1 Pou rili khunglang e ram hae,

ka bya hynh ngaetua oh,

asawnaw lang e ccungccaw hae,

hoyte ngaetua oh!

Bawipaw nynh ka pui mawze yn ko vae,

ka nung vue kya ka um lyate

ka min yn phu vae.✝

2 Ka khalang kha thaloi ahepaw hawte

yn rae zah,

a kuih mynlyh kyakhe yn thuruh;

a akpaw the lang yn rae zah,

a the bawng lungkhu khe yn thuruh.

3 Aning nynh kae kha, "Israel, nang tuh

ka ryalahtu nynh na thua,

namaw liate ka phu yn esah

cih hae," yn cipya.

4 Kae nynh, "Accakaepaw kya

ka banghan vae,

ka thawzung kha accakaepaw te

alakawpaw hanlan ka manghan vae,

tuhzemah ka byathan tuh

Bawipaw kya um zah,

ka ryalaw mee lasung tuh

ka Pachia kya a um," ka ci.

5 Amaw rya a lahtu lang

tang khylan thuasah,

Jakob kha amaw kalan

kikhae khylan thuasah,

Israel hae nynh amaw kalan

a sueluaku nawlan hae thuasah

Bawipaw nynh kae kha

ka nung vue kya yn la rae vae,

Bawipaw muihnaw kya

sawtuanaw ka ccou zah,

ka Pachia tuh ka thawzung lang a tang vae.

6 Bawipaw nynh a hopaw tuh:

"Jakob phin kha hangthung khylan te

ahiinhypaw Israel hae kha

langmawlya hawte bua thuasah khylan hae,

ka ryalahtu lang na tang lanpaw tuh

myaryamaw adihpaw ryalaw nynh thua;

ka khumnaw tuh laephi adianaw cia a thua nawlan,

nang kha minphuin hae hanlan

awnaw lang kae rae cih," a ci.✝

7 Ming hae nynh dothatheih hae zah

minphuin hae nynh a hua hae paw,

uktu hae seepaw kalan khe

Israel Shawkhawtu te

Israel Pachia Athyaapaw,

Bawipaw nynh a hopyapaw tuh:

"Nang ae potupaw Israel Pachia Athyaapaw,

a lungzipaw Bawipaw liate

siapharan hae nynh a muih cih hae zah

a thadyn cih hae,

siapharan ccapaw hae nynh mah

a beik cih hae," a ci.

8 Bawipaw nynh a hopaw tuh:

Maehoy pyanaw ccyh kya na bya kha

kae thaepya vae, khumnaw nin kya

nang kha kae bawm vae;

nang kha kae thungkhaw zah,

tuh-e ram kha tynsah khylan te

ccungccaw phe adaepaw rho laephi kha

neeku khylan nang kha

ccungccaw hae hanlan

byakinnaw lante kae rae vae;✝

9 thongccah hae paw kha,

"Pou oh," ka cipah hae zah,

mohnaw lungkhu um hae paw kha,

"Oun langkuh oh," ka cipya hae.

Minmin nynh laanryng khe

aepaw a muihkuh cih hae zah,

ahangnaw otung hae vawlan khe

ramnonaw hmin kha a muihkuh cih hae;

10 mih vuelaw lan khyh zah

mih tuihaw lan khyh,

myarya sopaw khivae te khuanin nynh

vawsawnaw pya lan khyh hae,

pawccecize minmin tungvaw

ngaethyaumsahnaw a hoitupaw nynh

a cciakhae cih hae zah,

tuidy pe langkhe a cciakhae cih hae.✝

11 Ka mua hae balyn kha laanpi lang

ka tangsah cih zah,

ka laanluepi hae kha hangthung athua cih.

12 Dotua, minmin tuh asawnaw kyate

oun thua cih hae,

dotua, palung langte thuasah,

niccaw langte thuasah,

Sai-en* khua kyate thuasah

oun thua cih hae, a ci.

13 Pou vaawlui hae, lungtuate hlawsah oh,

pou laephi, na lungtua sah.

Pou mua hae, lungtuate hlawsah oh!

Pawccecize Bawipaw nynh

a ccungccaw hae kha

ngaengannaw pya hae zah,

a teing hae paw a ccungccaw hae kha

ngaethya a umsah cih hae.

14 Thuasalama Zion nynh, "Bawipaw nynh

kae kha yn vua vae,

ka Bawipaw nynh yn ning vae," a ci.

15 Nopinung nynh a matei a zusahpaw

ccaaw kha a ning kho cih tou?

A saahkupaw a ccaaw kha

ngaethyaumsah leite a um kho cih tou?

A nung nynh a ccaaw kha a la ning heize,

nang kha kae ning lan khyh.

16 Dotua, ka kuihphe vawlan

nang kha kae zei vae;

khualungrua tuh ka malang po a um.

17 Na ccaaw hae tuh

aro maw oun thua cih hae;

nang ae rohtu hae paw tuh na kyate

ccaring a pou cih hae;

18 Na pepan balyn kha ngawrandotua;

minmin balyn tuh sueluakuh hae zah,

na kalan oun thua hae.

Bawipaw nynh a hopaw tuh:

Kae tuh a hiinpaw ka thua thyhte,

minmin balyn kha

apuithyapaw boeining te

ccaan hawte na ccaan cih hae zah,

akaepaw liaccanung hawkhate

na ccaan cih hae.

19 Arohpaw te ccungccaw

phe adaepaw hmin,

arohpaw na ram tuh

khuasahpaw milu alung keiccuze

myaryamaw ccungccaw

a tuh-eihkuh cih zah,

nang ae laangtu hae kha nang te

a sawkuh vae cih hae.

20 Ngaethya rawkhuite na um lya

a puipaw na ccaaw hae nynh

na thaenaw khe,

"E hmin kya ka hanlan

ccungccaw myaryamaw alung,

kae um nawlan hmin oun raepah,"

ae ci cih hae.

21 Tetuh na thinlung kyakhe,

"Hum nynh mou e ccaaw hae hynh

yn saahpah hae?

Kae tuh ka ccaaw hae chih vae hae zah,

ccaaw a saahkuh lei vae paw,

ramccang lang a dee hae paw te

asawnaw lang

a nung hae paw nynh ka thua,

tukeiccuze hum nynh mou

e ccaaw hae hynh yn thuakhae hae?

Ka makhae rou nynh ka um vae,

e hae hynh tei kyate mou

oun thua hae?" cite na ci cih.

22 Bawipaw PACHIA nynh hynhte a ho:

aro mawze minphuin hae kalan

ka kuih ka hangthung cih zah,

ccungccaw hae kalan

ka alan kha ka sae cih;

na ccapaw hae kha

mih by kya a pom cih hae zah,

na ccanung hae kha mih raw vawlan

khangkute a cciakhae cih hae.

23 Siapharan hae tuh nang ae do-oihtu

na paaw hae athua cih hae zah,

siapharannung hae tuh

nang ae kuakuhpaw

na nung hae athua cih hae.

Na malang khe

ae bakhungpah cih hae zah,

na ccu kya-e vuiping kha

ae pheihpah cih hae.

Tetuh kae hynh Bawipaw ka thuapaw kha

nae nyh vae cih;

kae yn ngaehoikuh hae paw tuh

maethyanaw mue lan khyh hae.

24 Luadepaw uccaw kha

athawsaepaw kuih kyate

lawde kho athua zawtou?

A kyng hae paw miding hae kha

a rysawthahpaw kuih kyate

luesah kho athua zawtou?

25 Thuasalama Bawipaw nynh a hopaw tuh:

A thawsaepaw nynh

a luade hae paw kha heize

law athua cih hae zah,

a rysawthahpaw nynh

a luadepaw uccaw kha luesah athua cih;

pawccecize nang ae rawsepaw kha

ka rawse cih zah,

na ccaaw hae kha ka khum cih hae.

26 Nang ae tuaa ae sah hae paw tuh

mih ngesaw toulou kha ka aesakuh cih hae zah,

misutui nia hawte mih chii toulou kha

a neih cih hae.

Tetuh ccungccaw balyn nynh kae hynh

nang ae Khumtu Bawipaw ka thuapaw te

nang ae Shawkhawtu,

Jakob Pachia Athungpaw ka thuapaw kha

a nyh cih hae.