1 Mua hae tuh na malang khe

a hy ccaw hae, vaawlui kha hung lah,

yn rungbung tua,

2 Na min kha na rhaw hae nysah khylan,

maee nynh thabu kha

a u hawte thuasah,

tui kha a ccohsah hawte thuasah

yn rungbung tua;

tuhteze nynh minphuin hae tuh

na malang khe a thyngkuh cih hae!

3 Kaening nynh kae la tua leipaw

ri lan umpaw uccaw hae kha he na rae te,

nae rungbung zah mua hae tuh

na malang khe a hy hae.

4 Amaw a ngaehoikuh hae paw hanlan

rya a lawpah hae paw Pachia,

namaw laelan ccangpaw kha

langmawlya mawte

humhung nynh mah thae boi khyh,

a nakaring te thae boi khyh,

a mit te mah muih boi khyh.✝

5 Ahmepaw kha lungtuate

a cyih hae paw te na laanpi kya

nang ae tua hae paw kha na ccuepe hae.

Kae tungvaw na thinria zemah

kae sei mamin; kaening kha

nae retawku keiccuze kae sei vae.

6 Kaening balyn tuh athyaa leipaw

ccungccaw hawte kae thua vae zah,

adingpaw kae cyisahnaw balyn tuh

anungsikuhpaw boeining hawte nynh thua.

Kaening balyn tuh

thingnaw hawte kae naan zah,

kae hoyleinaw nynh kaemaw kha

khisan hawte ccaring oun mung.

7 Na min ae kopaw te na kya

kyngku lan a zuakuhpaw

lu kheit san um khyh;

pawccecize kaening kha

na mae ccanglang nae hawitaw zah,

kae hoyleinaw

lungkhu langkhe nae ap vae.

8 Tuhzemah, pou Bawipaw ,

nang tuh kae Paaw nynh na thua,

kaening tuh anglae kae thua zah,

nang tuh kaening oun raetupaw

ang raetu nynh na thua;

kaening balyn tuh na kuih te

nae raekupaw nynh kae thua.

9 Pou Bawipaw , thawte na thinria nan sah,

hoyleinaw kha palei liathui nan.

Atu tuatua, kaening balyn tuh

na ccungccaw hae nynh kae thua.

10 Athyaapaw na khuapi hae tuh

ramkaw lang nynh a tang vae hae,

Zion tuh ramkaw lang

tang vae zah, Jerusalem tuh

arohpaw lang nynh a tang vae.

11 Kae minpaaw hae nynh

ae thehoysahnaw hae hmin,

athyaapaw te apuithyapaw kae beikinn tuh

maee te u thua vae zah,

kae lungrythuanaw hmin balyn tuh

arohpaw lang nynh a tang vae hae.

12 Pou Bawipaw , e hae balyn koute,

phang na synkuh ung cih tou?

Yccae leite phang umte kaening hynh

myarya ccih lante de nae tah ung cih tou?