1 Babilon te asekuh lante Amoz ccapaw Isaiah nynh Pachia kyate yn thuapaw a thaepaw bya tuh hynhte nynh thua.✝

2 Mua otung vawlan khe

rhawtuknaw alan kha sae oh lah,

thawte sia oh; apuathopaw

khuapi koikua lungkhu lang

tee khylan nae kuih kha hepah oh.

3 Ka thyaasahpaw ccungccaw hae kha

kamaw ccaccei nynh kaw ka pya vae hae,

ka thinrianaw kha daesah khylan

ka lesaenaw liate mih lungtuapaw

ka rhawkaw hae kha ka pum vae hae.

4 Ccungccaw patae roi hawte,

mua vawlan e ngaluin-ngaluin ccaepaw

roi tuh ngaetua oh! Peenaw ram hae te

pynkheihlan a sueluakuh hae paw

minphuin hae roi tuh ngaetua oh!

Vaaw Bawipaw nynh rhawtuknaw hanlan

rhawkaw hae kha a paccynsaku hae.

5 Bawipaw amaw ryte a thinrianaw

zunghe hae tuh ram pynpi kha ro khylan

asawnaw ram, vaawlui adianaw kyate

oun thua hae.

6 Bawipaw nin anae vae keiccuze

rawkhuite um oh;

Athunghuapaw kyate yn thuapaw

ronaw hawte nynh yn thua cih.✝

7 Tukeiccuze ccungccaw kuih balyn tuh

a thawzya cih zah, ccungccaw miakaw

lungthangte a rih cih hae.

8 Teingnaw te riathaenaw a tung cih hae;

neitangia a ccihpaw nopi hawte

a teing cih hae. Lu kheit te lu kheit

rikute a dokuh cih hae zah,

mih maesue tuh maeesoi hawte athua cih.

9 Laephi kha ro khylan te

misei hae kha laephi kyate maemih khylan,

thawccikunaw a um leipaw

Bawipaw nin tuh

thinria bungpaw te yn thua cih.

10 Vaawlang awsi hae te aphuphute

um hae paw awsi hae tuh

aw vae lan khyh hae; khuanin tuh

he a thua vae ze amoh cih zah,

sawpaw mah aw vae lan khyh.✝

11 Laephipi kha a seinaw keiccu

de ka tah cih zah,

ccungccaw hoylei hae paw kha

mih hoyleinaw hanlan de ka tah cih;

a lysakuhpaw kya-e lysakunaw kha

ka zosah cih zah, a puatho hae paw te

rysawthah hae paw kha ka biabung cih hae.

12 Ccungccaw kha sui hoypaw laeze

ka khinsah hua cih zah,

Ofir sui laeze akhinpaw lang ka rae cih.

13 Tukeiccuze vaaw Bawipaw tuh

myarya a thinria nin khe,

vaawlui kha ka hysah cih zah,

laephi kha a umnaw kyate

ka nuesakuh cih.

14 Sawdepaw kyate a ccuepaw sakhi hawte thuasah,

a rintu um leipaw tuu hae hawte thuasah

mimaw minphuin hae kalan a hawi cih hae zah,

mimaw ram lang a ccue cih hae.

15 Muihpaw ccungccaw miakaw kha

thaloi te thuing athua cih zah,

kyngpaw ccungccaw miakaw tuh

thaloi te a chih cih.

16 Mih ccaaw hae kha mih muihnaw kyakhe

palae tui lan a noidepah cih hae;

mih inn kha a luade cih hae zah,

mih zu hae kha kyngdete a ikhaepah cih hae.

17 Dotua oh, Babilon hae kha dou khylan

ngun pawlangria lei hae paw te

sui a ry lei hae paw

Media* ccungccaw hae kha ka tuhou cih hae.

18 Mih the hae nynh ccangvae hae kha

a theih cih hae; nosi hae tungvaw

thawccinaw hoi lan khyh hae;

mih mit nynh imua hae kha

ngaethyaumsah lan khyh.

19 Ram hae kyaze a puithya huapaw thua zah,

Babilon hae kya-e huhan te

lunglekhaekuh lan umpaw Babilon tuh

Pachia nynh a ro hae paw

Sodom te Gomorrah hawte athua cih.✝

20 Babilon tuh ccungccaw nynh

kharouh a umnaw leipaw, she takyh

a umnaw lei vae hae paw athua cih;

Arab hae nynh tuin kya bu kha

sakkuh lan khyh hae,

tuurin hae nynh mih tuuphu hae kha

tuin kya tuukhia raepah lan khyh hae.

21 Tuin kyakhe loramsaw hae nynh

a um cih hae, mih inn tuh asiathyapaw

ahysuepaw hae te phe abeih cih;

kalauh pavaw hae tuh tuin kya

a um cih hae zah, sathaw hae tuh

tuin kya a law cih hae.✝

22 Ram-ui hae tuh rhawviainn kya

a sia cih hae zah, suizaw hae tuh

um ry a umnaw siapharan hae

inn kya a sia cih hae;

Babilon ccyh tuh myarya nae vae zah,

a she sae vae lan khyh.