1 Pou Jakob ciihan hae,

Israel cite minphu athua hae paw te

Judah tuisung kyate a pou hae paw,

e hynh ngaetua oh;

Bawipaw min te bya na kinkuh oh zah,

Israel Pachia kha kae beik na ci oh,

thuasalama byaccing te,

ahme te na beik khyh oh.

2 Pawccecize minmin nynh

athyaapaw khuapi kya

a um hae paw te

Israel Pachia kha a doliakuh

hae paw nynh kae thua;

tuh-e Pachia min tuh

vaaw Bawipaw nynh thua, a ci hae.

3 Acyihkuh vae paw uccaw hae kong kha

langmawlya mawte phe ka la hodae vae,

tuh-e uccaw hae tuh ka khalang kyate

pou zah, ny lante ka la rae vae;

te tuh-e hae tuh palou ka cyih zah

a um vae hae.

4 Nang tuh a lungkhungpaw na thua zah,

na nging tuh sivaw, na terui tuh

sohin nynh thua cipaw ka ny keiccuze,

5 "Ka zohtuh nynh e hynh a cyih,

ka suhpaw zohtuh te

ka laeepaw zohtuh nynh

e hynh a cyih," cite na ho khyh nawlan,

e hae hynh langmawlya mawte

phe ka ho vae,

khah-e a um mawze nang kha

phe kae hopya vae.

6 E hae hynh phe na thae vae;

e hae balyn hynh atu dotua;

ming hae kalan na hopah lan khyh hae tou?

Atu te malang vae tuh,

uccaw thawpaw, na ny loh leipaw,

thuruhpaw uccaw hae kha kae hopah cih.

7 E hae hynh langmawlya te rae leite,

atu te rae athua hae,

"E hae hynh ka ny vae paw nynh thua,"

cite na ho kho khyh nawlan,

atunin athua maw tuh,

e hae kong hynh papin na thae boi khyh.

8 Na thae boi khyh zah na nyh boi khyh,

langmawlya te na nakaring kha

hungpya na thua khyh.

Pawccecize nang tuh kharouhmaw

zyn lan na um khyh,

na pui takaw te ccungccaw doutu

cite ko na thua.

9 Kae tuh ka min hanlan

ka thinrianaw kha ka ngaesang zah,

ka min thehoysah nawlan,

ka thinrianaw kha na hanlan ka synku,

tuhteze nynh nang kha kae vua lan khyh.

10 Nang kha akaw-aleih kae syntawtua,

thuasalama ngun hawte

kae syntawtua khyh;

teingnaw maeephupi kyakhe

kae syntawtua vae.

11 Ka min hanlan nynh ka cyi,

pawccemou ka min tuh

thethyasah athua cih?

Ka phu-enaw kha

ming hae ka pya lan khyh hae.

12 Pou Jakob, ka kokupaw Israel,

ka bya hynh yn ngaepya tua:

Kae tuh Pachia nynh ka thua;

kae tuh masaty ka thua zah

nyathyakou mah ka thua.✝

13 Ka kuih nynh laephi athonaw

aleihpaw kha tynsah zah,

ka ranglang kuih nynh

vaawlui kha tharae a daw;

vaaw te lae kha he ka ko hae tuh

pekite palou a thadyn hae.

14 Nae balyn te sueluakuh oh lah,

ngaetua oh!

Minmin laku e hum nynh mou

e uccaw hae hynh langmawlya te a la hodae?

Bawipaw nynh amaw kha a sungsah;

aning nynh Babilon khua khe

Bawipaw a eenaw kha

a ccingsah cih zah, a kuih nynh

Khaldi hae kha a rawse cih hae.

15 Kamaw ccaccei nynh amaw kha

ka hopah zah ka ko vae,

amaw kha ka cciakhae zah,

a laanpi kya a laan a sui a ua cih.

16 Ka kalan yn naekuh oh lah,

e bya hynh ngaetua oh!

Athotakawnaw kyate aruh lante

bya ka ho khyh,

tuh-e acyiku ccyh lya mawte

tuin kya kae ka um vae.

Atu tuh Bawipaw PACHIA nynh

kae te a Muisaw kha

oun sawkheih vae.

17 Nang ae Shawkhawtu,

Israel Pachia Athyaapaw,

Bawipaw nynh a hopaw tuh:

Kae tuh Bawipaw

na Pachia nynh ka thua,

nang na hoynaw hanlan

ae ccangpahtupaw te

nang nynh zui lan accanpaw laanpi kya

ae cciakhaetupaw nynh ka thua.

18 Ka kawbya hae kha la zui vae ii!

Tetuh na hoirumnaw tuh

vawpi hawte athua cih zah,

na taenaw tuh rili tuileih hawte athua cih;

19 na ciihan tuh laesia zeih acih cih zah,

na ccaaw na no hae tuh rili kya-e

lungpyng zeih acih cih hae;

mih min kha papin vua thua lan khyh,

ka malang te ro thua lan khyh hae.

20 Babilon kyate pou oh,

Khaldi hae kyate ccue oh,

tuh-e kong tuh lungtua siaruate

ho oh lah siakhae oh,

laephi adianaw cia thaesah oh;

"Bawipaw a ryalahtu Jakob kha

a shawkhaw vae!" cite ho oh.✝

21 Minmin kha laesia ram kya

he a cciakhae hae tuh

tuihaw khyh hae;

minmin hanlan lungpi kyate

tui a luasah;

lungpi kha poh hungsakuh zah

tui a pousah.

22 Bawipaw nynh, "Ccungccaw hoylei

hae paw hanlan daenaw um khyh," a ci.✝