Omatiyu 22

Kwuyo Mɛka Iyi Iyimo Mu Kwuvɔ

23 Mu ɔnɔnungawu, Asadusi umbafo, umba zɔ tee iyimo mu lukwu i yi mo awu, o bo mbaa Ɔzhizɔsi la kwuyo. 24 O za wu tee, <<U zɔ kiya,>> <<Omosisi a za nzu tee, gba ɔnumboko e kpomo e shi umɛ mo, umanyiwu le to oko awu kaa laa mbawu ɛmɛ. 25 Mekyi ki yi ɛmɛnɛ umbafo werewo munɛ. Umɛ uwakɔ e to oko, e kpomo e shi umɛ mo. Oko wu a ŋa laa umanyiwu kwuwongu e yi umɛ mo. 26 Inyinyi gba i du umanyiwu uwopo mbala uwɔla nzhii ba uworo le. 27 Mizhikembo iyi ɛlɛ, oko awu e kpomo tete. 28 So nzu ŋanɛ, ɔnu uwu iyimo mu lukwu, uwe, mu ɛmɛnɛ werewo mbɔlɛ, ba akwu ɔnu uwu oko ele moo kpɛkpɛmba lɛɛbi o to oko ele?>>

29 Ɔzhizɔsi a gba mba opwu tee, <<Lunyi lu ngbomo gyɔɔ kwuwongu lu yitu iyi iso iyi Ukpo mbala ekpasu wu mo!>> 30 Ɔnu uwu iyimo mu lukwu enzu o to eko mo ba o ya anu mo, enzu o yi kyamate alɔgbulɔ umba Ukpo tayi moshi. 31 Mekeka iyi iyimo iyi enzu umba bɔkɔ o kpomo: lu du wayi dɛ mo re iyi Ukpo e so yi mekeka iyi iyimo mu lukwu? A zɔ tee, 32 < Imi gba mi kwu Ukpo uwu Aburamu, Ukpo uwu Aziki mbala Ukpo uwu Ɔzhɛkɔbu le.> Uwu akwu Ukpo uwu enzu wareyi moo akwu uwu ɛkpɛzhi mo.>> 33 Tabɔkɔ enzu o pwa iso iyi Ɔzhizɔsi ɛlɛ, izele i wo mbo mo mu ɛzɔ wu ɛlɛ.