1 Kae hopaw bya kha

hum nynh mou a zyn?

Bawipaw kuih tuh

hum kalan mou a langku?✝

2 A ryalahtu tuh amaw malang khe

thingku anopaw hawte thuasah,

laerou kya atoihpaw

thingtharui hawte thuasah a lethung;

aning tuh do ry lanpaw

pynrua hoi khyh zah

sawtuaruapaw mah thua khyh,

a muinsan duaaruapaw mah thua khyh.

3 Ming hae nynh amaw kha

theihrya hae zah a vua hae;

a teingpaw te a ngedan leipaw

ccungccaw nynh thua;

ming hae nynh ccanglang

a hawitaw hae paw ccungccaw hawte

aning kha theihrya hae zah, kaening nynh

pawlang kae ria leipaw nynh thua.

4 Thanccingte aning nynh

aening vaemaw kha lah zah,

aening ccinaw kha a phu;

tuhzemah Pachia nynh

aning kha detah zah

a teingsah vae cite ah tua oh.

5 Thuasalama aening cyiseimenaw keiccuze

aning tuh vaemaw mue zah,✝

aening hoyleinaw keiccuze

ziaku buakunaw kha a teing;

aning tungvaw accahpaw detahnaw nynh

aening kha accingpaw lang oun rae zah,

a vaemaw liate aening tuh ah dan oh.

6 Aening balyn tuh azopaw

tuu hawte nynh ah thua vae oh;✝

aening balyn tuh ahmaw laanpi raveih kalan

ah maekuh vae oh,

tukeiccuze Bawipaw nynh

aening hoyleinaw balyn kha

aning tungvaw khe a khang vae.

7 Aning tuh tuaasahkunaw te

riathaenaw kha a teing zemah

a mung kha a myh;✝✝

saw theihtupaw kalan

a cciakhae hae paw

tuutaw hawte thuasah,

a ming a ngotu malang sia leite

a umpaw tuu hawte thuasah

aning tuh a mung kha a myh.

8 Ahme lei lante byapaenaw keiccuze

aning kha a cciakhae hae.

Amaw a malang ccyh kha

hum nynh mou a tuase kho?

Pawccecize aning kha

a hiin hae paw ram kyate

vua thua zah, ka ccungccaw hae

seinaw keiccuze a zia a bua hae.

9 Seinaw rae boi khyh zah

a mung te hynbya a ho boi khyh zemah,✝

ccungccaw hoylei hae paw ryte

shawku raepah kheih hae zah

mihoipaw ryte a uukheih hae.

10 Aning tungvaw teingsahte

vawsaw pya lanpaw kha

Bawipaw rynaw nynh thua.

A hiinnaw kha seishawkunaw silawnaw lang

he na rae te, a ciihan kha a muih cih zah

a she asae cih;

aning liate Bawipaw rynaw tuh accing cih.

11 Vawsawnaw a teing koute

awnaw kha a muih cih;

a nynaw liate lungryccingnaw a mue cih.

Ka ryalahtu midingpaw nynh

ccungccaw patae kha

miding lang a rae cih hae zah,

mih hoyleinaw kha

a phupah cih hae.

12 Tukeiccuze a lesae hae paw ryte

a ccou lanpaw a hanpaw kha

ka neethungbua cih,✝ luadepaw uccaw kha

athungpaw ccungccaw hae ryte

a neekuh bua cih.

pawccecize amaw toulou kha

chinaw kalan pyakuh zah

misei hae ryte riakheih athua;

tuhzemah ccungccaw patae

seinaw kha phu zah,

misei hae hanlan

ccawkuthuinaw lang

saw a sangpya hae.