1 Tuin nin khe Judah ram kya

e hlaw hynh a sah cih hae:

Atynpaw khuapi kae hoi;

rhawlungrua te koihkhawpaw hawkhate

Pachia nynh oun taepya.

2 A lungzi zah adingpaw minphuin nynh

a tee ccaw koikua hae kha

hungtua.

3 Atynpaw thinlung a hoi hae paw nynh

nang kha ae doliaku hae keiccuze

daenaw na pya hae.

4 Bawipaw kha zungzae doliakuh,

pawccecize Bawipaw PACHIA tuh

zungzae tynpaw na lungpi nynh thua!

5 Ahangnaw kya a um hae paw kha

a nyaasah bung hae;

alypaw khuapi kha a nyaasah bung,

laekhu kyacia nesah bung zah

vuiping kyakhe a vua.

6 Khah-e khuapi kha ccu te a syde hae,

ryachi hae te ahobou hae paw nynh

a syde hae.

7 Miding laanpi tuh ngingrarih lan acih;

Pou adingpaw Pachia,

miding hae laanpi kha

naebabing lan na raepya hae.

8 Pou Bawipaw ,

na laanpi kha kae zui zah,

nang kha kae ngaehoiku;

na min te na minthaannaw kha

ka thinlung nynh a ry.

9 Khuazi ccyh kya ka thinlung nynh

nang kha ae ngae,

ka lungkhu e ka thinlung nynh

nang kha thawmawte ae ccung.

Laephi kha bya na pia vae ze,

laephipi kya a um hae paw nynh

dingnaw kha a ccangku hae.

10 Ccungccaw hoyleipaw nynh tuh

maehoynaw na pya zemah,

dingnaw kha ccangkuh khyh;

dingnaw ram khe hoyleinaw kha

rae zah, Bawipaw lesaenaw kha

pawlangria khyh.

11 Pou Bawipaw , na kuih

na hangthung zemah,

minmin nynh muih khyh hae.

Na ccungccaw hae hanlan

na lungthawsaenaw kha muih hae sah lah,

mih maethah sah.

Maee nynh na rhaw hae kha u hae sah.✝

12 Pou Bawipaw , kaening hanlan

daenaw nae pya cih,

pawccecize accaccingte,

kae la cyi kho vae paw balyn hynh

kaening hanlan

nae cyipyapaw nynh thua.

13 Pou Bawipaw kae Pachia,

namaw holeite ccangpaw

bawipaw hae nynh oun la uk vae hae,

thuasalama nang na min rou kha nynh kae ny.

14 Tuh-e bawipaw hae tuh

chih vae hae zah

hiinthui vae lan khyh hae;

mih muisaw tuh thoothui lan khyh,

pawccecize minmin kha

de na tah hae zah na ro vae hae,

te minmin liathuinaw

lanpaw balyn kha na ro vae.

15 Pou Bawipaw , kae minphuin kha

nae pungzaesah vae, kae minphuin kha

nae pungzaesah vae keiccuze

phu-esah na thua vae;

kae ram kha po lekuh lan na kosah vae.

16 Pou Bawipaw , minmin nynh

vawsaw a tung vae hae ze,

nang kha ae ccung hae,

na thuihei vae hae ze,

na kalan saw a sang hae.

17 Ccaaw a poipaw nopi nynh

a sawkyh zah a pui dyn vae ze,

neitangia teing zah a sia hawte,

pou Bawipaw , nang na keiccuze

tuhawte nynh kae teing,

18 kaening tuh neitangia kae teing zemah

accakaepaw rou kha nynh

ccaaw lang kae saah.

Laephi vawlan kae taepaw um khyh,

laephipi kya khuasah khylan

ccaaw lu kheit sanmah kae saah khyh.

19 Na michi hae tuh a hiinthui cih hae,

mih rhua tuh a thoothui cih.

Pou laenoi kya um hae paw,

nae inaw kyate thaekuh oh lah,

lungtuate hlawsah oh!

Na dangtui nynh laephi kha

hinlalyh lan a hinsah thui hawte,

laephi nynh a chih vae paw kha

a hiinsah thui cih.✝

20 Ka ccungccaw hae, rang oh,

nae innkhaan lungkhu lang tee oh lah,

thuakaw khawsungkuh oh;

thinrianaw ccyh athang mawlaezung

sosoh rekuh oh.

21 Pawccecize laephi ccungccaw hae kha

mih hoyleinaw keiccuze detah khylan

Bawipaw tuh a umnaw kyate

yn toikuh vae;

tetuh laephi nynh a vawlan

aluapaw chiise kha

a langsakuh cih zah,

laephi vawlan a chia hae paw kha

thuruh vae lan khyh.