1 Tuh lyatuin Hezekiah tuh ccih zah vyavya a chih vae. Amoz ccapaw profeh Isaiah nynh a kalan cceih zah, "Bawipaw nynh hynhte a ho: Na inn ryalaw kha hoyte synriasya, pawccecize na chih vae cih; na dan vae lan khyh," a cipya. 2 Tetuh Hezekiah nynh pang kalan khe a mae kha hawi zah Bawipaw kalan saw a sang: 3 "Pou Bawipaw , ka thinlung balyn te lungzite na malang ka hiin zah, na muihnaw kya ahoypaw uccaw ka cyipaw kha atu beih liathuitua, namaw kha kae ngiaku," ci zah, thawte a rah.

4 Te Bawipaw bya tuh Isaiah kya yn thua zah: 5 "Hezekiah kalan cceih lah, ‘Na minpaaw David Pachia, Bawipaw nynh a hopaw tuh: Na sawsangnaw kha ka thae vae, na mitphi kha ka muih vae; na hiinshe kha kum haw lae pangaw ka saesah chih cih. 6 Assiria siapharan kuih kyate nang te e khuapi hynh kae luesah cih oh zah, e khuapi hynh ka thungkhaw cih, a ci,’ cite la hopah," a cipya.

7 Isaiah nynh, "Bawipaw nynh bya a kinku vae thyhte a cyi lanpaw uccaw, nang na hanlan muihsahnaw tuh hynhcite nynh athua: 8 Dotua, Ahaz kya-e khuanin tounawpaw vawlan anuekuhpaw mynlyh kha nulang khe kaw haw ka kisah cih," a ci. Tetuh phe anuekuh vae paw khuanin tounawpaw tuh nulang kaw haw a kithui.

9 Judah Siapharan Hezekiah tuh ccih zah a ccinaw kyate a dan koute a zeipaw ccaw tuh: 10 Ka hiinshe ka ryku cciamang lya

ka cceih vae cih;

ka ccyh a laehy ungpaw kha

michi khua koikua kalan

ap athua vae, ka la ci.

11 Ahiinpaw ccungccaw hae ram kya

Bawipaw kha ka muih vae lan khyh;

laephi kya a um hae paw laku kya

ccungccaw hae kha

ka muih vae lan khyh hae, ka la ci.

12 Tuurinpaw bu hawte

ka umnaw inn tuh

phou thua zah, ka kyate nue athua;

boeikuatu nynh boeikua a kue hawte

ka hiinnaw kha ka kue vae;

boeikuatu nynh boeikua kya arawkuhpaw

laaw a pae hawte Pachia nynh

thoh yn pae vae;

nin kheit lungkhu ka hiinnaw

phe nae thangsah, ka la ci.

13 Azi zidae bawmnaw

mue khylan ka sia;

chindeih hawte aning nynh

ka ru balyn kha pong yn khya;

nin kheit lungkhu kya ka hiinnaw

phe nae thangsah cite ka la tua.

14 Ccipae khyhze cocia pavaw hawte ka sia zah,

vahu hawte ka hawkhaekuh.

Ka mit tuh ka dothungnaw a thawbang vae.

Pou Bawipaw, kae tuh

tuaasahkunaw ka teing;

khynnaw beih yn pyatua!

15 Thuasalama pawmou ka ho kho ung cih?

Pawccecize kae kha yn hopya vae,

e hynh amaw ccaccei nynh phe a cyi vae.

Ka thinlung a cci keiccuze

kharouh ka ih kho khyh.

16 Pou Bawipaw, e uccaw hae liate

ccungccaw hae tuh a hiin hae,

ka muisaw hiinnaw tuh

e uccaw hae balyn kyahin a um.

Ka ccinaw beih yn dan sah lah,

yn hiin sah!

17 Thanccingte ka teingpaw

ccinaw alepaw tuh

kamaw hoynaw hanlan nynh athua;

ka hiinnaw kha ronaw hunghua kyate

poh nae thuaa vae,

pawccecize ka seinaw balyn kha

na nulang na vua vae.

18 Michi khua nynh na tungvaw

lungtuabya ho kho khyh,

chinaw nynh na the ae hoysah kho khyh;

Hunghua lungkhu lang

a ccah hae paw nynh

na lungzinaw kha

ngaehoi kho khyh hae.

19 Atunin kae nynh

kae thehoysah hawte

ahiin hae paw,

ahiin hae paw rou nynh

ae thehoysah cih hae;

paaw hae nynh ccaaw hae kya

na lungzinaw kha a nysah cih hae.

20 Bawipaw nynh kae kha yn khum cih,

Bawipaw beikinn lungkhu khe

kaening nynh kae hiin lungkhu balyn

tintang khuakute hlaw kae sah cih, a ci.

21 Isaiah nynh, "Thaeku athae hae kha lah hae sah lah, a nonde kou hae te, accinaw kha thuhpah hae sah, tetuh siapharan tuh a dan cih," a ci. 22 Hezekiah nynh mah, "Bawipaw beikinn lang cciathung khonawpaw pawcihawpaw muihsahnaw mou a um?" a ci.