ગીતશાસ્ત્ર 12

મદદ માટે પ્રાર્થના

મુખ્ય ગવૈયાને માટે; શમીનીથ પ્રમાણે ગાવાને. દાઉદનું ગીત.

1 હે યહોવાહ, મદદ કરો, કેમ કે ઈશ્વરના લોકો ઓછા થઈ ગયા છે;

વિશ્વાસુ લોકો ઓછા થઈ ગયા છે.

2 દરેક પોતાના પડોશી સાથે અસત્ય બોલે છે;

દરેક માણસ ખુશામત કરનાર હોઠ અને બે મનવાળાની જેમ બોલે છે.

3 યહોવાહ સર્વ ખુશામત કરનાર હોઠોનો

તથા દરેક બડાઈ કરનારી જીભોનો નાશ કરશે.

4 તેઓએ એવું કહ્યું, "અમારી જીભથી અમે જીતીશું.

જ્યારે અમારા હોઠ અમારા પોતાના છે, ત્યારે અમારો માલિક કોણ છે?"

5 યહોવાહ કહે છે,

"ગરીબોને લૂંટ્યાને લીધે તથા દરિદ્રીઓના નિસાસાને લીધે, હું હવે ઊઠીશ."

"જેને તેઓ તુચ્છકારે છે તેને હું સહીસલામત રાખીશ."

6 યહોવાહના શબ્દો શુદ્ધ છે,

જેમ જમીન પરની ભઠ્ઠીમાં તપાવેલી ચાંદી, જે સાત વાર શુદ્ધ કરેલી હોય,

તેના જેવા તેઓ પવિત્ર છે.

7 હે યહોવાહ, તમે અમને*12:7 તેઓને સંભાળજો.

આ દુષ્ટ પેઢીના માણસોથી તમે સદા તેઓનું રક્ષણ કરશો.

8 જ્યારે મનુષ્યના પુત્રોમાં દુષ્ટતા વધે છે

ત્યારે દુષ્ટો ચારેતરફ ફરે છે.