತೆ ಅಪ್ಲೊ ಧಾಕ್ಲೊ ಲೆಕ್ ಜಾಕೊಬಾಕ್ ನ್ಹೆಸ್ವುಲಿನ್. 16 ಶೆಳಿಯಾಂಚ್ಯಾ ಪೆಟ್ಯಾಂಚ್ಯಾ ಚಮ್ಡ್ಯಾನ್ ತೆಚ್ಯಾ ಸಾಪ್ ಹೊತ್ತ್ಯಾ ಹಾತಾಕ್ನಿ ಅನಿ ಮಾನೆಕ್ಬಿ ಲಪಟ್ಲಿನ್. 17 ಅನಿ ಅಪ್ನಿ ರಾಂಧಲೆ ಬರೆ ಜೆವಾನ್ ಅನಿ ಕರಲಿ ಭಾಕ್ರಿಯಾ ಅಪ್ಲೊ ಲೆಕ್ ಜಾಕೊಬಾಚ್ಯಾ ಹಾತಿತ್ ದಿವ್ನ್ ಧಾಡ್ಲಿನ್.

18 ಜಾಕೊಬ್ ಬಾಬಾಕ್ಡೆ ಜಾವ್ನ್, "ಬಾಬಾ" ಮನುನ್ ಬಲ್ವುಲ್ಯಾನ್ ತನ್ನಾ "ಕಾಯ್ ಲೆಕಾ ತಿಯಾ ಖಲೊ ಲೆಕ್?" ಮನುನ್ ಬಾಬಾನ್ ಇಚಾರ್‍ಲ್ಯಾನಿ.

19 ತನ್ನಾ ಜಾಕೊಬಾನ್, ಮಿಯಾಚ್ ತುಜೊ ಥೊರ್ಲೊ ಲೆಕ್ ಎಸಾವ್; ತುಜ್ಯಾ ಹುಕುಮಾ ಸಾರ್ಕೆ ಜೆವಾನ್ ತಯಾರ್ ಕರುನ್ ಹಾನ್ಲಾ, ಉಟುನ್ ಬಸ್ ಅನಿ ಮಿಯಾ ಶಿಕಾರಿ ಕರುನ್ ಹಾನಲ್ಯಾ ಮಾಂಸಾಚೆ ಜೆವಾನ್ ಕರುನ್ ಮಾಕಾ ಮನಾನಿ ಆಶಿರ್ವಾದ್ ದಿ, ಮಟ್ಲ್ಯಾನ್.

20 ಇಸಾಕಾನ್, ಕಾಯ್ ಲೆಕಾ, ಯೆವ್ಡ್ಯಾ ಲುಗ್ಗುನಾ ಕಸಿ ಶಿಕಾರಿ ಗಾವ್ಲಿ? ಮನುನ್ ಇಚಾರ್‍ಲ್ಯಾನಿ, ತನ್ನಾ ಜಾಕೊಬಾನ್, ತುಜೊ ದೆವ್ ಸರ್ವೆಸ್ಪರಾನ್ ತೆ ಮಾಜ್ಯಾ ಇದ್ರಾಕ್ ಯೆಯ್ ಸಾರ್ಕೆ ಕರ್ಲ್ಯಾನ್ ಮಟ್ಲ್ಯಾನ್.

21 ತನ್ನಾ ಇಸಾಕಾನ್, "ಲೆಕಾ ಜಗ್ಗೊಳ್ ಯೆ ಮಿಯಾ ಅಪ್ಡುನ್ ತಿಯಾ ಖರೆಚ್ ಮಾಜೊ ಲೆಕ್ ಎಸಾವ್ ಹೊಯ್ ಕಿ ನೈ ಮನುನ್ ಕಳ್ವುನ್ ಘೆವ್ಚೆ", ಮಟ್ಲ್ಯಾನ್. 22 ಜಾಕೊಬ್ ಜಗ್ಗೊಳ್ ಯೆಲ್ಯಾ ತನ್ನಾ ಬಾಬಾ ಇಸಾಕಾನ್ ತೆಕಾ ಅಪ್ಡುನ್, "ಧನ್ ತರ್ ಜಾಕೊಬಾಚಿಚ್; ಖರೆ ಹಾತ್ ಎಸಾವಾಚೊ" ಮಟ್ಲ್ಯಾನ್. 23 ಜಾಕೊಬಾಚ್ಯಾ ಹಾತಾಕ್ನಿಬಿ ತೆಜಾ ಭಾವಾಚ್ಯಾ ಹಾತಾಕ್ನಿ ಹೊತ್ಯಾ ಸಾರ್ಕೆ ಕೆಸಾ ಹೊತ್ಯಾಸಾಟ್ನಿ ಇಸಾಕಾಕ್ ತೆಚಿ ವಳಕ್ ಕಳಿನಸ್ತಾನಾ ತೆಕಾ ಆಶಿರ್ವಾದ್ ದಿಲ್ಯಾನ್. 24 ಹೊಲ್ಯಾರ್ಬಿ ಅನಿ ಪರ್‍ತುನ್, "ಖರೆಚ್ಬಿ ತಿಯಾ ಮಾಜೊ ಲೆಕ್ ಎಸಾವುಚ್ ಕಾಯ್?" ಮನುನ್ ಇಚಾರ್‍ಲ್ಯಾನಿ, ಜಾಕೊಬಾನ್ "ಹೊಯ್" ಮನುನ್ ಜಬಾಬ್ ದಿಲ್ಯಾನ್.

25 ತನ್ನಾ ಇಸಾಕಾನ್, "ತೆ ಶಿಕಾರ್ ಕರಲೆ ಮಾಂಸ್ ಹಾನುನ್ ವಾಡ್ ಜೆವ್ತಾ, ಅನಿ ಮಾನಾ ತುಕಾ ಆಶಿರ್ವಾದ್ ದಿತಾ," ಮಟ್ಲ್ಯಾನ್, ತಸೆಚ್ ಜಾಕೊಬಾನ್ ವಾಡಲ್ಯಾ ತನ್ನಾ ಇಸಾಕಾನ್ ಜೆವ್ಲ್ಯಾನ್; ಅನಿ ದಿಲ್ಲೊ ವಾಯ್ನ್ ಫಿಲ್ಯಾನ್. 26 ಮಾನಾ ತೆಜೊ ಬಾಬಾ ಇಸಾಕಾನ್, "ಲೆಕಾ, ಜಗ್ಗೊಳ್ ಯೆವ್ನ್ ಮಾಕಾ ಉಪ್ಪಾ ದಿ", ಮಟ್ಲ್ಯಾನ್, ತೆನಿ ಜಗ್ಗೊಳ್ ಯೆವ್ನ್ ಉಪ್ಪಾ ದಿಲ್ಲ್ಯಾ ತನ್ನಾ, 27 ಇಸಾಕಾನ್ ತೆಚ್ಯಾ ಕಂಪ್ಡ್ಯಾಚಿ ಬರೆ ವಾಸ್ ಘೆವ್ನ್, ತೆಕಾ ಆಶಿರ್ವಾದ್ ದಿವ್ನ್, "ಅಬಕ್ ಮಜ್ಯಾ ಲೆಕಾಚಿ ಬರಿ ವಾಸ್ ಸರ್ವೆಸ್ಪರ್ ದೆವಾನ್ ಆಶಿರ್ವಾದ್ ದಿಲ್ಲ್ಯಾ ಸೆತ್ಯಾಚ್ಯಾ ವಾಸೆ ಸಾರ್ಕೆ ಹಾಯ್, 28 ತಸೆ ಹೊವ್ನ್ ದೆವ್ ತುಕಾ ಮಳ್ಬಾತ್ಲಿ ಇಬ್ಬನಿ ಅನಿ ಫಳ್ ದಿತಲಿ ಜಿಮಿನ್, ಲೈ ಬರೆ ಯೆಲ್ಲೆ ಪಿಕ್ ಅನಿ ವಾಯ್ನ್ ದಿಂವ್ದಿತ್, 29 ಲೊಕಾ ತುಜಿ ಸೆವಾ ಕರುಂದಿತ್, ಘರಾನೆ ತುಕಾ ಪಾಯ್ ಪಡುಂದಿತ್, ತುಜ್ಯಾ ಭಾವಾಕ್ನಿ ತಿಯಾಚ್ ಯಜಮಾನ್ ಹೊವ್ನ್ ರಾ, ತುಜ್ಯಾ ಬಾಯ್ಚಿ ಪೊರಾ ತುಕಾ ಪಾಯ್ ಪಡುಂದಿತ್, ತುಕಾ ಆಶಿರ್ವಾದ್ ದಿತಲ್ಯಾಕ್ನಿ ಆಶಿರ್ವಾದ್ ಅನಿ ತುಕಾ ಶರಾಪ್ ದಿಲ್ಲ್ಯಾಕ್ನಿ ಶರಾಪ್ ಹೊಂವ್ದಿತ್", ಮಟ್ಲ್ಯಾನ್.

ಇಸಾಕಾಕ್ಡೆ ಎಸಾವಾಚಿ ಮಾಗ್ನಿ

30 ಇಸಾಕಾನ್ ಜಾಕೊಬಾಕ್ ಆಶಿರ್ವಾದ್ ಕರ್ಲ್ಯಾ ಮಾನಾ ತೊ ಬಾಬಾಚ್ಯಾ ಜಗ್ಗೊಳ್ನಾ ಗೆಲೊ ಅನಿ ತನ್ನಾ ತೆಜೊ ಅನ್ನಾ ಎಸಾವ್ ಶಿಕಾರಿಕ್ ಗೆಲ್ಲೊ ಯೆವ್ನ್ ಪಾವ್ಲೊ. 31 ತೆನಿಬಿ ಬರೆ ಜೆವಾನ್ ತಯಾರ್ ಕರುನ್ ಬಾಬಾಕ್ಡೆ ಹಾನುನ್, "ಉಟ್ ಬಾಬಾ ಮಿಯಾ ತುಜ್ಯಾ ಲೆಕಾನ್ ಹಾನಲೆ ಶಿಕಾರಿಚೆ ಮಾಂಸ್ ಜೆವಾನ್ ಕರುನ್ ಮಾಕಾ ಆಶಿರ್ವಾದ್ ದಿ," ಮನುನ್ ಮಾಗ್ಲ್ಯಾನ್.

32 ಕೊನ್ ತಿಯಾ? ಮನುನ್ ಇಸಾಕಾನ್ ಇಚಾರ್‍ತಾನಾ, "ಮಿಯಾಚ್ ತುಜೊ ಥೊರ್ಲೊ ಲೆಕ್ ಎಸಾವ್" ಮನುನ್ ಜವಾಬ್ ದಿಲ್ಯಾನ್.

33 ತನ್ನಾ ಇಸಾಕ್ ಥರ್ಥರುನ್ ಕಾಪುನ್ಗೆತ್ "ತಸೆ ಹೊಲ್ಯಾರ್ ಮಾಕಾ ಶಿಕಾರಿಚೆ ಮಾಂಸ್ ಹಾನುನ್ ಜೆವಾನ್ ದಿಲ್ಲೊ ಕೊನ್ ? ತಿಯಾ ಯೆವ್ಚ್ಯಾ ಪೈಲೆ ತೆನಿ ಹಾನಲೆ ಜೆವಾನ್ ಕರುನ್ ಆಕ್ರಿಕ್ ತೆಕಾಚ್ ಆಶಿರ್ವಾದ್ ದಿಲೊ; ತೆಕಾ ದಿಲ್ಲೊ ಆಶಿರ್ವಾದ್ ಚುಕ್ವುಕ್ ಹೊಯ್ನಾ" ಮಟ್ಲ್ಯಾನ್.

34 ಬಾಬಾಚಿ ಹಿ ಗೊಸ್ಟ್ ಆಯ್ಕುನ್ ಎಸಾವಾಕ್ ಲೈ ಬೆಜಾರ್ ಹೊತಾ ಅನಿ ಲೈ ರಡ್ಲ್ಯಾನ್, ಅನಿ ಮೊಟ್ಟ್ಯಾ ಧನಾನ್ "ಬಾಬಾ, ಮಾಕಾಬಿ ಆಶಿರ್ವಾದ್ ದಿ" ಮನುನ್ ಮಾಗ್ಲ್ಯಾನ್.

35 "ತುಜ್ಯಾ ಭಾವಾನ್ ಯೆವ್ನ್ ಪಸ್ವುನ್ ತುಕಾ ಹೊವ್ಚೆ ಹೊಲ್ಲೊ ಆಶಿರ್ವಾದ್ ಕಾಡುನ್ಗೆವ್ನ್ ಗೆಲ್ಯಾನ್," ಮನುನ್ ಇಸಾಕಾನ್ ಸಾಂಗ್ಲ್ಯಾನ್.

36 ತನ್ನಾ ಎಸಾವಾನ್ ಜಾಕೊಬ್ ಮನ್ತಲೆ ನಾವ್ ತೆಕಾ ಸಮಾ ಹಾಯ್; ಹೆಜ್ಯಾ ಅದ್ದಿ ಮಾಜೊ ಥೊರ್ಲೆ ಪಾನಾಚೊ ಹಕ್ಕ್ ಚೊರ್ಲ್ಯಾನ್; ಅನಿ ಅತ್ತಾ ಮಾಕಾ ಯೆವ್ಚೊ ಹೊಲ್ಲೊ ಆಶಿರ್ವಾದ್ ಕಾಡುನ್ಗೆಟ್ಲ್ಯಾನ್, ಹೆಜ್ಯಾ ವೈನಾ ತೆನಿ ಮಾಕಾ ದೊನ್ ಪಟಿ ಪಸ್ವುಲ್ಯಾನ್ ಮನುನ್ಗೆತ್, ಬಾಬಾಕ್ ಬಗುನ್, "ತುಜ್ಯಾಕ್ಡೆ ಮಾಕಾ ಮನುನ್ ಖಲೊ ಆಶಿರ್ವಾದ್ಬಿ ಹುರುಕ್ನಾ ಕಾಯ್?" ಮನುನ್ ಇಚಾರ್‍ಲ್ಯಾನಿ.

37 ತನ್ನಾ ಇಸಾಕಾನ್ ತೆಕಾ ತುಜೊ ಯಜಮಾನ್ ಕರುನ್ ನೆಮ್ಲಾ; ಭಾವಾಕುಚ್ ತೆಜೊ ಆಳ್ ಕರುನ್ ದಿಲೊ; ಸೆತ್ ಭಾತ್, ಪಿಕ್, ಅನಿ ವಾಯ್ನ್ ತೆಕಾಚ್ ದಿಲೊ, ಅಸೆ ರ್‍ಹಾತಾನಾ ಲೆಕಾ ಮಿಯಾ ತುಕಾ ಕಾಯ್ ಕರುಕ್ ಹೊತಾ? ಮಟ್ಲ್ಯಾನ್. 38 "ಬಾಬಾ ತುಜ್ಯಾಕ್ಡೆ ತೊ ಎಕುಚ್ ಆಶಿರ್ವಾದ್ ಹೊತ್ತೊ ಕಾಯ್? ಮಾಕಾಬಿ ಆಶಿರ್ವಾದ್ ದಿ" ಮನುನ್ ಲೈ ರಡುನ್ ಮಾಗ್ಲ್ಯಾನ್.

39 ತನ್ನಾ ಬಾಬಾ ಇಸಾಕಾನ್ ತೆಕಾ,

ಅಬಕ್ ತುಜೆ ಘರ್ ಬರ್‍ಯಾ ಜಮ್ನಿಚ್ಯಾ ವೈನಾ ಪಡ್ತಲ್ಯಾ ಮಳ್ಬಾಚ್ಯಾ ಇಬ್ಬನಿತ್ ರ್‍ಹಾತಾ.

40 ತುಜ್ಯಾ ಕೊಯ್ತ್ಯಾಚ್ಯಾ ಬಳಾ ವೈನಾ ಜಿವನ್ ಕರ್‍ತೆ,

ತುಜ್ಯಾ ಬಾವಾಚಿ ಸೆವಾ ಕರ್‍ತೆ,

ಖರೆ ತಿಯಾ ಯಜಮಾನ್ ಹೊಲ್ಲ್ಯಾ ತನ್ನಾ ತೆಜೊ ಜುಂ ತುಜ್ಯಾ ಮಾನೆನ್ ಮೊಡುನ್ ಟಾಕ್ತೆಯ್.

41 ಜಾಕೊಬಾನ್ ಬಾಬಾಕ್ನಾ ಘೆಟಲ್ಯಾ ಆಶಿರ್ವಾದಾಂಚ್ಯಾ ಸಾಟ್ನಿ ಲೈ ರಾಗ್ ಹೊಲ್ಯಾನ್ ಅನಿ ಬಾಬಾಚೆ ಮರಾನ್ ಹೊತಲೆ ದಿಸ್ ಜಗ್ಗೊಳ್ ಯೆಲಾತ್ ತೆಚ್ಯಾ ಮಾನಾ ಭಾವ್ ಜಾಕೊಬಾಕ್ಬಿ ಜಿವ್ ಕಾಡ್ತಾ ಮನುನ್ ಮನಾತುಚ್ ಬೊಲುನ್ಗೆಟ್ಲ್ಯಾನ್.

42 ರೆಬೆಕ್ಕಾಕ್ ಎಸಾವಾಚಿ ಹಿ ಯವ್ಜನ್ ಕಳುನ್ ಯೆಲ್ಲ್ಯಾ ತನ್ನಾ ತಿನಿ ಅಪ್ಲೊ ಧಾಕ್ಲೊ ಲೆಕ್ ಜಾಕೊಬಾಕ್ ಬಲ್ವುನ್, ಅಬಕ್ ತುಜೊ ಥೊರ್ಲೊ ಭಾವ್ ತುಕಾ ಜಿವ್ ಕಾಡುನ್ ಅಪ್ನಾಕ್ ಸಮಾಧಾನ್ ಕರುನ್ಗೆಟ್ಲ್ಯಾನಾಯ್,

43 ತಸೆ ಹೊವ್ನ್ ಲೆಕಾ ಅತ್ತಾ ಮಾಜ್ಯಾ ಗೊಸ್ಟಿಕ್ ಕಾನ್ ದಿ; ಉಟ್ ಅನಿ ಹಾರಾನಾತ್ ಹೊತ್ತ್ಯಾ ಮಾಜ್ಯಾ ಭಾವ್ ಲಾಬಾನಾಕ್ಡೆ ಪಳುನ್ ಜಾ, 44 ತುಜ್ಯಾ ಭಾವಾಚೊ ರಾಗ್ ಥಂಡ್ ಹೊಯ್ ಪತರ್ಬಿ ಉಲ್ಲೆ ದಿಸ್ ಥೈಚ್ ರಾ, 45 ಮಿಯಾ ಕಶ್ಯಾಕ್ ತುಮ್ಕಾ ದೊಗ್ಯಾಕ್ನಿಬಿ ಕಳ್ದುನ್ ಘೆವ್ಚೆ? ತಸೆಹೊವ್ನ್ ತುಜ್ಯಾ ಭಾವಾಕ್ ತಿಯಾ ಕರಲೆ ಇಸ್ರುನ್ ಅಪ್ಲೊ ರಾಗ್ ಥಂಡ್ ಹೊಲ್ಲ್ಯಾ ತನ್ನಾ ಮಿಯಾ ತುಕಾ ಥೈತ್ನಾ ಬಲ್ವುನ್ ಘೆತಾ ಮಟ್ಲಿನ್.

ಇಸಾಕಾನ್ ಜಾಕೊಬ್ ಲಾಬಾನಾಕ್ಡೆ ಧಾಡುನ್ ದಿಲ್ಲೆ

46 ಮಾನಾ ರೆಬೆಕ್ಕಾನ್ ಇಸಾಕಾಕ್, ಹಿತ್ತಿಯಾಂಚ್ಯಾ ಚೆಡ್ವಾಂಚ್ಯಾ ವೈನಾ ಬೆಜಾರ್ ಹೊಲಾ, ಜಾಕೊಬಾನ್ಬಿ ಹ್ಯಾ ಗಾಂವ್ಚೆ ಚೆಡು ಎಚುನ್ ಘೆವ್ನ್ ಹಿತ್ತಿಯಾಂಚೆ ಚೆಡು ಲಗಿನ್ ಹೊಲ್ಯಾರ್ ಮಿಯಾ ಜಿವಾನ್ ಹೊತ್ತೆ ಕಾಯ್ಬಿ ಉಪ್ಪೆಕಾಕ್ ಯೆಯ್ನಾ, ಮಟ್ಲಿನ್.