1 Bawipaw nynh a hopaw tuh:

Vaawlui tuh ka bawitungkhung thua zah

laephi tuh ka ccu synaw nynh thua;

pawcihawpaw inn mou

ka hanlan nae sakpah cih oh?

Ka umnaw hmin tuh

pawcihawpaw mou athua?✝✝

2 E hae balyn hynh ka kuih te

ka raepaw athua keiccuze,

e hae balyn hynh ka kya-e nynh thua hae,

cite Bawipaw nynh a ci.

Zakaw a sangsakuhpaw,

a thinlung kya a ngaesikuhpaw te

ka bya keiccuze a thyngkuhpaw kha

ka do cih.

3 Tangnuapaw a theihpaw miakaw tuh

ccungccaw a theihpaw te nynh a loku;

tuutaw te silawnaw a raepaw miakaw tuh

ui nging a khyatupaw te nynh a loku;

ccathae silawnaw kha a raepaw miakaw tuh

voh chii a pyatu te nynh a loku;

mynkhuhpaw silawnaw lante

frankinsen kha a pyatu tuh

zohtuh kha hythua a pyatu te nynh a loku.

E ccungccaw hae tuh

mimaw laanpi kha pokuh hae zah,

mih nungsikunaw kyakhe

mih lungry athuakhaekuh.

4 Minmin hanlan saryanaw kha

ka popah cih hae zah

minmin nynh a ri hae paw kha

mih tungvaw ka thuasah cih;

pawccecize ka ko hae ze

hum nynh sanmah yn oi khyh,

bya ka ho vae ze yn ngaepah khyh hae;

ka muihnaw khe ahoy leipaw kha

cyih hae zah,

ka ry leipaw kha a poku hae.

5 Bawipaw bya keiccuze

a thyngkuh hae paw nanning,

amaw bya kha ngaetua oh:

Ka min keiccuze nanning

ae hua oh paw te ae vua oh paw

nae ccungccaw hae toulou nynh,

"Nae lungtuanaw kha kae muih nawlan,

Bawipaw tuh a phu-e sah," a ci hae;

thuasalama minmin tuh

maethyanaw a mue cih hae.

6 Khuapi kya-e siaruanaw roi te

beikinn kya-e roi tuh ngaetua oh!

A rhaw hae kha de a tah hae paw

Bawipaw roi nynh thua!

7 Ccanung Zion tuh

neitangia a cci mawkhe

a ccaaw a pui vae;

ccinaw nynh a thuanua mawze

ccapaw kha a saah vae.✝

8 Tuhcihawpaw tuh hummou a thae boi?

Tuhcihawpaw tuh hummou a muih boi?

Ram ramkheit tuh

nin kheit lungkhu a pui kho cih tou?

Minphuin phuin kheit tuh

ccyh sosoh kya a pui kho cih tou?

Tuhzemah Zion tuh

neitangia he accih takaw te

a ccaaw hae tuh palou a pui vae hae.

9 Ccaaw saahsah lante ka paccyn koute

saahsah leite ka um cih tou? cite

Bawipaw nynh a ci.

Ccaaw ka poisahpaw kha

puisah leite ka khee cih tou?

cite na Pachia nynh a ci.

10 Jerusalem a sungsah hae paw balyn,

amaw ryte lungtuakheih oh lah,

a hanlan nae lungpaw sah,

Jerusalem hanlan

a rah a khui hae paw balyn,

amaw ryte nae lungtua sah lah,

nae lungpaw sah,

11 tuhteze tuh ngaengansahpaw a matei kha

na zu cih oh zah na byn cih oh;

aphu-epaw a by kya-e kha

lungrythuakhaekute na zu cih oh.

12 Bawipaw nynh a hopaw tuh:

Jerusalem langkhe hoirumnaw kha

vaw hawte ka luasah cih zah,

minphuin ccangpaw hae sisua kha

paraeparae leikuhpaw vaw hawte

ka luasah cih;

nanning nynh a matei kha na zu cih oh,

a kuih te ae dua cih oh zah,

a ccukharu vawlan khe ae oi cih oh.

13 Nung nynh a ccaaw kha

a ngaengansah hawte,

nanning kha ngaengannaw kae pya cih oh;

Jerusalem khe ngaengannaw kha

pya na thua cih oh.

14 Tuh-e tuh na muih cih oh zah

nae lungpaw cih;

nae pyn tuh lonua hawte a lethung cih;

Bawipaw kuih tuh

a ryalahtu hae ryte umkheih zah,

a thinrianaw nynh a rhaw hae kha

a rawse hae cipaw ny athua cih.

15 Dotua, Bawipaw tuh

myarya a thinrianaw khate thuasah,

a kya-e thuiheinawpaw

maeesoi khate thuasah liaru khylan

khiccung tahawpaw

a marangle kha ccikute

maee khate yn thua cih.

16 Bawipaw nynh ccungccaw balyn kha

maee te thaloi khate bya a pia cih hae;

Bawipaw nynh a chia hae paw tuh

myarya alung cih hae.

17 Bawipaw nynh a hopaw tuh: Voh saw, pazu saw te anungsikuhpaw aepaw kha aete, angaelung e ccungccaw kha zui hae zah, khokhu kya mimaw toulou kha thyaaccousakuh hae zah a thyaasakuh hae paw tuh thangnaw kya a thuakheih cih hae.

18 Mih ryalaw te mih tuanaw kha ka ny, minphuin hae te alokuh leipaw bya a ho hae paw balyn kha suelua khylan kae thua cih; te minmin nynh oun thua cih hae zah ka phu-enaw kha a nyh cih hae, 19 minmin laku khe syntawnaw ccangkheit ka nung cih. Minmin kya-e a hiinhy hae paw kha Tarshish ram, Put ram te the kaw a thya hae paw Lud ram, Tubal ram te Javan ram, ka minthaannaw kha thae leite ka phu-enaw kha mah a nyh lei hae paw asawnaw rili khunglang e ram hae kalan ka saw cih hae; minmin nynh ka phu-enaw kha minphuin hae kya a siakhae cih hae. 20 Israel hae nynh ccathae silawnaw kha thyaararihpaw angphe te Bawipaw inn lang a cciakhae hae hawte, tuh-e ccungccaw hae nynh nae puizia hae kha marang, marangle, puihnawpaw, lann te kalauh vawlan khangte ram takyh kyate Bawipaw kalan pyapaw hawkhate athyaapaw ka mua Jerusalem langkhe a cciakhae cih hae, cite Bawipaw nynh a ci. 21 Minmin laku e abang kha ranpibawi lang te Levi minphuin lang ka nung cih hae, cite Bawipaw nynh a ci.

22 Ka rae cih paw vaaw thawpaw te

laephi thawpaw tuh

ka malang atyn hae hawte,

nae ciihan hae te nae min tuh atyn cih,

cite Bawipaw nynh a ci.✝

23 Sawpaw sah leihpaw takyh kya te

sabbath nin takyh kyakhe

ccungccaw balyn tuh

kae kha beik khylan ka malang

oun thua cih hae, cite

Bawipaw nynh a ci.

24 Minmin nynh oun pou cih hae zah kae yn doupaw ccungccaw hae rhua kha a do cih hae; mih saw a aepaw zanpaw hae tuh chih lan khyh hae, mih maee mah chih lan khyh, ccungccaw balyn malang anungsikuhpaw athua cih hae.✝