Mateus 21

Ɔzhizɔsi A Ta Uwɛyi Uwu Oboriyo Kenzu

18 Ɔzhizɔsi a wɔ mu kwoto mu kwoto a gba e sheye mu kwuse, lonzu ba lu wo wu mo. 19 A ma uwɛyi uwu oboriyo mu kenzu unga ɔgwuzɛ akwɛyi a ka mba wu. E du epwepu bi moo u muma mo. Akwɛyi a za laa uwɛyi ɔnwu tee <<Ŋɔ muma gbee fo!>> Mɔmɔɔmɔ uwɛyi ɔnwu u shirima.

20 Tabɔkɔ Wavɔngɔkiya o ma ɛlɛ izele i yi mbo mo akwɛyi o yo tee, <<I wo la bɔkɔ uwɛyi uwu oboriyo ɔlɛ u shirima efyefya te?>>

21 Akwɛyi Ɔzhizɔsi a gba mba opwu tee <<Mi so yi ongbulolo, gba lu yi ikwu idu lu fulo akwɛyi lu yi egbo epo mo, lu do tee lu wo iyi bɔkɔ mi wo uwɛyi uwu oboriyo ɔlɛ. Akwu iyi i wo uwɛyi uwu oboriyo le kɛɛkyi mo, lu do te luu za laa lɔwa kwɔlɛ tee, <Yimo, so kaa ta mu risu,> ba ii wo tayi. 22 Gba lu kwu idu lu fulo mu Ukpo, kiya ingyinangyina ingyi lu nda wu, lu fya ngyi ma.>>