1 Bawipaw nynh a hopaw tuh:

Kae yn dou hae paw hanlan

ngaethya lan kou um,

minmin nynh ka khuakhannaw

athua leipaw kha a cyi hae;

ka rynaw te arawsekuhpaw

nawccawkheihnaw kha rae hae zah,

seinaw vawlan ccangpaw seinaw kha

a biachih hae;

2 Ka tuanaw kha khiaty leite,

Faro siapharan thungkhawnaw kya

um khylan te Izip mynlyh kya

reku khylan, Izip ram lang

a cceihbung hae.

3 Tukeiccuze Faro kya-e

thungkhawnaw tuh

nae maethyanaw lang a tang cih zah,

Izip mynlyh kya rekunaw tuh

nae thethyanaw lang a tang cih.

4 Mih bawi hae tuh

Zoan khua um vae hae zah,

mih locceihtu hae tuh

Hanes khua a thua vae hae zemah,

5 Judah hae tungvaw thanenaw

a pya kho lei hae paw,

bawmnaw te thanenaw thuakhae leite

maethyanaw te thethyanaw

a thuakhaepaw ccungccaw hae keiccuze

maethyanaw ccarou a mue hae.

6 Alia lang e laesia ram kya umpaw

sarangpaw hae te asekuhpaw Pachia bya tuh:

Vawsawnaw te riathaenaw ram,

chindeih pinung te chindeih nopaw,

huparepaw te azouthyapaw hupaw

a umnaw hae ram kya po a cceih hae,

minmin nynh mih uccaw hae kha

lann hae tungvaw kya,

mih sisua kha kalauh tungvaw kya

khang hae zah, minmin hanlan

a thane kho lei hae paw

minphuin hae kalan khe a cciakhae hae.

7 Pawccecize Izip kya-e bawmnaw tuh

ccungkia leipaw te accakaepaw nynh thua,

tukeiccuze Izip kha,

"Daebabi lan a haungpaw Rahab,"

cite min ka phu vae.

8 Atu cceih lah, minmin malang

lungphe vawlan zeitua,

yn thua cih paw ccyh kya zungzae tynpaw

ccaekia lang a tang nawlan,

ccauh kya zeitua.

9 Pawccecize minmin tuh

Pachia a doupaw minphuin,

a lungzi leipaw ccaaw hae,

Bawipaw thuiheinaw kha

a ngae ry leipaw ccaaw hae nynh thua hae;

10 minmin nynh muihdaetu hae kha,

"Muihdae nan oh," cipah hae zah,

profeh hae kha, "Kaening kalan

akyhpaw profehbya kha

oun hopah nan oh;

nawpalyapaw bya kha

oun hopah oh lah,

lingkunaw bya kha oun hopah oh,

11 e laanpi hynh cciataw oh lah,

ccanglang maekuh oh,

Israel Pachia Athyaapaw kong kha

oun thaesah nan vae oh," a cipya hae.

12 Tukeiccuze Israel Pachia

Athyaapaw nynh a hopaw tuh:

Nanning nynh e bya hynh na ei oh zah,

tuaasahkunaw te hynhunaw kha doliakute

khah-e hae kha na reihpeku oh keiccuze,

13 e hoyleinaw hynh nanning hanlan

a tang cih zah,

lungrua ahangnaw kya um zah

adohhypaw, vyavya atingpaw

lungrua hawte athua cih,

tuh-e lungrua tuh vaekheitmawte,

palou atinthya.

14 Tuh-e tuh ang akoipaw hawte akoi cih,

ang tuh koi zah maeephu lungkhu e

maee-e law nawlan thuasah,

tuisung kya-e tui the nawlan thuasah

akoinahpaw tuh mang lan asy lei lan ciate

dy leite palae tui lan koi athua.

15 Israel Pachia Athyaapaw,

Bawipaw PACHIA nynh a hopaw tuh:

Nanning nynh na kithui oh zah

daebabi lan na um oh ze,

khum na thua cih oh;

daebabi lan na um oh zah

na doliaku oh ze, thawzung na hoi cih oh.

Thuasalama na ei oh zah,

16 nanning nynh,

"Kae ry khyh! Marang ccikute

kae ccue cih," na ci oh;

tukeiccuze na ccue cih oh!

"Myarya rangpaw marang tungvaw

kae ccikuh cih," na ci oh,

tukeiccuze nanning ae deehui oh paw tuh

myarya arang cih hae!

17 Nanning tuh mua dung kya

bingkuhpaw alan tung hawte thuasah,

mua sangpyng vawlan umpaw

syntawnawpaw hawte thuasah

na thua mawlaezung oh, lu kheit nynh

nanning kha ae sii oh ze

milu thong kheit na ccue cih oh zah,

lu pangaw nynh ae sii oh ze

pong na ccue cih oh.

18 Thuasalama Bawipaw nynh nanning kha

thawcci khylan phang ae ngaw oh;

nae tungvaw ngaethyaumsahnaw

langsaku khylan aning tuh yn thokuh cih.

Pawccecize Bawipaw tuh

dingnaw Pachia nynh thua;

amaw a ngaehoikupaw balyn tuh

lungtuapaw nynh thua hae.

19 Thanccingte, pou Jerusalem a um hae paw Zion ccungccaw hae, rawkhuite na um vae lan khyh oh. Na siarua oh paw kha thae zah, nanning kha thaw ae ccih ccaccing cih oh; aning nynh he a thae te, ae leih cih oh. 20 Bawipaw nynh nanning kha vawsawnaw looh te riathaenaw tui kha ae pya oh zemah, nae Sazaepaw nynh ae retawkuh vae lan khyh oh, nae mit te nae Sazaepaw kha na muih vae cih oh. 21 Nanning nynh ranglang khyhze voilang he na maeku oh ze, "E hynh akyhpaw laanpi nynh thua, e laanpi hynh zui oh," cite a hopaw nae nulang e bya kha nae nakaring te na thae cih oh. 22 Tetuh ngun atheikuhpaw zohtuh hae te sui atheikuhpaw zohtuh hae kha anungsikuhpaw lang na ria vae cih oh. Anungsikuhpaw boeipue hawte ccaring na vua cih oh zah, "Kae muih ry vae khyh oh!" na cipah vae cih oh.

23 Laephi kya na ccoupaw ccacii hanlan khuaa kha a rawsah cih, te laephi nynh a pousahpaw looh tuh myarya avoi cih. Tuin nin kya tuh na sahiin hae tuh akopaw hmin kya ram a paeekuh cih hae. 24 Lei a thue hae paw tangnua hae te lann hae nynh paraw te ccangkung khate cciccaepaw sahiin looh kha a ae cih hae. 25 Rhaw hae patae kha na theih oh zah rhawviainn hae kha he na tingsah oh te, ahangpaw mua miakaw te ahangpaw sangpyng miakaw kya tui aluapaw vaw hae a um cih. 26 Tuhpiaze Bawipaw nynh a ccungccaw hae vaemaw kha heepah hae zah, minmin nynh a mue hae paw vaemaw kha he a dansah hae nin khe, sawpaw awnaw tuh khuanin awnaw hawte athua cih, te khuanin awnaw tuh nin sari lungkhu e awnaw hawte, leit sari a aw cih.

27 Dotua, Bawipaw min tuh

asawnaw kyate yn thua,

a thinrianaw tuh maee lang rua zah

maeekhuh lang akhuh;

a munglae tuh thinrianaw te phe beih zah,

a lae tuh arua cciamangpaw

maee te nynh aloku;

28 a hysue tuh nging kyacia phe avu lan ciate

tui myarya alepaw vaw te nynh aloku,

tuh-e a hy tuh minphuin hae kha

ronaw pasaryh te ryh khylan te

ccungccaw hae kha a cciasah sei hae paw

rangtei rui kha mih mung kya

teisah khylan nynh thua.

29 Athyaapaw poi tua lya khuazi hawte, nanning nynh hlaw na sah cih oh; Israel Lungpi, Bawipaw mua langkhe phyly tubiakute ccia hawte nae lungpaw cih. 30 Bawipaw nynh alesaepaw a roi kha a thaesah cih hae zah a kuih thawzung kha a muihsah cih hae, myaryamaw thinrianaw te arua cciamangpaw maeesoi kha khise te khuaa te ria rykhate a langsakuh cih. 31 Bawipaw nynh Assiria hae kha a ccoi te he a tuk hae te, a roi keiccuze minmin tuh rikawte a thyngkuh cih hae. 32 Bawipaw nynh minmin kha detahnawpaw hoitang te a bua takyh hae te, tintang te phyly roi mah accaebua cih; Assiria kha thawmawte a tuk cih. 33 Pawccecize Assiria siapharan kha maee te unaw lanpaw ahmin kha langmawlya mawte paccyn ty athua vae; thanccingte tuh-e hmin tuh siapharan hanlan paccyn ty athua vae, maee-unaw hmin tuh ko zah akhu lante maeething patae rykhate rae athua vae, kemaee atui alopaw Bawipaw hy nynh maeething kha a u cih.