Gênesis 38

ತಾಮಾರಾ ಅನಿ ಜುದ್

1 ತ್ಯಾ ಎಳಾರ್ ಜೆಹುದ್ ಅಪ್ಲ್ಯಾ ಭಾವಾಕ್ನಿ ಸೊಡುನ್ ಅದುಲ್ಲಾಮ್ ಮನ್ತಲ್ಯಾ ಗಾಂವಾತ್ ಹೊತ್ತ್ಯಾ ಹಿರಾಚ್ಯಾ ಘರ್‍ಹಾತ್ ವಸ್ತಿ ಹೊತ್ತೊ. 2 ಜೆಹುದ್ ಕಾನಾನ್ ದೆಶ್ಯಾಚ್ಯಾ ಶುಗಾಚ್ಯಾ ಲೆಕಿಕ್ ಭೆಟುನ್ ತಿಕಾ ಲಗಿನ್ ಹೊವ್ನ್ ತಿಚೆಕ್ಡೆ ಗೆಲೊ. 3 ಅನಿ ತಿನಿ ಎಕ್ ಲೆಕಾಕ್ ಜಲಮ್ ದಿಲಿನ್ ಜುದಾನ್ ತೆಕಾ ಎರ್ ಮನುನ್ ನಾವ್ ಥವ್ಲ್ಯಾನ್. 4 ಮಾನಾ ತಿ ಅನಿ ಬಿ ಪೊಟಾನ್ ರ್‍ಹಾವ್ನ್ ಎಕ್ ಲೆಕಾಕ್ ಜಲಮ್ ದಿವ್ನ್ ತೆಕಾ ಒನಾನ್ ಮನುನ್ ನಾವ್ ಥವ್ಲಿನ್. 5 ಅನಿಬಿ ತಿಕಾ ಎಕ್ ಲೆಕ್ ಉಪಾಜ್ತಾ, ತೆಚೆ ನಾವ್ ಶೆಲಾ, ತೊ ಲೆಕ್ ಜಲಮ್ತಲ್ಯಾ ಎಳಾರ್ ಜುದಾ ಕೆಜಿಬಾತ್ ವಸ್ತಿ ಹೊತ್ತೊ.

6 ಮಾನಾ ಜೆಹುದಾನ್ ಅಪ್ಲೊ ಥೊರ್ಲೊ ಲೆಕ್ ಎರಾನಾಕ್ ತಾಮರ್ ಮನ್ತಲ್ಯಾ ನಾಂವಾಚೆ ಚೆಡು ಹಾನುನ್ ಬಾಯ್ಕೊ ಕರ್ಲ್ಯಾನ್. 7 ಖರೆ ಜೆಹುದಾಚೊ ಥೊರ್ಲೊ ಲೆಕ್ ಎರಾಚಿ ಚಾಲ್ ಬರಿ ನತ್ತಿ, ಅನಿ ಸರ್ವೆಸ್ಪರ್ ದೆವಾನ್ ತೊ ಕರ್‍ತಲ್ಯಾ ಬುರ್ಶಾ ಕಾಮಾಂಚ್ಯಾ ವೈನಾ ತೆಕಾ ಜಿವಾನಿ ಮಾರ್‍ಲ್ಯಾನ್.

8 ಮಾನಾ ಜುದಾನಾನ್ ಎರಾಚೊ ಭಾವ್ ಒನಾನಾಕ್: "ತಿಯಾ ತುಜ್ಯಾ ಭಾವಾಚ್ಯಾ ಘವ್ಮರಲ್ಯಾ ಬಾಯ್ಕೊ ವಾಂಗ್ಡಾ ಮಿಳ್, ಅನಿ ತುಜ್ಯಾ ಭಾವಾಚಿ ಪಿಳ್ಗಿ ವಾಡುಕ್ ಕಾರನ್ ಹೊ" ಮಟ್ಲ್ಯಾನ್. 9 ಖರೆ ಒನಾನ್ ಭಾವಾಚ್ಯಾ ಬಾಯ್ಕೊ ವಾಂಗ್ಡಾ ಮಿಳ್ತಾನಾ, ತಿ ಪಿಳ್ಗಿ ಅಪ್ಲಿ ಹೊಯ್ನಾ ಮನುನ್ ಕಳುನ್ ಮಾಜ್ಯಾ ಭಾವಾಚಿ ಪಿಳ್ಗಿ ಹೊತಲಿ ನಕ್ಕೊ ಮನುನ್ ಹಾತ್ರಾನ್ ರಾಡ್ ಕರ್ಲ್ಯಾನ್.

10 ತೆಚ್ಯಾ ವೈನಾ ಸರ್ವೆಸ್ಪರ್ ದೆವಾಕ್ ತೆಚಿ ಚಾಲ್ ಬರಿ ದಿಸುಕ್ನಾ ಅನಿ ತೆಕಾಬಿ ಜಿವಾನಿ ಮಾರ್‍ಲ್ಯಾನ್. 11 ತಸೆ ರ್‍ಹಾತಾನಾ ಜುದಾನ್ ಎಕ್ ಎಳಾ ಮಾಜೊ ಲೆಕ್ ಶೆಲಾಕ್ ಮಿಯಾ ಸುನ್ನೆ ವಾಂಗ್ಡಾ ಧಾಡ್ಲ್ಯಾರ್ ತೊಬಿ ಭಾವಾಂಚ್ಯಾ ಗತಿನ್ ಮರುನ್ ಜಾಯ್ಲ್ ಮನುನ್ ಚಿಂತುನ್, ಅಪ್ಲ್ಯಾ ಸುನ್ನ್ ತಾಮಾರಾಕ್ ಮಾಜೊ ಲೆಕ್ ಶೆಲಾ ಅಜುನ್ ಬಾರಿಕ್ ಹಾಯ್ ತೊ ಮೊಟೊ ಹೊಯ್ ಪತರ್ ತಿಯಾ ತುಜ್ಯಾ ಮ್ಹಾಯೆರಾಕ್ ಜಾವ್ನ್ ರಾ, ಮಟ್ಲ್ಯಾನ್ ಅನಿ ತಾಮಾರಾ ಗೆಲಿ.

12 ಉಲ್ಲಿ ದಿಸಾ ಹೊಲ್ಲ್ಯಾ ಮಾನಾ ಜುದಾಸಾಚಿ ಬಾಯ್ಕೊ ಶುಗಾಚಿ ಲೆಕ್ ಮರುನ್ ಗೆಲಿ, ದುಕ್ಕೆಚೊ ಎಳ್ ಕಳದಲ್ಲ್ಯಾ ಮಾನಾ ಅದುಲ್ಲಾಮ್ ಶಹರಾಚ್ಯಾ ಹಿರಾ ವಾಂಗ್ಡಾ ತಿಮ್ನಾತ್ ಬಕ್ರಿಯಾಂಚಿ ಕೆಸಾ ಕಾತ್ರುಕ್ ಗೆಲೊ. 13 ತಾಮಾರಾಕ್ ಅಪ್ಲೊ ಮಾಮಾ ಬಕ್ರಿಯಾಂಚಿ ಕೆಸಾ ಕಾತ್ರುಕ್ ತಿಮ್ನಾ ಗಾಂವಾಕ್ ಗೆಲಾ ಮನ್ತಲಿ ಖಬರ್ ಕಳ್ತಾ. 14 ಅನಿ ತಿಕಾ ಜುದಾಚೊ ಲೆಕ್ ಶೆಲಾ ದಾಂಡ್ಗೊ ಹೊಲ್ಯಾರ್ಬಿ ಅಪ್ನಾಕ್ ಲಗಿನ್ ಕರುನ್ ದಿವ್ಕ್ನಾ, ಮನುನ್ ತಿ ಅಪ್ಲಿ ವಿದವಾಚೆ ಕಪ್ಡೆ ಬದ್ಲುನ್ ದುಸ್ರೆ ಕಪ್ಡೆ ನೆಸುನ್ ಘೆವ್ನ್, ಪದ್ರಾನಿ ಟಕ್ಲೆ ತೊಂಡ್ ಧಾಪುನ್ಗೆವ್ನ್ , ತಿಮ್ನಾ ಗಾಂವಾಚ್ಯಾ ವಾಟೆ ಕ್ ಹೊತ್ತ್ಯಾ ಎನೆಮ್ ದಡ್ಪ್ಯಾಕ್ಡೆ ಬಸಲ್ಲಿ ರ್‍ಹಾತಾ.

15 ಮಾನಾ ಜುದಾಸ್ ತಿಕಾ ಬಗ್ತಾನಾ ತೊಂಡಾರ್ ಪದರ್ ಧಾಪಲ್ಲೆ ಬಗುನ್ ತಿ ಸುಳಿ ಮನುನ್ ಚಿಂತುನ್, 16 ತಿ ತೆಚಿ ಸುನ್ನ್ ಮನುನ್ ಕಳಿನಸ್ತಾನಾ ತೊ ವಾಟೆರ್ ತಿಕಾ ಮಿಯಾ ತುಜ್ಯಾ ವಾಂಗ್ಡಾ ನಿಜ್ತಾ , ಖರೆ ತಿಯಾ ಮಾಕಾ ಕಾಯ್ ದಿತೈ?

17 ತನ್ನಾ ಜುದಾಸಾನ್, "ಮಾಜ್ಯಾ ತಾಂಡ್ಯಾತ್ಲೆ ಎಕ್ ಬಕ್ರ್ಯಾಚೊ ಪೆಟೊ ಧಾಡುನ್ ದಿತಾ" ಮನುನ್ ಸಾಂಗ್ಲ್ಯಾನ್, ಮಾನಾ ತಿನಿ," ಹೊಲೆ ಅನಿ ತಿಯಾ ಬಕ್ರ್ಯಾಚೊ ಪೆಟೊ ಹಾನುನ್ ದಿಯ್ ಪತರ್ ಮಾಜಾಕ್ಡೆ ಕಾಯ್ಬಿ ಆಡು ಥವ್ತೆಯ್?" ಮಟ್ಲಿನ್.

18 ತನ್ನಾ ತೆನಿ ತಿಕಾ, "ಮಿಯಾ ಕಾಯ್ ಆಡು ಥವ್ಚೆ?" ಮಟ್ಲ್ಯಾನ್, ತನ್ನಾ ತಿನಿ ತುಜೊ ಛಪ್ಪ್ಯಾಚಿ ಮುದ್ದಿ, ಕಂಬ್ರೆಚೊ ನಾಡೊ ಅನಿ, ತಿಯಾ ಹಾತಿತ್ಲೊ ಧಾಂಡೊ ಥವ್ ಮಟ್ಲಿನ್ ತೆನಿ ತೆ ಸಗ್ಳೆ ತಿಕಾ ದಿವ್ನ್ ತಿಚ್ಯಾ ವಾಂಗ್ಡಾ ಮಿಳ್ಳೊ, ಅನಿ ತಿ ಪೊಟಾನ್ ರಾಲಿ.

19 ಮಾನಾ ತಾಮರಾ ಘರಾಕ್ ಜಾವ್ನ್ ಅಪ್ಲೆ ವಿಧವಾಚೆ ಕಪ್ಡೆ ನೆಸುನ್ ಘೆಟ್ಲಿನ್.

20 ಮಾನಾ ಗೊಸ್ಟ್ ದಿಲ್ಲ್ಯಾ ಸಾರ್ಕೆ ಜುದಾಸಾನ್ ಅಪ್ನಾಚ್ಯಾ ಹಿರಾ ಮನ್ತಲ್ಯಾ ದೊಸ್ತಾಕ್ಡೆ ಎಕ್ ಬಕ್ರ್ಯಾಚೊ ಪೆಟೊ ದಿವ್ನ್ ತಿಯಾ ಮಾಜಿ ವಸ್ತಾ ಸೊಡ್ಸುನ್ ಹಾನ್ ಮಟ್ಲ್ಯಾನ್, ಖರೆ ಹಿರಾಕ್ ತಿಜಿ ಒಳಕ್ ದರುಕ್ ಹೊವ್ಕ್ನಾ. 21 ಮಾನಾ ತೊ ಜಾತಾನಾ ಎನಾಯಿಮಾತ್ ರ್‍ಹಾತಲ್ಯಾ ಘೊಮಾನ್ಸಾಕ್ನಿ, "ಹಿತ್ತೆ ವಾಟೆರ್ ವರ್‍ತಿ ಸುಳಿ ಖೈ ಹಾಯ್?" ಮನುನ್ ಇಚಾರ್‍ಲ್ಯಾನಿ, ತನ್ನಾ ತೆನಿ ತೆಕಾ, ಹಿತ್ತೆ ತಸ್ಲಿ ಬಾಯ್ಕೊಮಾನುಸ್ ಕೊನ್ಬಿ ನಾ, ಮನುನ್ ಸಾಂಗ್ಲ್ಯಾನಿ.

22 ತೊ ಜುದಾಕ್ಡೆ ಪರ್‍ತುನ್ ಯೆವ್ನ್, "ಮಾಜ್ಯಾನ್ ತ್ಯಾ ಬಾಯ್ಕೊ ಮಾನ್ಸಿಕ್ ಒಳ್ಕುಕ್ ಹೊವ್ಕ್ ನಾ, ಅನಿ ಥೈ ರ್‍ಹಾತಲ್ಯಾ ಘೊಮಾನ್ಸಾಚ್ಯಾಂಕ್ಡೆ ಇಚಾರ್ಲೊ ತನ್ನಾ ತೆನಿಬಿ ಹಿತ್ತೆ ತಸ್ಲೆ ಕೊನ್ ನಾತ್ ಮಟ್ಲ್ಯಾನಿ." ಮನುನ್ ಸಾಂಗ್ಲ್ಯಾನ್.

23 ಮಾನಾ ತೆಕಾ ಜುದಾಸಾನ್, ಲೊಕಾ ಅಮ್ಕಾ ಬಗುನ್ ಹಾಸ್ತಲೆ ಬರೆ ದಿಸಿನಾ, ಖರೆ ಮಿಯಾ ತಿಕಾ ಬಕ್ರ್ಯಾಂಚೊ ಪೆಟೊ ದಿವ್ಚೆ ಮನುನ್ ಕರಲ್ಲೊ, ಅನಿ ತಿ ಮಾಕಾ ಗಾವ್ಕ್ ನಾ, ತಿ ಮಾಜಿ ಸಾಮಾನಾ ತಿಚೆಕ್ಡೆಚ್ ಥವ್ನ್ ಗೆವಂದಿತ್ ಮಟ್ಲ್ಯಾನ್.

24 ತಿನ್ ಮ್ಹಯಿನೆ ಕಳದಲ್ಲ್ಯಾ ಮಾನಾ ಎಕ್ಲ್ಯಾನ್ ಜುದೆವಾಕಾಕ್ಡೆ ಯೆವ್ನ್, "ತುಜಿ ಸುನ್ನ್ ತಾಮಾರಾ ಬುರ್ಸೆ ಕಾಮ್ ಕರುನ್ ಪೊಟಾನಿ ಹಾಯ್ " ಮಟ್ಲ್ಯಾನ್, ತನ್ನಾ ಜುದಾಸಾನ್, "ತಿಕಾ ವೊಡುನ್ ಭಾಯ್ರ್ ಹಾನುನ್ ಜಾಳ್ವುನ್ ಜಿವ್ ಕಾಡಾ" ಮನುನ್ ಸಾಂಗ್ಲ್ಯಾನ್.

25 ಮಾನಾ ತಿಕಾ ವೊಡುನ್ ಹಾನುಕ್ ಗೆಲ್ಲ್ಯಾಂಚ್ಯಾಕ್ಡೆ ತಿನಿ ಮಾಜಾಕ್ಡೆ ಹೊತ್ತಿ ಹಿ ಸಾಮಾನಾ ಸಗ್ಳಿ ಬಗಾ! ಹ್ಯೊ ಛಪ್ಪೊ, ದೊರೊ, ಅನಿ ದಾಂಡೊ ಹೆ ಸಗ್ಳೆ ಕೊನಾಚೆ ಹಾಯ್ ತ್ಯಾಚ್ ಮಾನ್ಸಾಕ್ನಾ ಮಿಯಾ ಪೊಟಾನ್ ಹಾಯ್, ಮನುನ್ ಅಪ್ಲ್ಯಾ ಮಾಮಾಕ್ ಸಾಂಗುನ್ ಧಾಡ್ಲಿನ್.

26 ತನ್ನಾ ಜುದೆವಾನ್ ತಿ ವಸ್ತಾ ಸಗ್ಳಿ ಒಳ್ಕುನ್, "ತಿನಿ ಕಾಯ್ ಚುಕ್ ಕರುಕ್ ನಾ, ಮಿಯಾ ತಿಕಾ ಗೊಸ್ಟ್ ದಿಲ್ಲ್ಯಾ ಸಾರ್ಕೆ ಮಾಜ್ಯಾ ಲೆಕ್ ಶೆಲಾಕ್ ಲಗಿನ್ ಕರುನ್ ದಿವ್ಕ್ ನಾ, ಖರೆ ಲಗಿನ್ ಕರುನ್ ದಿವ್ಕ್ ನಸ್ತಾನಾ ಮಿಯಾಚ್ ಚುಕ್ ಕರ್ಲಾ," ಮಟ್ಲ್ಯಾನ್, ಅನಿ ಪರ್‍ತುನ್ ಜುದಾಸಾನ್ ತಿಚ್ಯಾ ವಾಂಗ್ಡಾ ತಸ್ಲೆ ಕಾಮ್ ಕರುಕ್ನಾ.

27 ಮಾನಾ ತಾಮಾರಕ್ ಪೊರಾಕ್ನಿ ಜಲಮ್ ದಿತಲೊ ಎಳ್ ಯೆಲೊ, ಅನಿ ತಿಕಾ ಅವ್ಳಿ ಜವ್ಳಿ ಲೆಕಾ ಹಾತ್ ಮನುನ್ ಕಳ್ಳೆ. 28 ಮಾನಾ ತಿ ಪೊರಾ ಉಪಾಜ್ತಾನಾ, ಎಕ್ ಪೊರಾನ್ ಅಪ್ನಾಚೊ ಹಾತ್ ಫಿಡೆ ಕರ್ತಾನಾ, ತೆಚ್ಯಾ ಹಾತಿಕ್ ಸುಯಿನಿನ್ ಪೈಲೆಚೊ ಪೊರ್ ಮನುನ್ ತಾಂಬ್ಡ್ಯಾ ದೊರ್ಯಾನ್ ಭಾಂದ್ಲಿನ್. 29 ಖರೆ ತ್ಯಾ ಪೊರಾನ್ ಅಪ್ಲೊ ಹಾತ್ ಫಾಟಿ ಒಡುನ್ ಘೆಟ್ಲ್ಯಾನ್, ಅನಿ ತೆಜೊ ಭಾವ್ ಅದ್ದಿ ಜಲಮ್ಲೊ, ತೆಚ್ಯಾ ವೈನಾ ಸುಯಿನಿನ್ ತ್ಯಾ ಪೊರಾಕ್ , ತಿಯಾ ಅದ್ದಿ ಜಲಮಲ್ಲ್ಯಾ ಪೊರಾಕ್ ಫಾಟಿ ಡಕ್ಲುನ್ ಯೆಲೈ ಮನುನ್ ತೆಕಾ "ಪೆರೆಚ್" ಮನುನ್ ನಾವ್ ಥವ್ಲಿನ್. 30 ಮಾನಾ ತೆಜೊ ಭಾವ್ ಹಾತಿಕ್ ತಾಂಬ್ಡೊ ದೊರೊ ಭಾಂದಲ್ಲೊ ಘೆವ್ನ್ ಜಲಮ್ಲೊ, ಮಾನಾ ತೆನಿ ತೆಕಾ "ಜೆರಹ್" ಮನುನ್ ನಾವ್ ಥವ್ಲ್ಯಾನಿ.