1 Dotua, Bawipaw kuih tuh

khum nawlan kharouh dyn khyh,

a nakaring tuh thae nawlan

kharouh pan khyh.

2 Nae hoyleinaw nynh nanning kha

nae Pachia kyate ae sawsaku oh,

nawthae khyh nawlan

nae seinaw nynh a mae kha

nanning kyate ccanglang a hawisah.

3 Pawccecize nae kuih tuh

chiise te nungsikuh zah,

nae kuihdung tuh hoyleinaw te

anungsikuh; nae munglae nynh

hynbya kha ho zah, nae lae nynh

hoyleinaw bya te a ccohku.

4 Humhung nynh mah

asasite ho khyh,

humhung nynh mah a byathan kha

hmerarih lan thuakhae khyh;

accakaepaw kha doliakuh hae zah,

hynbya kha a ho hae,

thyaruhnaw kha ccaaw lang poi hae zah,

hoyleinaw kha a saah hae.

5 Minmin nynh huparepaw tui kha

a keisah hae,

moisaw bu kha boei lang a kua hae;

mih tui a aepaw miakaw tuh a chih,

akoipaw atui nynh huparepaw lang akei.

6 Mih boeikua tuh boeining lang

tang kho khyh;

a raeku hae paw khate

mimaw kha bongkuh kho khyh hae.

Mih ryalaw tuh hoyleinaw ryalaw thua zah,

mih kuih kya puathonaw a um.

7 Mih ccu nynh hoyleinaw lang ccue zah,

seinaw a hoi leipaw kha

chia khylan a ccuenua hae;

mih tuanaw tuh ahoy leipaw

tuanaw thua zah, mih laanpi kya

riathaenaw te ronaw a um.✝

8 Daenaw laanpi kha nyh khyh hae zah,

mih laanpi kya byading um khyh.

Mih laanpi kha akoupaw laanpi lang

a rae hae;

tuh-e laanpi a zuipaw miakaw tuh

daenaw kha nyh khyh.

9 Tukeiccuze byading tuh

aening te sawkuh zah,

dingnaw tuh aening kyacia phah khyh;

awnaw kha ah ngaehoi oh zemah

mohnaw nynh a um;

awnaw kha ah ngaehoi oh zemah,

mohnaw kya nynh ah ccia oh.

10 A mitmohpaw hawte pang kha

po ah haetua oh,

a mit sae leipaw hawte

maemae ah zahkuh oh;

ninthuccynglyn pi khe zetepakaw

riryngmoh ccyh lya hawte

ah thy ah pawkuh oh,

mih thawsae hae paw laku kya tuh

michi hawte nynh ah thua oh.

11 Ah balyn mawte vong hae hawte

are-aro ah tuakuh oh;

vahu hawte ah khui oh.

Byading kha ah ngaehoi oh zemah

ah mue khyh oh;

khumnaw kha ah ngaehoi oh zemah

aening te asawkuh.

12 Kae cyiseimenaw tuh

Bawipaw na malang myarya alung,

kae seinaw nynh kaemaw kha

rawsete ccaekia a khan.

Kae cyiseinaw tuh kaemaw kya

phang um zah, kae nykupaw

kae seinaw hae tuh:

13 cyiseimenaw, Bawipaw kha

vuanaw, ah Pachia zuinaw kyate

ccanglang maekunaw,

tuaasahnaw byahonaw,

rawsenaw byahonaw te hynbya kha

ccykekute tuh-e tuh thinlung kyate

honaw kha nynh thua.

14 Byading tuh nulang ki zah,

dingnaw tuh asawnaw kya a thadyn;

byaccing tuh zapi malang khuliakuh zah,

dingnaw tuh tee kho khyh.

15 Byading tuh zo zah,

hoyleinaw a sibiapaw miakaw tuh

luadekunaw a tung.

Tuh-e tuh Bawipaw nynh muih zah,

byading a um khyh keiccuze

a lungryccing khyh.

16 Ccungccaw lu kheit san

um khyh cipaw a ny,

Hopiatu lu kheit san

a um khyhpaw kha a ngaeangthua;

tukeiccuze amaw a kuih nynh

amaw hanlan taenaw pya zah,

a dingnaw nynh amaw kha a bawm.✝

17 Dingnaw kha bykhaw hawte khawkuh zah,

khumnaw sivawlukhung kha

a khungku;

phulawnaw boei kha zingkuh zah,

thinrianaw angkile kha a kiku.✝

18 Mih cyisahnaw thyhte a liaru cih hae;

a rawsetu hae tungvaw

a thinkhykuh cih zah, a rhaw hae kha

a liaru cih hae;

rili khunglang e ram hae kha

a liaru cih hae.

19 Tukeiccuze niccaw lang

um hae paw nynh

Bawipaw min kha a rih cih hae zah,

nithua lang um hae paw nynh

a phu-enaw kha a rih cih hae;

Bawipaw khisan nynh mung zah

tingkhawpaw vawkhu tuh tui ale hawte

aning tuh yn thua cih.

20 Aning tuh Shawkhawtu hawte

Zion lang yn thua cih,

seinaw kyate a maeleihkuhpaw

Jakob ciihan hae kalan yn thua cih,

cite Bawipaw nynh a ci.✝

21 E ka byakinnaw hynh minmin ryte ka rae, cite Bawipaw nynh a ci: Nae tungvaw a umpaw ka muisaw te nae munglae kya ka nung vae paw ka bya tuh nae munglae, nae ccaaw hae munglae, nae mintaw hae munglae kyate atu te zungzae cia phiakuh lan khyh, cite Bawipaw nynh a ci.