ISAIAH 62

Zion kya-e Thyaaccounaw te Khumnaw

1 Jerusalem thyaaccounaw tuh

awkhua takaw e awnaw hawte aw zah,

Jerusalem khumnaw tuh

phang a awpaw maeekhua hawte

athua mawlaezung,

Zion elang yccae leite ka um lan khyh zah,

Jerusalem elang zya ka dae lan khyh.

2 Minphuin hae nynh na kya-e

thyaaccounaw kha a muih cih hae zah,

siapharan hae balyn nynh

na phu-enaw kha a muih cih hae;

Bawipaw munglae nynh

ae phu cih paw min thawpaw khate

nang kha ko na thua cih.

3 Nang tuh Bawipaw kuih kya umpaw

apuithyapaw bawilukhung

na thua cih zah,

na Pachia kuih kya umpaw

siapharan lukhung na thua cih.

4 Nang kha vuapaw ccungccaw cite

ko na thua vae lan khyh zah,

na ram kha Ccungccaw Adaenaw ram

cite ko thua vae lan khyh;

a tungvaw Ka Lungrythuanung cite

ko na thua cih zah,

na ram tuh Vawpaw a hoipaw ram

cite ko athua cih;

pawccecize Bawipaw tuh

na tungvaw a lungrythua zah,

na ram tuh vawpaw a hoi vae cih.

5 Ccangvae te liaccaw tuh

zuvaw lang a tang hae hawte

nang ae raetupaw nynh nang kha

zuvaw lante ae umkhae cih,

zudy ccangvaepaw nynh

akaenung liaccanung tungvaw

a lungtua hawte, na Pachia tuh

na tungvaw a lungtua cih.

6 Pou Jerusalem,

na khualungrua vawlan khe

rhawviatu hae kha ka nung vae hae;

minmin tuh khuazi khuadae

umtaw lan khyh hae.

Bawipaw kha nysah thuinaw

a pya hae paw nanning,

zya dae nan oh,

7 Bawipaw nynh Jerusalem kha

tynsah zah, laephi pynpi kya

a min a thaansah mawlaezung

amaw kha umtawsah nan oh.

8 Bawipaw nynh a ranglang kuih te thuasah,

athungpaw a kuih te thuasah

bya a kinkupaw tuh:

Nae ccathae kha nae rhaw hae looh lang

bua ka pya vae lan khyh hae,

na bangnuathe oh paw misutui kha

ramccang hae nynh neih vae lan khyh hae;

9 tuh-e ccathae a ccakhung hae paw tuh

a ae cih hae zah,

Bawipaw kha a thehoysah cih hae,

misu thae a ccakhung hae paw tuh

athyaapaw ka voidu lungkhu khe

a neih cih hae.

10 Koikua kyate pou oh, pou oh,

ccungccaw hae hanlan laanpi kha

paccynpah oh;

laanluepi kha rae oh, rae oh,

lung hae kha phe thyaa lan vua oh,

ccungccaw hae luki khe

alan kha sae oh.

11 Bawipaw nynh laephi adianaw kyacia

a hopaw tuh:

"Dotua, nang ae khumtu tuh

yn cceih cciamang,

a ryalaw mee tuh amaw kya um zah,✝62.11: Isa 40.10; Bya 22.12

aning nynh mue lan a ccanpaw tuh

a malang khe a um," cite

Zion ccanung kha hopah oh.

12 Minmin kha, "Athyaapaw Ccungccaw hae,

Bawipaw nynh a Shawkhaw hae paw,"

cite ko athua cih hae zah,

nang kha, "Muih Athua Vae Paw,

Vua Athua Leipaw Khuapi,"

cite ko na thua cih.