1 Moab konglang hotypaw bya tuh:

Ar khua tuh zi kheit lungkhu aro keiccuze

Moab ram tuh aroh;

Kir khua tuh zi kheit lungkhu

aro keiccuze Moab ram tuh aroh.✝

2 Dibon khuaccaaw hae tuh

hminthyaa kya raw khylan

ahangnaw hmin lang a kae hae;

Moab hae tuh Nebo khua te

Medeba khua khe a rah hae.

Mih lu kha okuh hae zah,

mih khawming kha

phe thyaa lan a ngoku hae;

3 laanpi khe buriboei kha zingkute,

innccukaly kya te laanluepi kyakhe

ccungccaw miakaw rah hae zah

mih mitphi alua.

4 Heshbon khua te Elealeh khua tuh

rah hae zah, mih rawnaw roi tuh

Jahaz khua cia accae;

tukeiccuze Moab rhawkaw hae tuh

rawthyate a thyngkuh hae.

5 Moab hanlan ka thinlung myarya ccih;

a ccungccaw hae tuh Zoar khua te

Eglath-shelishiyah khua lang a ccue hae.

Luhith kaethung khe

raw biate a kae hae; Horonaim lang

cceihpaw laanpi khe

ronaw roi a saw hae;

6 Nimrim vaw tuh kan zah,

lonua tuh arou,

apo thawpaw lonua mah a chih,

hinlalyhpaw aku kukheit sanmah

um vae khyh.

7 Tukeiccuze minmin nynh

a hoi hae paw uccaw patae te

a ccakhungku hae paw uccaw hae kha

Su ku Accya langkhe a ccyngku hae.

8 Pawccecize Moab ram pepan kya

rawnaw roi accae;

rawkhuinaw roi tuh

Eglaim khua te Beerelim khua cia accae.

9 Pawccecize Dibon khua e

tui tuh chiise te phe abeih;

tuhzemah Dibon khua langkhe

tuh-e laeze aru huapaw

vawsawnaw kha ka thuasah cih zah,

lue khylan a ccue hae paw

Moab hae hanlan te

tuin ram kya a laehy hae paw hanlan

chindeih kha ka thuasah ung cih.