1 Ram uktu kalan

tuutaw hae kha ky oh;

laesia ram a umpaw Sela khua kyate

Zion ccanung mua langkhe mah ky oh.

2 A bu kyate zousahpaw

pavaw taw hawte,

Moab ccanung hae tuh

Arnon vaw zuanaw

vaw kin khe a um hae.

3 "Tuanaw yn pyatua oh,

ahmete bya yn pia oh;

ninthu khuaninso kyakhe

khuazi hawte nae mynlyh kha

yn raepah oh;

a dee hae paw ccungccaw hae kha

thuruh oh,

a ccue hae paw kha langsakuh nan oh;

4 Moab ram kyate a dee hae paw kha

nae kya umsah bua oh;

rohtu hae kyate minmin kha

thungkhaw oh," a cipya hae.

Tuaasahtu um vae leite,

ronaw tuh dae vae zah,

ram kyate syrotu hae he adae tetuh,

5 David bu kyakhe

atynpaw sungsakunaw te

bawitungkhung kha tynsah athua cih,

ahmepaw kha arangte cyih zah

byading a ccungpaw uktupaw tuh

lungzinaw te phe beih zah

tuh-e bawitungkhung

vawlan khe a haung cih.

6 Moab nynh a lysakunaw kha

phe kae thae vae,

aning tuh myaryamaw a lysakuh!

Lysakunaw, tansakunaw te

rysawthyanaw hoi zah,

accakaepaw pookunaw bya kha a ho.

7 Tukeiccuze Moab hae tuh rah hae sah,

milu takyhte Moab ram hanlan rah hae sah.

Vawsaw a tung raria hae paw,

rawkhuite um oh,

Kir-hareseth khua kya-e

misu thae aroupaw kha

liathuite rah oh.

8 Heshbon khua e loo hae te

Sibmah khua e

misu ku hae tuh a nyaabung vae hae,

vaekheih lyaze tuh-e misu ange hae nynh

minphuin uktu bawi hae kha

a la ruisah hae,

tuh lyaze tuh-e ange hae tuh

Jazer khua cia phe la phah zah,

ramkaw lang cia phe la thua;

misu ku atoih thawpaw hae tuh po lo zah

rili khuraw lang phe la thua.

9 Tukeiccuze Jazer khua hanlan

ka raw hawte Sibmah khua e

misu ku hae hanlan ka rah;

Pou Heshbon khua te Elealeh khua,

nanning kha ka mitphi te

kae ciasah cih oh;

pawccecize na thingthae rue lya te

na ccathae rue lya-e

lungtua siaruanaw tuh zya adae vae.

10 Thingthae athaenaw loo kyate

lungtuanaw te lungpawnaw kha phe zo vae;

misu khokhu kya hlawsah vae khyh hae,

lungtua siaruanaw mah um vae khyh;

misu thae nonnaw kya

athae a nontu mah non vae khyh;

misu thae lo ccyh lya-e

siaruanaw mah zya dae vae.

11 Tukeiccuze ka bung tuh Moab hanlan,

ka vue ka ring tuh Kir-heres hanlan,

tintang hawte accae.

12 Moab nynh ahangnaw hmin kya amaw toulou kha a thawbangsakuh zah, a beikinnthyaa kalan sawsang lan a ccia zemah a laan a sui ua lan khyh.

13 E bya hynh Bawipaw nynh Moab konglang a la hopaw bya nynh thua. 14 Te atu Bawipaw nynh, "Vaeluatu riapyanawpaw kum thyhte, kum thum lungkhu Moab phu-enaw tuh a ccungccaw hae patae ryte theihrya athua cih; a hiinhypaw myarya azya cih zah mih thawzya cih," a ci.