1 Rili nynh avupaw ramkaw konglang Pachia nynh a hotypaw bya tuh:

Negeb kya akhiapaw khiccung hawte,

ri lan umpaw ram, ramkaw kyate

shethya yn thua.

2 Ri lan umpaw vizin kha ka muih;

a lungzi leipaw nynh a lungzi khyh,

te a rohtupaw nynh a ro.

Pou Elam hae, cciathung tua oh,

Pou Media hae, khuapi kha koihlu oh;

Babilon nynh a thuakhaepaw

teingnaw balyn kha ka thangsah.

3 Tukeiccuze ka tae myarya ccih;

neitangia a ccihpaw nopi hawte

teingnaw nynh yn thuanua vae;

nawthae lei lan ciate ka teing,

ngawmuih lei lan ciate

ka lungmuakhaekuh.

4 Ka thinlung azo, ri lan umpaw nynh

yn siisaku; ka ngaepaw zete ccyh tuh

ka hanlan thyngkunaw lang nynh a tang vae.

5 Minmin nynh loohdangkunaw poi kha

a paccyn hae,

haung nawlan boei kha a phae hae,

a neih hae, a ae hae.

Pou rhawbawi hae, thokuh oh lah,

khawriaphua kha chitui thuhtua oh!

6 Pawccecize Bawipaw nynh

kae kha yn hopah zah,

"La cceih lah, rhawviatu lu kheit la nung,

aning nynh a muihpaw kha ho sah.

7 Abuabuate oun thua hae paw

marang ccikuh hae paw,

lann ccikuh hae paw te

kalauh ccikuh hae paw kha

he a muih ze, aning nynh hoyte,

pekite nawngae sah," yn cipya.

8 Te rhawviatu nynh, "Pou Bawipaw,

rhawviainn kya khuadae ccyh kya

po ka thadyn, zidae rhaw po ka via.

9 Marang ccikuh hae paw tuh abuabuate

khuing kya oun thua hae!" cite a sia.

Te tuh-e paw nynh,

"Babilon a khuliakuh vae,

a khuliakuh vae;

a pachia hae, a zohtuh hae balyn tuh

laephi kya kaheikalah a koi vae hae," a ci.✝

10 Ccatan tin hawte tin athua hae paw,

pou ka ccungccaw hae,

vaaw Bawipaw , Israel Pachia kyate

ka thaepaw kha nae kalan kae thaesah oh.

11 Dumah konglang Pachia nynh

hotypaw bya tuh:

Lukheitpaw nynh Seir mua kyate yn ko zah,

"Pou rhawviatu, khuazi ccyh hynh

pawtemou athua cih?

Pou rhawviatu, khuazi ccyh hynh

pawtemou athua cih?" yn cipya.

12 Rhawviatu nynh,

"Awkhua ccyh yn thua zah,

zete ccyh mah yn thua. Nae khia ry ze,

yn cceih lah bua yn khia," a ci.

13 Arabia konglang Pachia nynh

a hotypaw bya tuh:

Pou khuaccong hae paw Dedan hae,

Arabia ramkaw khe

khuazi na rya cih oh.

14 Pou Tema ram kya um hae paw,

tuihaw hae paw hanlan

tui ccyngpah oh lah,

a ccue hae paw kha

sanlou te cciadue oh.

15 Pawccecize minmin tuh

thaloi rhaw kyate thuasah,

poh thuaakuhpaw thaloi kyate thuasah,

akoikuhpaw li kyate thuasah,

rhawtuk keiccu lungriathaenaw kyate thuasah a ccue hae.

16 Te Bawipaw nynh yn hopyapaw tuh: vaeluatu riapyanawpaw kum thyhte, kum kheit lungkhu khe Kedar minphuin a phu-enaw balyn tuh azo cih; 17 a laehypaw Kedar rhawkaw thekawthya hae paw tuh azya vae cih hae; pawccecize Bawipaw , Israel Pachia nynh a ho vae.