1 Damaskas konglang Pachia nynh a hotypaw bya tuh:

Dotua, Damaskas khua tuh

khuapi thua vae lan khyh zah,

arohpaw apumkuhpaw lang a tang cih.✝

2 Siria ram e khua hae tuh

zungzae hanlan ccuetawsya athua cih hae,

tuu te vaetua a paeenaw hmin lang

a tang cih zah,

humhung nynh mah dee leite a rya cih hae.

3 Efraim tuh thungkhawtu

rhawlungrua hoi vae lan khyh zah,

Damaskas tuh ukkunaw kaw

hoi vae lan khyh;

a laehypaw Siria hae tuh

Israel hae phu-enaw

anaanpaw hawte athua cih hae,

cite vaaw Bawipaw nynh a ci.

4 Tuin nin khe Jakob phu-enaw tuh

azyabung cih zah,

tho leite a ngethah vae cih.

5 Te tuh-e tuh loohruetu hae nynh

a thadynpaw ccathae hae kha

suelua hae zah mih kuih te

a rue hae hawte thuasah,

Refaim Accya kya

ccamua rue hawte thuasah

athua cih.

6 Oliv ku kha hy vae ze,

aku dungpaccy umpaw ange kya

athae ccangning ccangthum laehy zah,

athae alungnaw akaran kyaze

athae ccangpali ccangpangaw a laehy hawte,

ccamua a laehy cih, cite

Israel Pachia Bawipaw nynh a ci.

7 Tuin nin khe ccungccaw hae nynh minmin a Raetupaw kha a peki cih hae zah, mih mit nynh Israel Pachia Athyaapaw kha a do cih; 8 mih kuih te a raeku hae paw silawhang kha pawlangria vae lan khyh hae, mih kuihdung te a raeku hae paw Asherah zohtuh te amynkhuhpaw silawhang kha pawlangria vae lan khyh hae.

9 Tuin nin vae tuh sihkakinpaw mih khuapi hae tuh Israel hae keiccuze Hiv hae te Amor hae nynh a ccuetaw hae paw hmin hae hawte athua cih hae zah, ccungccaw phe adae cih.

10 Pawccecize nang ae khumtu

Pachia kha na ning zah,

na khynnaw Lungpi kha

phe na ning vae;

tukeiccuze ramccang pachia kha

beik khylan

aku hoypaw kha na linku,

11 na lin nin khe na lethungsah zah,

na lin awkhua khe

apaw na pawsah zemah

rue ccyh kya athae tuh phe azo cih,

ngaethya ccyh te dan kho leipaw

ccinaw rou kha nynh a um cih.

12 Rili roi accae hawte

ccungccaw patae nynh a siarua hae!

Tui alepaw nynh accae hawte

minphuin hae nynh a siarua hae!

13 Tuileih alepaw roi accae hawte

minphuin hae nynh a siarua hae,

thuasalama Pachia nynh pe hae zah

ccaring a ccue hae,

mua vawlan khisan nynh

a mungpaw vaekang hawte thuasah,

khiccung nynh a zoukhaepaw

vuiping hawte thuasah

minmin kha dee athua hae.

14 Zete ccyh kya rikawte um hae zah,

awkhualan awkhua athua maw

phe zo vae hae.

E hynh aening vawsaw oun pya hae paw te

uccaw oun luade hae paw nynh

a tung hae paw nynh thua.