Jó 42

10 जेबे अय्यूब आपणे तीऊँ दोस्ता खे माफ करने रिया तँईं प्रार्थना करी चुकेया, तेबे प्रभुए तेसरा सारा दु:ख दूर कित्तेया ओर जितणी तअन-दौलत अय्यूबो गे पईले थी, तिजी रा दुगणा प्रभुए अय्यूबो खे वापस दित्तेया। 11 तेबे तेसरे सब पाई, सब बईणा ओर जितणे लोक तेसखे पईले जाणो-पछयाणो थे, तिने सबी तेसरे कअरे आई की तेस साथे रोटी खाई ओर जितणिया बिपदा प्रभुए तेस पाँदे पाईया थिया, तिजी रिया तँईं तिने दलासा दित्तेया ओर अय्यूबो खे शान्ति दित्ती ओर तेसखे एक-एक चाँदिए रा सिक्का ओर सूईने री एक-एक बाल़ी दित्ती।*42:11 ये चाँदिए रा एक बिना कड़ेया दा टुकड़ा था जेतेरा इस्तेमाल सिक्के बनाणे ते पईले खरीदणे ओर बेचणे दे कित्तेया जाओ था। (उत्प. 24:47; यशा. 3.21), ओर (उत्प. 35:4; निर्ग. 32:2-3; न्यायियो 8:24)। 12 जो आशीष प्रभुए अय्यूबो खे पईले दित्ती थी तिजी ते जादा आशीष एबे दित्ती ओर तेसगे चौदा ह्जार पेडा-बाकरिया, छे ह्जार ऊँट, एक ह्जार बल़दा रिया जोड़िया ओर एक ह्जार गह्दिया ऊईगिया। 13 तेसरे सात माठे ओर तीन बेटिया बी जम्मिया। 14 इना बीचा ते तिने बड़ी बेटिया रा नाओं यमीमा, दूजिया रा कसीआ ओर तीजिया रा नाओं केरेन्हप्पूक राखेया। 15 तेस सारे देशो रे एड़िया जवाणसा केथी नि थिया, जो अय्यूबो री बेटिया जेड़िया बांकिया ओ ओर तिना रे बाओ अय्यूबे तिना रे पाईया साथे ई तिना खे बी आपणियां जायदाता दे इस्सा दित्तेया। 16 आपणे दुख पुगतणे ते बाद अय्यूब 140 साला तक जिऊँदा रया ओर तिने चार पीढ़िया तक आपणा वंश देखेया। 17 ईंयाँ अय्यूब स्याणा ओर बऊत उम्रा रा ऊई की मरीगा।