1 Tuin nin khe nopi lu sari nynh

pise lu kheit kha a kyng cih hae zah,

"Kaemaw looh kha kae ae cih zah

kaemaw boeining kha kae lawkuh cih;

kae maethyanaw kha khawku khylan

kae vawpaw cite ko kyalya

kae ko sah," oun ci cih hae.

2 Tuin nin khe Bawipaw kya-e thingkaran tuh a puithya cih zah a phu-e cih, ram kya-e looh athae tuh Israel hae laku e a hiinhy hae paw mih rykunaw te mih phu-enaw athua cih. 3 Zion te Jerusalem kya a laehypaw miakaw, Jerusalem kya ahiinhypaw ccazing kya a umpaw miakaw kha mithyaa cite ko athua cih, 4 Bawipaw nynh Zion ccanung hae kya-e nungsikunaw kha a singpya vae hae, Jerusalem lungkhu chiise luanaw kha byapianaw huhan te maeesoi huhan khate a thyaasah vae. 5 Te Zion Mua vawlan te tuin kya a pumkuh hae paw balyn luki khe Bawipaw nynh khuadae khe maeking a umsah cih zah khuazi khe maeekhuh te aruapaw maee a umsah cih. Pachia phu-enaw nynh khuapi kha abalyn mawte a bong cih zah a thungkhaw cih.✝ 6 A phu-enaw tuh khuapi kha khuadae asopaw kyate khaw khylan mynlyh athua cih zah, khuaa te khise kyate khum khylan khynnawpaw te bu athua cih.