1 Bawipaw nynh a hopaw tuh:

Byading kha ccykekuh lah,

ahmepaw kha cyitua,

ccyh aro mawze ka khumnaw tuh

yn thua cih zah, ka kya-e

luenaw tuh yn langkuh cih.

2 Sabbath nin kha

thusah leite sungkuh zah,

hoyleinaw miakaw kha rae leite

a sungkuhpaw tuh

lungtuapaw nynh thua;

hynh-e hae hynh tynkaring lan

a kyngkuhpaw tuh

lungtuapaw nynh thua.

3 Bawipaw kya a kyngkuhpaw

ramccang ccungccaw nynh,

"Bawipaw nynh a ccungccaw hae kyate

kae kha yn phia ccaccing cih," cite ho nan sah;

tinriapaw ccungccaw nynh mah,

"Kae tuh thingku aroupaw nynh

ka thua," cite ho nan sah.

4 Bawipaw nynh a hopaw tuh:

Ka sabbath kha sung zah

ka lungrypaw uccaw kha pokute

ka byakin kha tynkaring lan

a kyngkuhpaw tinriapaw

ccungccaw hae kalan khe

5 ccanung ccapaw hae laeze

aphute huapaw

liathuinawpaw uccaw te min kha

ka inn te ka khualungrua lungkhu khe

ka pya cih hae;

azo kho leipaw zungzae tynpaw

min kha ka pya cih hae.

6 Bawipaw rya kha law khylan,

a min kha sungsah khylan te

amaw ryalahtu lang tang khylan

Bawipaw kya a kyngkuhpaw

ramccang hae kha thuasah,

sabbath kha thusah leite sung zah,

ka byakin kha tynkaring lan

a kyngkuhpaw balyn kha thuasah

7 athyaapaw ka mua kalan

ka cciakhae cih hae zah,

sawsangnawpaw ka inn kyakhe

mih lung ka tuasah cih hae;

maee-ute si a law hae paw te

si a lawnaw hae paw kha

ka silawhang vawlan khe

ccoupya athua cih hae;

ka inn tuh ccungccaw balyn hanlan

sawsangnaw inn cite a ko cih hae.✝

8 Phiariphiarae um hae paw

Israel hae kha a suelua hae paw

Bawipaw Pachia nynh hynhte a ho,

"A sueluakuh vae hae paw laelan

ccangpaw hae kha mah

minmin kalan ka sueluabua

ung cih hae," a ci.

9 Nanning, loramsaw hae balyn,

ramkaw e loramsaw hae balyn,

tei khylan rang oh!

10 Israel rhawviatu hae tuh

mih mit amoh, mih balyn mawte

nythyanaw hoi khyh hae;

minmin balyn tuh ngoh kho leite

yccae leipaw ui hae nynh thua hae;

ih hae zah maan a sah hae,

i kyalya kha a ry hae.

11 Myarya ae kho hae zah

a byn kho leipaw ui hae nyn thua hae.

Tuurin hae nynh mah

nythyanaw hoi khyh hae;

mimaw laanpi langkhe nynh

pong a maeku vae hae,

mih balyn mawte mimaw

thanenaw kyalya kha a ccungku hae.

12 Minmin nynh, "Rang oh,

misutui neih oh sih;

ruithyapaw kha

phe byn lan neih oh sih.

Awkhualan tuh atunin hawte

athua cih zah, ho kho um lei lan

ahoyhua cih," a ciku hae.