1 Misutui a rui hae paw, looh patae te

a thokhaekuh hae paw mih lu kya a umpaw,

Efraim phin aruithya hae paw kya-e

lysakunawpaw haetapawsi te

minmin kya-e aphu-e zah apuithyapaw te

anaanthyapaw haetapaw hanlan

ngaethya lan kou um!

2 Dotua, Bawipaw nynh athawsaepaw te

athungpaw ccungccaw kha a hoi;

tuh-e ccungccapaw tuh

hya a ccawbiapaw khise,

uccaw arosah thyapaw

khise hawte athua cih zah,

athawsaepaw khise, paepae leikuh lan

alepaw tui hawte athua cih;

tuh-e paw nynh a kuih te

minmin kha laekhu khe

a deihnah cih hae.

3 Efraim phin aruithya hae paw kya-e

lysakunawpaw haetapawsi tuh

ccu te syde athua cih.

4 Looh patae te a thokhaekuh hae paw

mih lu kya a umpaw

aphu-e zah apuithyapaw te

anaanthyapaw haetapaw tuh

hawnin azaw maw athae typaw

thaeku thae hawte athua cih;

tuh-e athae a muihpaw miakaw nynh

a kuih kya he athua te palou a ae.

5 Tuin nin kya vaaw Bawipaw tuh

a laehypaw a ccungccaw hae hanlan

aphu-epaw haetapawsi,

apuithyapaw bawilukhung athua cih;

6 byapianaw kya a haung hae paw kha

dingnaw thinlung a pya cih hae zah,

khua koikua kyakhe

rhaw hae a kisahtu hae paw kha

thawzung a pya cih hae.

7 E hae zemah misutui keiccuze

vyavya khuliakuh hae zah,

ruithyapaw keiccuze

tangkitangkae lante a cceih hae;

ranpibawi hae te profeh hae tuh

ruithyapaw niapaw keiccuze

vyavya a khuliakuh hae,

misutui keiccuze mih lungzo,

ruithyapaw niapaw keiccuze

tangkitangkae lante a cceih hae;

minmin nynh a muih hae paw

vizin tuh phe sei zah, mimaw nynh

bya a piapya hae paw kyakhe

a thy a pawkuh hae.

8 Mih ccaboi balyn tuh

anungsikuhpaw lua te phe beih zah

accikankunaw hmin um khyh.

9 "Aning nynh hum kha mou

hawnaw a ccangpah cih zah,

hum kha mou phungbya kha a hopah cih?

Mateitui kyate phiapaw,

nung matei kyate phiapaw tuh

hummou athua?

10 Phunglang ccangkheit vawlan ccangkheit,

aring ring kheit vawlan ring kheit,

ccangku lanpaw kha ccangkheit koute

ccangkheit te nynh athua," cite

minmin nynh a ci hae.

11 Thanccingte, a kawccae leipaw mung te

ramccangpaw munglae khate

e ccungccaw hae hynh

aning nynh a hopah cih hae.✝

12 Aning nynh minmin kha,

"E hynh haeungnaw,

mih riathae hae paw hanlan

ngaengannaw nynh thua,

e hynh thawdangnaw nynh thua,"

cite a hopya hae zemah,

minmin nynh thaepah khyh hae.

13 Tukeiccuze minmin nynh a ccia hae ze,

nulang khuliakute, khyate,

kaangkae te, kyng athua nawlan hae,

Bawipaw bya tuh minmin hanlan,

"Phunglang ccangkheit vawlan ccangkheit,

aring ring kheit vawlan ring kheit,

ccangku lanpaw kha ccangkheit koute

ccangkheit," cite a um.

14 Tukeiccuze Jerusalem kya umpaw

e ccungccaw hae a uktu nanning

a puatho hae paw,

Bawipaw bya hynh ngaetua oh.

15 Pawccecize nanning nynh,

"Chinaw te byakinnaw kha

phe ah rae vae oh,

Michi khua te nawccawnaw phe ah hoi vae oh;

vawsawnaw he yn thua ze,

aening kalan thua vae lan khyh;

pawccecize lingnaw kha khynnaw lang

phe ah thuruhkuh vae oh,

hynbya kyakhe phe ah thuruh vae oh," na ci oh,

16 tukeiccuze Bawipaw PACHIA nynh

hynhte a ho,

Zion kyakhe athonaw aleihpaw lung,

syntawtuapaw lung, aphutepaw apaki lang e

abyapi huapaw lung,

atynpaw athonaw aleihpaw

ccangkheit kha ka bing cih,

tuh-e lung kyakhe, "A zynpaw tuh

siikuh lan khyh," cite a um.✝

17 Byading kha aphae lang

tounawpaw arui lang ka rae cih zah,

dingnaw kha akaw lang

tounawpaw arui lang ka rae cih;

hya nynh khynnawpaw hynbya kha

phe zo lan a ccawphu cih zah,

tui alepaw nynh rekunawpaw kha avu cih.

18 Tetuh chinaw te na raekheih oh paw

byakinnaw tuh aroh cih zah,

Michi khua te na raekheih oh paw

nawccawnaw tuh azo cih;

vawsawnaw he yn thua te,

nanning kha ae khulia cih oh.

19 Tuh-e vawsawnaw nynh atu te atu

ae thuanua cih oh zah, ae lah cih oh;

pawccecize tuh-e vawsawnaw nynh

awkhua takyhte, khuazi khuadae

ae thuanua cih oh; tuh-e konglang

thae kyalya mawte rinaw a um cih.

20 Ikhung tuh a dyngku nawlan

myaryamaw dyn zah, boei tuh

a thyku lan myaryamaw abypaw

ccungccapaw hawte na thua cih oh.

21 Bawipaw tuh a la cyimaepaw te

alokuh leipaw kha cyi khylan te,

a la lawmaepaw a ryalaw te

alokuh leipaw a ryalaw kha law khylan,

Perazim Mua vawlan a thoku hawte

yn thokuh cih zah, Gibeon accya kya

a thinria hawte aria cih.✝

22 Tukeiccuze atu puasakuh nan vae oh,

tuhkhyhze tuh houh accih lante

ae heede cih oh;

pawccecize ram pynpi mawte

ronaw a um cih cipaw kha

vaaw Bawipaw kyate ka thae vae.

23 Ngae oh lah, ka roi hynh thaetua oh;

ka hopaw bya hynh hoyte thaetua oh.

24 Leithuepaw nynh ccacii lin nawlan

thue kyalya po thue zah,

a laephi kha thyhleih kyalya

po a thyhleih zawtou?

25 Lei kya-e laephi kha he a nginsah koute,

pucinan te khanmuin kha lin khyh hae tou?

Chanvuih kha atantante, barli kha

angaekunaw hmin khe ccou zah,

loori kyakhe ccangpaw ccacii hae kha

ccou khyh tou?

26 Pawccecize a Pachia nynh

ryalawthyanaw kha hoyte a ccangpya.

27 Pucinan amung kha khua nawlan

thingphe kha mang khyh hae,

khanmuin amung khua nawlan

vaetuale ccu kha mang khyh hae,

thuasalama pucinan amung kha

ccungngue taraw te khua hae zah,

khanmuin kha mah

ccungngue te nynh a khua hae.

28 Chanvuih vui kha a tin hae;

thuasalama khah-e kha

zungzae po tin khyh hae,

leccu te marang khate miasah hae zah,

aphaw kha palae tui lan mia khyh hae.

29 E hawnaw hynh mah

vaaw Bawipaw kyate nynh yn thua;

a tuanaw pyapaw tuh

ngaeangthua lan um zah,

a hawnaw tuh myarya ahang.