મુખ્ય ગવૈયાને માટે; કોરાના દીકરાઓનું (ગીત); રાગ અલામોથ. ગાયન.

1 ઈશ્વર આપણો આશ્રય તથા સામર્થ્ય છે,

સંકટને સમયે તે હાજરહજૂર મદદગાર છે.

2 માટે જો પૃથ્વી ઊથલપાથલ થાય

જો પર્વતો સમુદ્રમાં ડૂબી જાય, તોપણ આપણે બીહીએ નહિ.

3 જો તેનું પાણી ગર્જના કરે તથા વલોવાય

જો તેના ઊછળવાથી પર્વતો કાંપી ઊઠે, તોપણ આપણે બીહીએ નહિ. સેલાહ.

4 ત્યાં એક નદી છે જેના ઝરણાંઓ ઈશ્વરના નગરને

એટલે પરાત્પરના મંડપના પવિત્રસ્થાનને આનંદમય કરે છે.

5 ઈશ્વર તેની વચમાં છે; તેને હલાવી શકાશે નહિ;

મોટી સવારે ઈશ્વર તેને મદદ કરશે.

6 વિદેશીઓએ તોફાન મચાવ્યું છે અને રાજ્યો ડગમગી ગયાં;

તેમણે ગર્જના કરી એટલે, પૃથ્વી પીગળી ગઈ.

7 આપણી સાથે સૈન્યોના સરદાર યહોવાહ છે;

આપણો આશ્રય યાકૂબના ઈશ્વર છે. સેલાહ.

8 આવો યહોવાહનાં પરાક્રમો જુઓ,

તેમણે પૃથ્વીની કેવી પાયમાલી કરી છે તે જુઓ.

9 તે પૃથ્વીના છેડાઓ સુધી યુદ્ધોને બંધ કરી દે છે;

તે ધનુષ્યને ભાંગી નાખે છે અને ભાલાને કાપી નાખે છે;

રથોને*46:9 ઢાલ - પ્રાચીનકાળના ઢાલ લાકડું અને ચામડાની બનેલી હોય છે, અને વારંવાર જૈતૂનના તેલથી ઘસવામાં આવે છે; પરિણામે તેઓ સરળતાથી બળી જાય છે. અગ્નિથી બાળી નાખે છે.

10 લડાઈ બંધ કરો*46:10 શાંત રહો અને જાણો કે હું ઈશ્વર છું;

હું વિદેશીઓમાં મોટો મનાઈશ; હું પૃથ્વીમાં મોટો મનાઈશ.

11 સૈન્યોના યહોવાહ આપણી સાથે છે;

યાકૂબના ઈશ્વર આપણા આશ્રય છે. સેલાહ.