1 Amoz ccapaw Isaiah nynh Judah te Jerusalem konglang a thaepaw Pachia bya tuh:

2 Malang ccyh vae tuh

Bawipaw inn a umnaw mua hynh

mua hae kyaze ahang huaccepaw

hawte atyn cih zah, mua taraw hae

luki lang hangthung athua cih;

minphuin balyn nynh

tuh-e mua langkhe a cceih cih hae.

3 Ccungccaw patae nynh

oun thua cih hae zah,

"Rang oh, Bawipaw mua,

Jakob Pachia inn lang cceihthung oh sih;

a laanpi kha oun ccangpah cih zah,

aening nynh amaw ccunoh kha

ah zui cih oh," cite oun ho cih hae.

Pawccecize Zion kyate

ccangpyanaw yn pou cih zah,

Jerusalem kyate Bawipaw bya

yn langkuh cih.

4 Bawipaw nynh minphuin hae kha

bya oun pia cih hae zah,

ccungccaw patae kha oun hopia cih hae;

mih zunghe hae kha tamuin lang

oun suhkuh cih hae zah,

mih ccoi hae kha tangpaw lang

oun suhkuh cih hae;

minphuin ccangkheit te ccangkheit

rhawtukkuh vae lan khyh hae,

rhawtukkunaw kha mah

ccangkuh vae lan khyh hae.✝

5 Pou Jakob ciihan hae,

rang oh, Bawipaw awnaw kyakhe

cceih oh sih!

6 Pachia, nang nynh na ccungccaw

Jakob ciihan hae kha na vua vae hae.

Minmin tuh nithua lang e

naawthyanaw te thuasah,

Filistin hae hawte

beidin dothyanaw te thuasah

phe beih hae zah, ramccang hae

phung kha a zuibua hae.

7 Mih ram tuh sui te

ngun te phe beih zah,

mih sisua tuh thang kho khyh;

mih ram tuh marang te phe beih zah,

marangle hae tuh riatae um khyh.

8 Mih ram tuh zohtuh hae te phe abeih;

mih kuih nynh a raepaw,

mimaw kuihdung ccaccei nynh

a raepaw kha a beik hae.

9 Tukeiccuze ccungccaw hae tuh

nyaasah bung thua hae zah,

mih balyn mawte nesah bung athua hae,

minmin kha ngaethya nan hae!

10 Bawipaw thinrianaw,

a lesaenaw te a phu-enaw keiccuze

lungpi lungkhu lang tee lah,

laenoi kya reku tua.✝

11 Tuin nin kya tuh ccungccaw hae kya-e

lysakunaw mit kha

nesah bung athua cih zah,

mih lysakunaw kha nyaasah athua cih;

Bawipaw lu kheit kyalya kha

hangthung athua cih.

12 Tuin nin khe vaaw Bawipaw nynh

a lysakuhpaw balyn,

a tansakuhpaw balyn te

a hangsakuhpaw balyn kha

a nyaasah cih hae;

13 Lebanon e ahangpaw sidar thing balyn te

Bashan ram e phaesi thing balyn kha

a nge cih hae.

14 Ahangpaw mua hae te

sangpyng hae kha thuasah,

15 rhawviainn hae balyn te

khua a koihlupaw

rhawlungrua hae balyn kha thuasah

a ting cih hae zah a bialaesah cih hae.

16 Tarshish ccingbaw te

kuih te raepaw apuithyapaw balyn kha

a roh cih hae.

17 Ccungccaw hae lysakunaw kha

a zosah cih zah,

a tansakunaw hae balyn kha a roh cih;

tuin nin khe Bawipaw kyalya kha

hangthung athua cih.

18 Zohtuh hae tuh a zo cih hae.

19 Bawipaw nynh laephi kha

bungzousah khylan he yn thokuh te,

Bawipaw rawrinaw,

a lesaenaw te a phu-enaw keiccuze

lungkarung lungkhu lang te

laekarung lungkhu lang tee oh.

20 Tuin nin vae tuh ccungccaw hae nynh

beik lan a la raeku hae paw

sui zohtuh hae te ngun zohtuh hae kha

theihmung hae te balaw hae kalan khe

oun vuapah cih hae.

21 Bawipaw nynh laephi kha

bungzousah khylan he yn thokuh te,

Bawipaw rawrinaw,

a lesaenaw te a phu-enaw keiccuze

lungkarung hae te laekarung hae kya

tee khylan khahcite oun rekuh cih hae.

22 Mih naduh kya hy kyalya

a hoi hae paw ccungccaw hae kha

ngaehoikuh nan oh, minmin kha

pawlangria lan a um hae zawtou?