1 Atu alesaepaw Bawipaw,

vaaw Bawipaw nynh

Jerusalem khua te Judah ram kyate

bawmnaw te a doliaku hae paw

ccungccaw hae kha

a lah vae cih—

a bawm hae paw sanlou te tui—

2 a rawthungpaw te rhawkaw,

byapiatu te profeh,

a pawepaw te kum tangpaw,

3 rhawbawi te uktu bawi,

tuanaw pyatu te mitleihthyapaw,

byaho apuakuh hae paw kha

a lah cih hae.

4 Pise taraw hae kha minmin uktu lang

ka nung cih hae zah,

nosi hae nynh minmin kha a uk cih hae.

5 Ccungccaw hae tuh lu kheit te lu kheit,

innpaw lu kheit te lu kheit,

vawsaw a pyakuh cih hae;

mino nynh piccan kha sawtua lan khyh,

ccungccalei hae paw nynh sawtuaruapaw

ccungccaw hae kha sawtua lan khyh hae.

6 Lukhakheit nynh phin kheit

athua hae paw a puizia kha heize

a kyngde cih zah,

"Nang tuh boeining na hoi;

kaening oun cciakhaetu lang

oun umpah lah, hynh-e arohpaw

apumkuhpaw hynh

na uknaw zakaw a um cih," a cipah cih hae.

7 Thuasalama aning nynh,

"Kae tuh a raethuitu ka thua kho lan khyh;

ka inn kya sanlou um khyh,

boeining mah um khyh;

ccungccaw cciakhaetu lang

yn nung nan oh," cite

siaruate a ho cih.

8 Jerusalem tuh a pu vae,

Judah tuh a khuliakuh vae,

pawccecize mih byaho te

mih cyisahnaw nynh

Bawipaw kha rawse zah

a umnaw aphu-epaw kha a thusah hae.

9 Mih maesue nynh minmin kha

rawsete ccaekia a khan;

Sodom khuaccaaw hae hawte

mih seinaw kha pheiku leite

a phyku hae.

Minmin hanlan ngaethya lan kou um!

Pawccecize mimaw tungvaw

hoyleinaw kha a thuakhaeku hae.

10 Miding hae tuh mih lungtua cih

cipaw kha miding hae kha hopah hae,

pawccecize mih ryalaw mee

athae kha a ae cih hae.

11 Ccungccaw hoylei hae paw hanlan

ngaethya lan kou um! Hoyleinaw

a tung hae paw nynh thua hae,

pawccecize a la cyi hae paw kha

mih tungvaw kya cyiru athua cih.

12 Imua hae nynh ka ccungccaw hae kha

a tuaa a sah hae,

nopi hae nynh minmin kha a uk hae.

Pou ka ccungccaw hae,

nanning ae cciakhae oh paw nynh

nanning kha ae cciakhaesei oh zah

na ccianaw oh paw laanpi kha ae ropya oh.

13 Bawipaw tuh a byathan kha

ho khylan a paccynkuh vae;

a ccungccaw hae kha

byapia khylan a thadyn vae.

14 Bawipaw nynh a ccungccaw hae kya-e

piccan hae te uktu bawi hae kha

byapianaw lungkhu lang a teekhae hae:

Nanning nynh misu khokhu kha na lua oh;

ryachi hae uccaw na luade oh paw kha

nae inn kya a um.

15 Pawccemou ka ccungccaw hae kha

na miade oh zah, ryachi hae mae kha

na tude oh? cite Bawipaw

vaaw Pachia nynh a ci.

16 Bawipaw nynh a hopaw tuh:

Zion ccanung hae tuh lysakuh hae zah,

maemae angthungte a cceih hae,

pise hae kha darote phalah do hae zah

a ccia vae hae ze byabyate a kaw hae,

mih ccu kya a khiiku hae paw

khinling taraw kha a ccaesah bia hae.

17 Bawipaw nynh Zion ccanung hae

lu kha a o cih hae,

Bawipaw nynh mih ccakaete

a nung cih hae zah maethya

a law cih hae.

18 Tuin nin khe Bawipaw nynh ccu kya ccaankunawpaw hae, lu kya voikupaw hae, nging kya oikupaw hae, 19 si alungmung hae, khawccan hae, mae kya bongkupaw hae; 20 lukhung hae, kuih kya khiikupaw hae, taeccia hae, zimuin bawng hae te mitleih uccaw hae; 21 tazeih kuihpu hae te naduhhuing hae; 22 ahoypaw boei hae, angkiccua, poi toonawpaw angki hae te kuihccyng zaw hae; 23 myarya pahpaw boeining, pavua hae, pungde hae te mae bongkupaw boei hae kha a lawpah cih hae.

24 Zimuin hanpaw athuhpaw,

taeccia nebaleihpaw hanpaw

tangkaraepaw arui;

akhekuhpaw sang nebaleihpaw hanpaw lu-o;

ahoypaw boei nebaleihpaw hanpaw

buriboei ahuikuhpaw;

puithyanaw nebaleihpaw hanpaw

maethyanaw athua cih.

25 Na ccungccaw hae tuh thaloi te

a khuliakuh cih hae zah,

na rhawkaw hae tuh rhawtuknaw kya

a khuliakuh cih hae.

26 Khuapi koikua hae tuh

mih ngaethah cih zah

a rah a khui cih hae;

khuapi tuh boeining leite

laekhu a haungpaw

nopinung hawte athua cih.