1 હે યહોવાહ, હું તમારા ઉપર આધાર રાખું છું;

મારી જરા પણ બદનામી થવા દેતા નહિ.

તમારા ન્યાયીપણાથી મારું રક્ષણ કરો.

2 મારું સાંભળો; ઉતાવળથી મને છોડાવો;

તમે મારે માટે મજબૂત ગઢ

તથા મારા બચાવને માટે કિલ્લો થાઓ.

3 કેમ કે તમે મારા ખડક અને કિલ્લો છો;

માટે તમારા નામની ખાતર મને દોરવણી આપો અને મને ચલાવો.

4 મારા શત્રુઓએ પાથરેલી ગુપ્ત જાળમાંથી મને બચાવો,

કારણ કે તમે મારો આશ્રય છો.

5 હું મારો આત્મા તમારા હાથમાં સોંપુ છું;

હે યહોવાહ, સત્યના ઈશ્વર, તમે મારો ઉદ્ધાર કર્યો છે.