1 Pou minphuin hae,

nawthae khylan oun naeku tua oh;

Pou ccungccaw hae, hoyte ngaetua oh!

Laephi te laephi kya

a umpaw balyn nynh thuasah,

laephipi te laephipi kya

a umpaw balyn nynh thuasah thae hae sah.

2 Bawipaw tuh minphuin hae

balyn tungvaw a thinria zah,

mih rhawkaw hae balyn tungvaw kya mah

myarya a thinria;

minmin kha phe a maemih vae hae,

chianaw kalan a ap vae hae.

3 Mih rhua kha ccaring vua athua cih zah,

mih rhua tuh athuh cih;

mih chiise te mua hae tuh tui lang alua cih.

4 Vaawlui kya a um hae paw balyn tuh

pong akoi cih hae zah, vaawlui tuh

ccaw akuekuhpaw hawte akuekuh cih.

Vaawlui kya a umpaw balyn tuh

misu ku kya baleih anaanpaw

misu naw hawte anaan cih hae zah,

thaeku ku kya karae aroupaw

thaeku thae hawte arou cih hae.✝

5 Ka thaloi tuh vaawlui kya

he ka paccyn koute,

Edom ram vawlan te

byapia khylan ka nungdae vae paw

ccungccaw hae tungvaw kya accah cih.✝

6 Bawipaw thaloi tuh

chiise te phe byn vae,

atho khate thuasah,

tuutaw chii te miaa chii khate thuasah,

tuutepaw akin kya-e

atho khate thuasah phe a byn vae.

Pawccecize Bawipaw nynh

Bozrah khua kya silawnaw kha rae zah,

Edom ram kya myarya lepaw

chianaw kha a rae vae.

7 Ccungccaw hae tuh kuarang hae te

tangnua taraw hae hawte

a chih cih hae.

Mih ram tuh chiise kya

a ciakuh cih zah,

mih laephi tuh atho te phe abeih cih.

8 E ccyh tuh Bawipaw nynh

Zion kha luesah zah

Zion a rhaw hae tungvaw

phu a law ccyh athua cih.

9 Edom ram e vawkhu hae tuh

kahtaza lang a tang cih zah,

a laephi tuh kemaee lang a tang cih;

a ram tuh maee a u cciamangpaw

kahtaza lang a tang cih.

10 Khuazi khuadae maee chih lan khyh;

a maeekhuh tuh zungzae akhuhthung cih.

Ram tuh she kheit koute she kheit

ccungkia vae lan khyh;

ram lungkhu a cceih bungthungpaw

hum sanmah po um vae lan khyh.✝

11 Tuh-e ram tuh mosi te

sazi hae ram lang a tang cih;

nawnia te va-aw tuh tuin ram kya a um cih hae.

Bawipaw nynh tuin ram kya

keisukeilaenaw te accakaepaw thuanaw

arui kha a raw cih.

12 Ram a uktu siapharan um lan khyh zah,

cciakhaetu hae balyn tuh

um vae lan khyh hae.

13 Siapharan inn hae kya te

rhawlungrua hae kyakhe

hinpaw aphuinphuin a po cih;

suizaw te kalauh pavaw hae

umnaw lang a tang cih.

14 Tuin kyakhe samaaw hae te

ram-ui hae tuh a tungkuh cih hae,

sathaw hae tuh sa kheit te sa kheit

a kokuh cih hae;

Tuin kyakhe Lilih pavaw hae tuh

a haeung cih hae zah

haeungnaw hmin kha a muihkuh hae.

15 Nawnia nynh bu a luakuh cih,

a tui kha a tui cih zah,

a ccong koute yn keipaw

a taw hae kha a do-oih cih hae;

lantaw hae nynh mah tuin kya

a sueluakuh cih hae zah,

api te atepaw ccarou a mungkuh cih hae.

16 Bawipaw ccauh lungkhu khe

ccung oh lah, riatua oh:

Tuh-e sarangpaw hae tuh

sa kheit sanmah zo lan khyh hae;

ruiban a hoi leipaw sa kheit sanmah

um lan khyh.

Pawccecize Bawipaw nynh kawpya zah,

a muisaw nynh khah-e hae kha

a suelua vae hae.

17 Bawipaw nynh minmin hanlan

ccungthydungnaw raepah hae zah,

a kuih khate mih hanpaw kha

arui rawkhawpyate a neethung hae;

minmin nynh tuh-e ram tuh

zungzae a pee cih hae zah,

she kheit koute she kheit

tuin ram kya a um cih hae.