1 Pou Zion, thaeku tua, thaekuh lah,

na thawzung kha thuaku tua!

Pou Jerusalem, athyaapaw khuapi,

apuithyapaw na boeining kha lawku tua;

pawccecize vingdung a awkuh lei hae paw te

athyaa lei hae paw tuh

na lungkhu lang tee vae lan khyh hae.✝

2 Pou a kyng hae paw Jerusalem,

vuiping kha pheihkuh lah, thoku tua.

Pou a kyng hae paw Zion ccanung,

na nging kya ae khiinaw hae paw

arui kha suku tua!

3 Bawipaw nynh a hopaw tuh: Nanning tuh amee leite zua na thua oh zah, phua pya leite shawkhaw na thua cih oh. 4 Bawipaw PACHIA nynh hynhte a ho: Langmaw lyaze ka ccungccaw hae tuh Izip ram kya ramccang ccungccaw lante umbua khylan, Izip ram lang a cceihbung hae; Assiria hae nynh mah akonglang um leite minmin kha a tuaa a sah hae. 5 Bawipaw nynh a hopaw tuh: Ka ccungccaw hae kha akonglang um leite a cciakhae hae, tukeiccuze atu pawtemou ka cyih cih? Minmin a uktu hae tuh lungtuate siarua hae zah, ka min kha nin takyh po yn theihrya hae, cite Bawipaw nynh a ci.✝ 6 Tukeiccuze ka ccungccaw hae nynh ka min kha yn nyh cih hae; tuin nin khe, minmin kalan bya a hotu tuh kamaw ka thuapaw kha a nyh cih hae; kae tuh hynh-e kyahin ka um.

7 Daenaw kong, thehoypaw kong,

khumnaw kong te

"Zion kha na Pachia nynh a uk,"

cite a hopaw zeccuetu a ccu tuh

mua vawlan khe

pawcih baban mou apuithya.✝

8 Ngaetua! Na rhawviatu hae nynh

mih roi kha saw hae zah,

lungtuate pynkheihlan hlaw a sah hae;

pawccecize Bawipaw nynh

Zion khua lang bua yn kipaw kha

minmin nynh ccaerarih lan a muih hae.

9 Jerusalem khua e arohpaw hmin hae,

pynkheihlan hlawsahte siatua oh;

pawccecize Bawipaw nynh

a ccungccaw hae kha

ngaengannaw pya vae hae zah,

Jerusalem kha a luesah vae.

10 Bawipaw nynh minphuin hae balyn

malang khe athyaapaw a thungnaw kha

a langsaku vae; ah Pachia khumnaw kha

laephi adianaw e hae

balyn nynh a muih cih hae.

11 Poutua oh, poutua oh,

Babilon kyate pou oh!

Athyaa leipaw kha ty nan oh;

khe hmin kyakhate pou oh;

Bawipaw uccaw a phu hae paw nanning,

naemaw kha thyaasakuh oh.✝

12 Nanning tuh rangkhirangkhaete

na pou lan khyh oh,

ccue te mah na ccue lan khyh oh;

pawccecize Bawipaw tuh

nae malang a cceih cih zah,

Israel Pachia tuh nae nulang te

ae rintu oh paw athua cih.

13 Dotua, ka ryalahtu tuh

a laan a sui a ua cih;

aning kha hangthungte

thehoysah athua cih zah

myarya a hangkuh cih.

14 A maesue tuh myarya roh zah

ccungccaw muinsan alo khyhpaw kha

a ngaeangthuapaw myarya alung,

15 tuhcite minphuin patae kha

a siisaku hae;✝

aning keiccuze siapharan hae tuh

mih khalang a huhkuh cih hae;

ming hae nynh minmin

a la dosah boi lei hae paw kha

minmin nynh a muih cih hae zah,

a la thae boi lei hae paw kha

a thaethya cih hae.