ગીતશાસ્ત્ર 93

ઈશ્વર રાજા છે

1 યહોવાહ રાજ કરે છે; તેમણે મહત્વ ધારણ કર્યું છે;

યહોવાહે પોતાની કમરે પરાક્રમ બાંધ્યું છે.

ખસેડાય નહિ તેમ જગત સ્થિર કરવામાં આવ્યું છે.

2 તમારું રાજ્યાસન પુરાતન કાળથી સ્થપાયેલું છે;

તમે અનાદિકાળથી છો.

3 હે યહોવાહ, પ્રવાહોએ ઊંચો કર્યો છે;

તેઓએ પોતાનો અવાજ ઊંચો કર્યો છે;

પ્રવાહો પોતાનાં મોજાં ઊંચાં કરે છે.

4 ઘણા પાણીઓના ખળખળાટ કરતાં,

સમુદ્રનાં પરાક્રમી મોજાં કરતાં,

યહોવાહ પરમ ઊંચામાં પરાક્રમી છે.

5 તમારી પવિત્ર આજ્ઞાઓ અતિ વિશ્વાસયોગ્ય છે;

હે યહોવાહ, સર્વકાળ

પવિત્રતા તમારા ઘરને શોભે છે.