1 Pou liaccady Babilon,

yn rungbung lah, vuiping kya haungtua!

Pou ccanung Babilon,

laekhu khe bawitungkhung leite haungtua!

Nang kha ninccehoynung cite

ko na thua vae lan khyh.✝

2 Lungmia kha lawkuh lah,

ccathae kha miatua,

mae bongkupaw kha lyngku tua,

na angkiccua kha khahku tua,

na ccu kya-e kha thyngkuh lah,

vawpi kha zuatua.

3 Boeining bongku leite

na sasete na um cih zah,

na maethyanaw kha muih athua cih.

Phu kae lah cih zah,

lu kheit sanmah ka haang lan khyh.

4 Kaening oun Shawkhawtupaw a min tuh

vaaw Bawipaw thua zah,

Israel Pachia Athyaapaw nynh thua.

5 Pou ccanung Babilon,

daebabi lan haung lah,

mohnaw lungkhu lang teetua!

nang kha ram hae bawinung cite

ae ko vae lan khyh hae.

6 Ka ccungccaw hae tungvaw ka thinria,

ka rho tungvaw ka lua ka aethua zah,

minmin kha na kuih kya kae pya hae,

mih tungvaw thawccinaw na hoi khyh;

mih kum tang hae paw tungvaw kya

phupaw myarya ripaw kha

na phusah hae.

7 Nang nynh, "Kae tuh bawinung lang

zungzae ka tang cih," cite

na tuakuh zah, e uccaw hae hynh

na thinlung kya na nung khyh,

nyathya yn cyihkuh cih paw kha

na tua khyh.

8 Tukeiccuze hoysahnaw kyalya

a rypaw nang, e bya hynh ngaetua,

khyndadyh lan na um zah,

"Kamaw kyalya nynh ka um,

kamaw laelan ming hae

humhung mah um khyh;

nomaenung hawte ka um lan khyh,

ccaaw hae nynh chitawnaw mah

ka tung lan khyh," cite

na thinlung kya na tuaku.✝

9 Nang nynh naawthya hae paw te

mitleihthya hae paw kha

na mang hae zemah,

nin kheit lungkhu sosoh kyakhe,

ccaaw hae chinaw te

nomae lang tangnaw,

e phuin ning hynh nynh

na tungvaw ae thuanua cih.

10 Na hoyleinaw kyakhe

ngaengante na um;

"Humhung nynh mah

yn muih khyh," na ciku.

Na hawnaw te na nynaw nynh

ae cciakhaesei vae,

"Kamaw kyalya nynh ka um,

kamaw laelan ming hae

humhung mah um khyh,"

cite na thinlung kya na tuaku.

11 Naawthyanaw te dee kho leipaw

vawsawnaw nynh ae thuanua cih;

na thungkhawku kho leipaw shethya nynh

ae thuanua cih;

na la tua leipaw ronaw nynh

vaekheihmawte ae thuanua cih.

12 Na ngawphue lya mawte

thawte na la zuakupaw

mitleihthyanaw te naawthyanaw hae kyakhe

tynkaring lan thadyntua,

taenaw kha mue mah poh na mue kho,

thinphang rinaw kha mah

poh na pya kho hae.

13 Tuanaw pyakunaw kha

patae na rae oh zah

phe na bang vae oh;

vaawlui kong ccangkute

beidin dothya hae paw,

awsi kong ccangkute

beidin dothya hae paw,

na tungvaw acyihkuh lanpaw kha

sawpaw sah thawpaw takyh kya

a hodaethya hae paw tuh

thadyn hae sah lah,

nanning kha ae khum oh sah.

14 Minmin tuh athupaw hawte

thua hae zah, maee nynh

phe ccung lan a u cih hae;

maeephupi kyate mimaw te mimaw

khumkuh kho khyh hae;

sosakunaw lanpaw maeehue

thyhsan um vae lan khyh,

eku lanpaw maee mah

um vae lan khyh.

15 Nang te rya na lahkheih oh paw,

na ngawphue lyate

kung na kukheih oh paw tuh

na tungvaw tuhcite nynh athua hae;

mih laanpi raveih kya

khiavuikuh hae zah,

nang ae khum lanpaw

lu kheit san um vae khyh.