1 Assiria siapharan Sargon nynh a sawpaw rhawbawi ale huapaw nynh Ashdod khua kha tuk zah a law kum— 2 tuh ccyh lyakhe Bawipaw nynh Amoz ccapaw Isaiah kyakhe, "La cceih, na tae kya-e buriboei te na phanah kha khahkuh," a cipya thyhte aning nynh khahkuh zah, a sasete phanah leite a cceih. 3 Oute Bawipaw nynh, "Ka ryalahtu Isaiah nynh Izip ram te Ethiopia ram kya yn cyihkuh cih paw muihsahnaw kha langsah khylan, kum thum lungkhu a sasete phanah leite a cceih, 4 Izip hae kha maethyalaw khylan, Assiria siapharan nynh Izip hae te Ethiopia hae kha adih ale laesah leite sasete, phanah leite, leihkung san bongku leite a cciakhae cih hae. 5 Ashdod khuaccaaw hae tuh a ngaehoiku hae paw Ethiopia ram te a pookunaw hae paw Izip ram keiccuze siikute mih lungmuakhaekuh cih. 6 Tuin nin khe rili kin kya um hae paw nynh, ‘Dotua, Assiria siapharan kyate lue khylan ah ngaehoiku oh paw te bawmnaw mue khylan ah ccuenua oh paw kya hynhte rei phe cyiku vae! Pawtemou ah lue kho vae cih oh?’ cite a hokuh cih hae," a ci.