1 Dotua, dingnaw te a ukpaw

siapharan lu kheit yn um cih zah,

a kuihkaw e bawi hae nynh mah

byading te a uk cih hae.

2 Minmin tuh khisan kyate

rekunaw hmin hawte thuasah,

khise kyate khynnaw hmin hawte thuasah,

ramrou kya a luapaw

vawkhu hawte thuasah,

asonaw ram kya umpaw myarya lepaw

lungpi mynlyh hawte thuasah

athua cih hae.

3 Ngawmuih hae paw mit nynh

ccaerarih lan a muih cih zah,

nawthae hae paw nakaring nynh

naw a ngae cih.

4 Tueruamaerua a cyihthya hae paw

thinlung nynh tuasethyanaw a hoi cih zah,

mih lae-ah hae paw munglae nynh

arangte ccaepapeih lan bya a hothya cih.

5 Mingaee kha asung-epaw

ccungccaw cite ko vae lan khyh hae zah,

ccungccaw hoyleipaw kha

sawtua lan umpaw cite ko vae lan khyh hae.

6 Pawccecize mingaee nynh

ngaeenaw bya kha ho zah,

a thinlung te ahoy leipaw kha a paccyn:

A cyisahnaw kya Pachia rawrinaw um khyh,

Bawipaw konglang akyh leipaw

bya kha a ho, looh kanmawpaw kha

looh dang boi khyh zah,

tui kanmawpaw kha

tui pya lan a kang.

7 Ccungccaw hoyleipaw nynh

ahoy leipaw kha a cyi;

ahobou hae paw nynh

mih hanpaw kha hmerarih lante

a ngiaku hae heize, ryachi hae kha

hynbya te ro khylan

ahoy leipaw kha a paccyn hae.

8 Thuasalama asung-epaw

ccungccaw nynh tuh asung-epaw

uccaw hae kha paccyn zah,

asung-epaw uccaw hae liate

tynkaring lan a thadyn.

9 Thawdangte a um hae paw nopi hae,

thokuh oh lah, ka roi hynh ngaetua oh;

a sawphahkuhpaw nopi taraw hae,

ka hopaw hynh ngaetua oh.

10 Lungdaete a um hae paw nanning,

kum kheit lae ccapyh aro te,

thinphangte na um cih oh;

pawccecize misu thae loo lanpaw

na hoi lan khyh oh,

ccathae rue ccyh um lan khyh.

11 Thawdangte a um hae paw

nopi hae, thyngku tua oh,

a sawphahkuh hae paw nanning,

thinphangte umtua oh,

nae boeining khahkute nae sasete um oh lah,

nae tae kya buriboei kha voiku tua oh.

12 Lungrythua lan umpaw loo hanlan te

patae athaepaw misu ku hanlan

ngaethyate nae by kha tukuh oh,

13 pawccecize ka ccungccaw hae

laephi kha thuasah,

a lungpawpaw khuapi kya umpaw

a lungtuapaw innbyn hae balyn kha thuasah

hinpaw te thabu hae nynh

pong a zithin hae.

14 Siapharan inn kha vuasya athua cih zah

milu alungpaw khuapi kya

ccungccaw phe adae cih;

inn hae te rhawviainn hae tuh

sarangpaw umnaw akarung lang

zungzae a tang cih zah,

ramkaw e lann hae mih lungpawnaw hmin,

tuu hae a paeenaw hae hmin lang a tang cih;

15 te Pachia nynh a muisaw kha

kaening tungvaw oun sawpah zah,

ramkaw tuh athae alungpaw loo lang

tang zah, athae alungpaw loo tuh

ramkaw lante tua athua mawlaezung

tuhcite acyihkuh cih.

16 Tetuh byading tuh ramkaw kya

a um cih zah, dingnaw tuh

athae alungpaw loo kya a um cih.

17 Dingnaw athae tuh daenaw nynh thua,

dingnaw athanenawpaw tuh

zungzae daenaw te khynnaw nynh thua.

18 Ka ccungccaw hae tuh

adaenaw, akhynnaw te

adaepaw haeungnaw hmin kya

a um cih hae.

19 Hya accaw keiccuze ramkaw tuh

marya azo cih zah, khuapi tuh laephi te

phe nging lan khaleih ating cih.

20 Tui a umnaw miakaw kya

ccacii ccou hae zah,

vaetua te lann hae kha rythyte

a saw hae paw nanning tuh

lungtua hae paw nynh na thua oh.