1 Pou rili khunglang e ccungccaw hae,

daebabi lan um oh lah, ka bya hynh

ngaetua oh; minphuin hae nynh

thawzung thawpaw hoi hae sah,

naekuh hae sah lah, ho hae sah;

byapianaw hmin kya

pynkheihlan tungkuh oh sih.

2 Hum nynh mou taetu kha

nithua langte yn langsakuh zah,

amaw rya kha lawsaku khylan a kokuh?

Aning nynh minphuin hae kha

amaw kalan ap hae zah,

siapharan hae kha a uksah hae;

a thaloi khate rhaw hae kha

vuiping lang tangsah hae zah,

a li khate khisan nynh a mungpaw

ccatanphue lang a tangsah hae.

3 Minmin kha deehui hae zah

khyndadyh lante laan po a thoih hae,

a ccu nynh laanpi kha

ccadyhte kyalya nynh a nae.

4 E hae hynh hum nynh mou

rae zah a cyih?

Athotakawnaw kyate

ccungccaw she miakaw kha

a umsahtu tuh hummou athua?

Kae, Bawipaw tuh

masaty a umpaw ka thua zah,

nyathyakou a umpaw mah ka thua cih.

5 Rili khunglang e ram hae nynh

muih hae zah a rih hae,

laephi adianaw e

ccungccaw hae tuh thyngkute

oun naekuh hae zah

a sueluakuh hae.

6 Lu kheit te lu kheit bawmkuh hae zah,

"Na rawthung sah!" cite mimaw te

mimaw a hoku hae.

7 Lehccama nynh suitheithyapaw kha

thawzung a pya, khynlyng te

a tudethyapaw nynh lungde vawlan

naebabing lan atudethyapaw kha

thawzung pya zah,

"Sivaw na piadepaw ahoy," a cipya;

te minmin nynh tuh-e tuh

anueku khyh nawlan thingkhia te

a khiade hae.

8 Thuasalama ka ryalahtu Israel,

ka po vae paw Jakob,

nang tuh ka banpaw

Abraham ciihan nynh na thua;✝

9 nang tuh laephi adianaw kyate

kae cciakhaepaw na thua zah,

"Nang tuh ka ryalahtu nynh na thua,

nang kha kae pokuh zah

kae vua khyh!" cite hopyate

myarya asawnaw laephi apaki kyate

kae kopaw nynh na thua;

10 kae tuh na kya ka um keiccuze

na thinphang nan sah,

kae tuh na Pachia

ka thua keiccuze rih nan;

nang kha thawzung kae pya cih zah,

kae bawm cih, taenaw a hoipaw

ka ranglang kuih te nang kha

kae thungkhaw cih.

11 Na tungvaw a thinriapaw balyn tuh

maethyanaw te thethyanaw a mue cih hae;

nang ae rawse hae paw tuh

accakaepaw hawte athua cih hae zah

a roh cih hae.

12 Nang ae rawsepaw kha na ccung zemah

na muih lan khyh;

nang kha rawsete rhaw a tho hae paw tuh

accakaepaw lang marya a tang cih hae.

13 Pawccecize kae, Bawipaw na Pachia nynh

na ranglang kuih kha phang kae kyng;

"Na thinphang nan sah, nang kha

kae bawm cih," cite ae hopahtupaw tuh

kamaw nynh ka thua.

14 Pou tangkaria Jakob,

minphuin dihpaw Israel,

na thinphang nan sah!

Kae bawm cih cite Bawipaw nynh a ci;

nang ae shawkhawtupaw tuh

Israel Pachia Athyaapaw nynh thua.

15 Nang kha haw hoi zah ahepaw,

ccatan tinnawpaw seh athawpaw lang

kae rae cih; mua hae kha ccatan tin hawte

na tin cih hae zah na miade cih hae,

sangpyng hae kha vaekang lang

na tangsah cih hae.

16 Minmin kha na zaw cih hae zah

khisan nynh a mung cih hae,

khise nynh kaheikalah a nung cih hae.

Tetuh Bawipaw kya

na lungtua cih zah,

Israel Pachia Athyaapaw kha

the na hoysah cih.

17 Ryachi hae te ahobou hae paw nynh

tui kha ccung hae zah, muihku leite

tui kanmawte mih dang he arou vae ze,

kae, Bawipaw nynh mih bya kha

ka thaepah cih hae,

Israel Pachia, kae nynh minmin kha

ka vua lan khyh hae.

18 Mua roupaw vawlan khe

vawpi ka luasah cih zah,

accya khe tuidy ka phyhsah cih;

ramkaw kha tuili lang ka rae cih zah,

ramrou kha tuisung lang ka rae cih.

19 Ramkaw khe sidar ku,

eri ku, mura ku te

oliv ku kha ka posah cih;

te laesia ram kya maeccaw ku te

plane ku te tumaeccaw ku kha

pynkheihlan ka posah cih hae,

20 tuhteze nynh, e hynh

Bawipaw nynh cyih zah,

Israel Pachia Athyaapaw nynh

a rae cipaw kha ccungccaw balyn nynh

a muih cih hae zah a nyh cih hae,

a tua cih hae zah a thaethya cih hae.

21 Nae byathan kha oun poukhae oh, cite

Bawipaw nynh a ci;

atynpaw nae ccaekia hae kha

oun thuakhae oh, cite

Jakob phin hae Siapharan nynh a ci.

22 Mih zohtuh hae kha

oun cciakhae hae sah lah,

yn cyihkuh cih paw kha

kaening oun hopah hae sah.

Acyihkuh vae paw kong kha

pawte nynh acyiku cipaw

oun hopah oh,

tuhteze nynh kaening nynh

minmin kong kha kae tuase cih zah,

mih ccungkianaw hae kha kae nyh cih;

tuhkhyhze yn cyihkuh cih paw kha

kaening oun hopah oh.

23 Nanning tuh pachia hae

na thua oh paw kha kae ny nawlan,

atu koute yn cyihkuh cih paw kha

oun hopya tua oh; kaening nynh

kae rih zah kae siiku nawlan,

ahoypaw khyhze

athahpaw kha raetua oh.

24 Nanning tuh accakaepaw

na thua ccaccing oh zah,

nae ryalaw mah accakaepaw nynh thua;

nanning ae pokuh oh paw miakaw tuh

anungsikuhpaw nynh thua hae.

25 Thahlang umpaw kha lungthobya

ka hopah zah yn thua vae,

khuanin a thuanaw langte yn thua zah,

ka min kha yn ko cih.

Ang raetu nynh anglae kha a syde hawte,

aning nynh uktu hae kha

anglae hawkhate a syde cih hae.

26 Kaening nynh kae ny kho nawlan,

laephi athotakawnaw kyate

hum nynh mou a la ho?

"Aning nynh a hopaw tuh akyh," cite

kae ho kho nawlan, langmawlya te

hum nynh mou a la ho?

A hopaw lu kheit san um khyh,

thaesahtu lu kheit san um khyh,

nae bya a thaepaw lu kheit san um khyh.

27 E kong hynh kae nynh Zion kya

masaty ka hopya,

thehoypaw a phutu kha mah

Jerusalem lang kae nynh ka saw.

28 Thuasalama he ka do hae tuh

lu kheit san um khyh hae;

bya he ka khia hae tuh, minmin laku kya

bya yn khungpaw tuanaw pyatu

lu kheit san um khyh.

29 Minmin tuh accakaepaw cci nynh thua hae;

mih ryalaw tuh alakawpaw nynh thua;

mih zohtuh hae tuh accakaepaw

khivae nynh thua hae.