1 Bawmnaw ngiaku khylan Izip ram lang

a cceihbung hae paw hanlan

ngaethya lan kou um!

Minmin nynh marang hae kha

a doliaku hae, myarya lungpaw

marangle hae te myarya thungpaw

marang rhawkaw hae kha

a doliaku hae,

thuasalama Israel Pachia

Athyaapaw kha doliakuh khyh hae,

Bawipaw kha

tuanaw ngiakuh khyh hae.

2 Tuhzemah Bawipaw tuh

myaryamaw haw zah

minmin tungvaw vawsawnaw a thuakhae;

aning nynh a bya kha ro leite,

hoyleinaw a rae hae paw te

ahoy leipaw rya a lah hae paw

a bawmtu hae kha

rawsete a thonuakuh cih hae.

3 Izip hae tuh Pachia thua khyh hae,

ccungccaw nynh thua hae;

mih marang hae tuh

muisaw thua khyh hae,

ngesaw nynh thua hae.

Bawipaw nynh a kuih he a dyng te,

a bawmtu hae tuh

a thy a pawkuh cih hae zah,

a bawm hae paw ccungccaw hae kha mah

a khuliakuh cih hae,

mih balyn mawte a rohkheih cih hae.

4 Bawipaw nynh kae yn hopyapaw tuh,

A teikupaw saw vawlan

a umpaw chindeih khyhze

chindeih taraw tuh

tuurin hae nynh a o hae zemah,

a sia a rua hae paw roi kha

rih khyh zah siikuh khyh,

tuhawte vaaw Bawipaw tuh

Zion Mua vawlan te

a mua sangpyng vawlan khe

rhawtuk khylan yn rungbung cih.

5 Pavaw nynh a taw kha

thungkhaw khylan a bu luki

a zou bungthung hawte,

vaaw Bawipaw nynh

Jerusalem kha a thungkhaw cih;

Jerusalem kha a thungkhaw cih zah

a luesah cih, a haang cih zah a khum cih.

6 Pou Israel ccungccaw hae, thawte na la dou oh paw Pachia kalan kithui ccavae oh. 7 Tuin nin khe nanning balyn nynh seibupite nae kuih te na la raeku oh paw nae sui zohtuh hae te nae ngun zohtuh hae kha ccaring na vua cih oh.

8 "Assiria hae tuh

ccungccaw thaloi athua leipaw

thaloi khate a khuliakuh cih hae;

ccungccaw thaloi athua leipaw

thaloi nynh minmin kha a roh cih hae;

thaloi kyate a ccue cih hae,

mih ccangvae hae kha nangsete

ryalawsah athua cih hae.

9 Mih siapharan tuh rikawte a ccue cih,

a rhawbawi hae tuh siikute

mih alan kha heize a ccuetaw cih hae," cite

a maee tuh Zion kya um zah,

a maeephupi tuh Jerusalem kya

a umpaw Bawipaw nynh a ho.