Gênesis 3

ಮಾನುಸ್ ಖಾಲ್ತಿ ಹೊವ್ನ್ ಚಲಿನಸಲ್ಲೆ

1 ಸರ್ವೆಸ್ಪರ್ ದೆವಾನ್ ರಚಲ್ಯಾ ಸಗ್ಳ್ಯಾ ಜನಾವರಾತ್ನಿ ಸಾಪ್ ಲೈ ಉಶಾರ್ ಹೊತ್ತೊ, ಸಾಪಾನ್ ತಿಕಾ: ದೆವಾನ್ ಮ್ಹಳ್ಯಾತ್ಲ್ಯಾ ಖಲ್ಯಾ ಝಾಡಾಚೆ ಫಳ್ ತುಮಿ ಖಾವ್ನ್ ನ್ಹಯ್ ಮನುನ್ ಸಾಂಗಲೆ ಖರೆ ಕಾಯ್? ಮನುನ್ ಇಚಾರ್‍ಲ್ಯಾನಿ.

2 ತನ್ನಾ ತ್ಯಾ ಬಾಯ್ಕೊಮನ್ಸಿನ್ ತ್ಯಾ ಸಾಪಾಕ್ ಜಾಬ್ ದಿವ್ನ್, "ಮಳಾತ್ಲ್ಯಾ ಸಗ್ಳ್ಯಾ ಝಾಡಾಂಚಿ ಫಳಾ ಖಾಲ್ಯಾರ್ ಹೊತಾ, 3 ಖರೆ ಮ್ಹಳ್ಯಾತ್ಲ್ಯಾ ಮದ್ದಿ ಹೊತ್ತ್ಯಾ ಝಾಡಾಚ್ಯಾ ಫಳಾಂಚ್ಯಾ ವಿಶಯಾತ್ ದೆವಾನ್ ಅಮ್ಕಾ ತೆ ತುಮಿ ಖಾವ್ಚೆಬಿ ನೈ ಅನಿ ಅಪ್ಡುಬಿ ನೈ, ತೆ ತುಮಿ ಖಾಲ್ಯಾರ್ ಮರ್‍ತ್ಯಾಸಿ" ಮನುನ್ ಸಾಂಗ್ಲಾ ಮಟ್ಲಿನ್. 4 ತನ್ನಾ ಸಾಪಾನ್ ತ್ಯಾ ಬಾಯ್ಕೊಮಾನ್ಸಿಕ್; ತೆ ಖರೆ ನೈ ತುಮಿ ಮರಿನ್ಯಾಸಿ. 5 ಕನ್ನಾ ತುಮಿ ತ್ಯಾ ಝಾಡಾಚೆ ಫಳ್ ಖಾತ್ಯಾಸಿ ತುಮ್ಚೆ ಡೊಳೆ ಉಗಡ್ತಾತ್. ಅನಿ ತುಮಿ ದೆವಾಚ್ಯಾ ಸಾರ್ಕೆ ಹೊತ್ಯಾಸಿ. ಬರೆ ವೈಟ್ ಒಳ್ಕುನ್ ಘೆತ್ಯಾಸಿ ಮನ್ತಲೆ ದೆವಾಕ್ ಗೊತ್ತ್ ಹಾಯ್ ಮಟ್ಲ್ಯಾನ್. 6 ತನ್ನಾ ಬಾಯ್ಕೊಮನ್ಸಿಕ್ ತೆ ಝಾಡಾಚೆ ಫಳ್ ಬಗುಕ್ ಖಾವ್ಕ್ ಅನಿ ಅಕ್ಕಲ್ ಯೆವ್ಕ್ ಲೈ ಬರೆ ರಾವ್ಕ್ ಫಿರೆ ಮನುನ್ ಯೆವ್ಜುನ್ ತಿನೆ ಝಾಡಾಚೆ ಫಳ್ ಕಾಡುನ್ ಖಾಲಿನ್; ಅನಿ ಅಪ್ನಾಚ್ಯಾ ವಾಂಗ್ಡಾ ಹೊತ್ತ್ಯಾ ಘವಾಕ್ಬಿ ದಿಲಿನ್ ತೆನಿಬಿ ತೆ ಖಾಲ್ಯಾನ್. 7 ತನ್ನಾಚ್ ತೆಂಚೆ ದೊಗ್ಯಾಂಚೆ ಡೊಳೆ ಉಗಡ್ಲೆ, ತೆನಿ ನಾಗ್ಡೆ ಹೊತ್ತೆ ತೆಂಕಾ ಕಳ್ಳೆ, ಅಂಜುರಾಚ್ಯಾ ಝಾಡ್ಯಾಚಿ ಪಾನಾ ಎಕಾಕ್ ಎಕ್ ಜೊಡ್ಸುನ್ ಅಪ್ಲೆ ಆಂಗ್ ಧಾಪುನ್ ಘೆಟ್ಲ್ಯಾನಿ. 8 ತ್ಯಾ ದಿಸಿ ಸಾಂಚೆರ್ ಸರ್ವೆಸ್ಪರ್ ದೆವ್ ಮ್ಹಳ್ಯಾತ್ ಥಂಡ್ ವಾರ್ಯಾಕ್ ಫಿರುನ್ಗೆತ್ ಹೊತ್ತೊ, ಪಾಯಾಚೊ ಆವಾಜ್ ತೆಂಕಾ ಆಯ್ಕುನ್ ಅನಿ ದೆವ್ ಬಾಬಾಕ್ ದಿಸುಚೆ ನ್ಹಯ್ ಮನುನ್ ಮ್ಹಳ್ಯಾತ್ಲ್ಯಾ ಝಾಡಾಂಚ್ಯಾ ಮದ್ದಿ ನಿಪ್ಲ್ಯಾನಿ. 9 ತನ್ನಾ ಸರ್ವೆಸ್ಪರ್ ದೆವಾನ್ ತೆಕಾ: ತಿಯಾ ಖೈ ಹಾಸ್ ? ಮನುನ್ ಇಚಾರ್‍ಲ್ಯಾನಿ. 10 ತನ್ನಾ ತೆನಿ ಜಾಬ್ ದಿವ್ನ್: "ತಿಯಾ ಮ್ಹಳ್ಯಾತ್ ಚಲ್ತಲೊ ತುಜೊ ಆವಾಜ್ ಆಯ್ಕಲೊ ತನ್ನಾ ಮಿಯಾ ನಾಗ್ಡೊ ಹಾಯ್ ಮನುನ್ ಭಿಂವ್ನ್ ನಿಪ್ಲೊ" ಮಟ್ಲ್ಯಾನ್. 11 ತನ್ನಾ ಸರ್ವೆಸ್ಪರ್ ದೆವಾನ್ ತೆಕಾ "ತಿಯಾ ನಾಗ್ಡೊ ಹಾಸ್ ಮನುನ್ ತುಕಾ ಕೊನಿ ಸಾಂಗ್ಲೆ? ಮಿಯಾ ತುಕಾ ಖಾವ್ ನಕ್ಕೊ ಮನುನ್ ಸಾಂಗಲ್ಯಾ ಝಾಡಾಚೆ ಫಳ್ ಖಾಲೆ ಕಾಯ್?" ಮನುನ್ ಇಚಾರ್‍ಲ್ಯಾನಿ. 12 ತನ್ನಾ ತ್ಯಾ ಘವ್ಮಾನ್ಸಾನ್, "ಮಾಜ್ಯಾ ವಾಂಗ್ಡಾ ತಿಯಾ ದಿಲ್ಲ್ಯಾ ತ್ಯಾ ಬಾಯ್ಕೊ ಮಾನ್ಸಿನ್ ತ್ಯಾ ಝಾಡಾಚೆ ಫಳ್ ಮಾಕಾ ದಿಲಿನ್ ಅನಿ ಮಿಯಾ ತೆ ಖಾಲೊ". 13 ತನ್ನಾ ಸರ್ವೆಸ್ಪರ್ ದೆವಾನ್ ಬಾಯ್ಕೊಮನ್ಸಿಕ್ ಇಚಾರ್‍ಲ್ಯಾನಿ: "ಹೆ ತಿಯಾ ಅಸೆ ಕಾಯ್ ಕರ್‍ಲೆ?" ತನ್ನಾ ತಿನಿ "ಸಾಪಾನ್ ಮಾಕಾ ಪಸ್ವುಲ್ಯಾನ್ ತನ್ನಾ ಮಿಯಾ ಖಾಲೊ ಮಟ್ಲಿನ್".

ದೆವಾಚೆ ನ್ಯಾಯ್ ನಿರ್ನಯ್

14 ತನ್ನಾ ಸರ್ವೆಸ್ಪರ್ ದೆವಾನ್ ಸಾಪಾಕ್ ಸಾಂಗ್ಲ್ಯಾನ್, ತಿಯಾ ಅಸೆ ಬುರ್ಸೆ ಕಾಮ್ ಕರಲ್ಯಾಕ್ ಸಗ್ಳ್ಯಾ ಜನಾವರಾಂಚ್ಯಾನ್ಕಿ ತಿಯಾ ಲೈ ಶಾಪ್ ಗ್ರಸ್ತ್ ಹೊತೈ, ತಿಯಾ ಪೊಟಾನಿ ಚಲುಚೊ ಅನಿ ಜಿವನ್ ಫುರಾ ಮಾಟ್ಟಿಚ್ ಚಾಟುಚೊ. 15 ಅನಿ ತುಜ್ಯಾ ಅನಿ ಬಾಯ್ಕೊಮನ್ಸಿಚ್ಯಾ ಮದ್ದಿ, ತುಜ್ಯಾ ಅನಿ ತಿಚ್ಯಾ ಪಿಳ್ಗಿಚ್ಯಾ ಮದ್ದಿ ವಿರೊಧ್ ಹಾನುನ್ ಥವ್ತಾ, ಅನಿ ತಿಯಾ ತಿಚ್ಯಾ ಲೆಕಾಚೆ ಪಾಯಾಚಿ ಖೊಟಾಕ್ ಚಾವತೈ ಅನಿ ತೊ ತುಜೆ ಟಕ್ಲೆ ಝೆಜ್ರುನ್ ಟಾಕ್ತಾ ಮಟ್ಲ್ಯಾನ್. 16 ಸರ್ವೆಸ್ಪರ್ ದೆವಾನ್ ಬಾಯ್ಕೊಮಾನ್ಸಿಕ್: ತಿಯಾ ಪೊಟಾನ್ ರ್‍ಹಾತಾನಾ ಲೈ ತರಾಸ್ ಕರುನ್ ಘೆತೈ, ತಿಯಾ ಪೊರಾಕ್ನಿ ಜಲಮ್ ದಿತಾನಾ ಲೈ ತರಾಸ್ ಹೊತಾ, ಅನಿ ತಿಯಾ ತುಜ್ಯಾ ಘವಾಚ್ಯಾ ವರ್‍ತಿ ಆಶ್ಯಾ ಕರ್‍ತೆ ಅನಿ ತೊ ತುಜ್ಯಾ ವರ್‍ತಿ ಹಕ್ಕ್ ಚಾಲ್ವುತಾ. 17 ಮಾನಾ ಸರ್ವೆಸ್ಪರಾನ್ ಘೊಮಾನ್ಸಾಕ್; ತಿಯಾ ತುಜ್ಯಾ ಬಾಯ್ಕೊಚಿ ಗೊಸ್ಟ್ ಆಯ್ಕುನ್ ಮಿಯಾ ತುಕಾ ಖಾವ್ಕ್ ನಕ್ಕೊ ಮಟಲ್ಯಾ ಝಾಡಾಚೆ ಫಳ್ ತಿಯಾ ಖಾಲೈ, ಮನುನ್ ತುಜ್ಯಾ ಕರ್‍ನ್ಯಾಕ್ ಲಾಗುನ್ ಜಿಮಿನ್ ಶರಾಪಾಚ್ಯಾ ಅಧಿನಾತ್ ರ್‍ಹಾತಾ, ತೆಚ್ಯಾ ವೈನಾ ಜಿವನಾತ ಫುರಾ ಕಸ್ಟ್ ಕರುನ್ ಘೊಳುನ್ ತಿಯಾ ತುಜೆ ಪೊಟ್ ಭರುನ್ ಘೆವ್ಚೆ. 18 ಅನಿ ತುಜ್ಯಾ ಸಾಟ್ನಿ ಜಿಮ್ನಿ ವರ್‍ತಿ ಕಾಟೆ ಅನಿ ಕಳೆ ಉಗಾವ್ತಾ, ಅನಿ ತಿಯಾ ಸೆತಾಚಿ ಫಿಕುಚ್ ಖಾತೈ. 19 ಮಾಟಿಕ್ನಾ ಯೆಲ್ಲೊ ತಿಯಾ ಪರ್‍ತುನ್ ಮಾಟಿಕ್ ಜಾಯ್ ಪತರ್ ತರಾಸಾನ್ ಘಾಮ್ ಗಳ್ವುನ್ ಜಿಮ್ನಿ ವರ್‍ತಿ ಸೆತ್ ಕರುನ್ ಫಿಕ್ ಕಾಡುಚೊ ಅನಿ ಮಾಟಿಕ್ನಾ ರಚಲ್ಲ್ಯಾ ತುಕಾ ಪರ್‍ತುನ್ ಮಾಟಿತುಚ್ ಘಾಲುಚೆ 20 ಅನಿ ಆದಾಮಾನ್ ಅಪ್ಲ್ಯಾ ಬಾಯ್ಕೊಕ್ ಎವ್ವಾ ಮನುನ್ ನಾವ್ ಥವ್ಲ್ಯಾನ್, ಕಶ್ಯಾಕ್ ಮಟ್ಲ್ಯಾರ್ ಹ್ಯಾ ಸಗ್ಳ್ಯಾ ಮಾನ್ಸಾಚ್ಯಾ ಜಾತಿಕ್ ಮುಳಾಚಿ ಬಾಯ್ ತಿ. 21 ಮಾನಾ ಸರ್ವೆಸ್ಪರ್ ದೆವಾನ್ ಆದಾಮಾಕ್ ಅನಿ ತೆಚ್ಯಾ ಬಾಯ್ಕೊಕ್ ಜನಾವಾರಾಂಚ್ಯಾ ಚಮ್ಡ್ಯಾಚೆ ಕಪ್ಡೆ ಕರುನ್ ನೆಸ್ವುಲ್ಯಾನ್. 22 ದೆವ್ ಬಾಬಾನ್ "ಮಾನುಸ್ ಅತ್ತಾ ಬರೆ ಅನಿ ವಾಯ್ಟಾಚ್ಯಾ ವಿಶಯಾತ್ ಕಳ್ವುನ್ ಘೆವ್ನ್ ಅಮ್ಚ್ಯಾ ಸಾರ್ಕೊ ಹೊಲೊ, ಅತ್ತಾ ಮಾನುಸ್ ಜಿವದಾಯಕ್ ಝಾಡಾಚಿ ಫಳ್ ಕಾಯ್ಬಿ ಖಾಲ್ಯಾರ್ ತೊ ಕನ್ನಾಬಿ ಜಿವಿತ್ ರ್‍ಹಾತಾ" ಮನುನ್ ಘೆಟ್ಲ್ಯಾನ್. 23 ತೆಚ್ಯಾ ಮನಾ ದೆವ್ ಬಾಬಾನ್ ತೆಂಕಾ ಮ್ಹಳ್ಯಾತ್ನಾ ಭಾಯ್ರ್ ಘಾಟ್ಲ್ಯಾನ್, ಅನಿ ದೆವಾನ್ ರಚಲ್ಯಾ ಜಿಮ್ನಿರ್ ಸೆತ್ ಭಾತ್ ಕರುಕ್ ಮನುನ್ ತೆಕಾ ಧಾಡ್ಲ್ಯಾನ್. 24 ಅಸೆ ದೆವಾನ್ ಮಾನ್ಸಾಕ್ ಭಾಯ್ರ್ ಘಾಲುನ್ ಜಿವನ್ ದಿತಲ್ಯಾ ಫಳಾಚ್ಯಾ ಝಾಡಾಕ್ಡೆ ಕೊನ್ಬಿ ಯೆವ್ ನೈ ಮನುನ್ ಥೈ ರಾಕುಕ್ ಕೆರುಬಿ ಧುತಾಕ್ನಿ ಅನಿ ಪೆಟ್ತಲೊ ಥಲ್ವಾರ್ ದಿಸ್ ಉಗಾವ್ತಲ್ಯಾ ದಿಕ್ಕಾಕ್ ಥವ್ಲ್ಯಾನ್.