1 Ethiopia ram e vaw hae khuraw lang

a umpaw ram kyakhe

sake abiakuhpaw roi accae.✝

2 Tuh-e ram kyate locceihtu hae kha

phaeku te araekuhpaw kohlung khate

Nal vawpi kyate a saw hae.

Pou athyrangpaw locceihtu hae,

a pyn hang zah

a ngesaw ahoypaw minphuin,

laephi pynpi nynh a ripyapaw,

a thawsaepaw te a taepaw minphuin,

vaw hae nynh a phia hae paw ram kya

a umpaw minphuin kalan khe cceih oh.

3 Laephi vawlan a um hae paw balyn,

mua vawlan syntawnaw alan

he a sae vae hae ze, do oh!

Mungkae he a tu vae hae ze, ngae oh!

4 Pawccecize Bawipaw nynh

yn hopyapaw tuh:

khuaninpaw kya ccaerarih lan

a aw hawte thuasah,

loohrue lya aso ccyh kya dantui te

phe beihpaw maeking hawte thuasah

ka umnaw kyate zya ka do cih.

5 Misu thae lo azaw maw,

apaw tuh khuakuh zah,

athae he avoi cciamang lyakhe,

atoih thawpaw kha rungkou te

a awpah cih zah phiariphiarae umpaw

akaran hae kha a baepah cih.

6 Minmin tuh mua vawlan umpaw

saw a aepaw pavaw hae te

laephi vaw e sarangpaw hae hanlan

cciataw athua cih hae.

Te saw a aepaw pavaw hae nynh

hawnin ccyh vae ze

minmin tungvaw a um cih hae zah,

laephi vaw e sarangpaw balyn nynh

khuaccih ccyh vae ze minmin tungvaw

a um cih hae.

7 Tuin ccyh vae tuh, a pyn hang zah a ngesaw ahoypaw, laephi pynpi nynh a ripyapaw, a thawsaepaw te a taepaw, vaw hae nynh a phia hae paw ram kya a umpaw minphuin nynh vaaw Bawipaw min a umnaw Zion Mua langkhe vaaw Bawipaw kalan lasung hae kha oun ccyng cih hae.