1 Samwẹl 25

Obo kw’Samwẹl

1 Wa Samwẹl okwu ope. Anọng p’Israẹl maphyir matobha ayok, mabhom-ẹ. Mad-anọhng-ẹ z’ikẹ k’obhon z’Rama.

Devid ọmaana Abigẹl

Nya o, Devid obina ozeng z’ibyi s’anọng nna arukọ z’Paran. 2 Wa ojinọng wanẹ oning z’Maọn kw’oyen oyena ny’Kaamẹl. Wa ojibh-ẹ mawuriji, oyena arọkimaan nnọhna nchenọmfa okwuma arọbh ijobh, ọttara avu nnọhna mfa okwuma arọbh ijobh p’od-ogwu iphyabha z’Kaamẹl. 3 Wa ojinọng nwa okpen Nabal, kwanọng kwẹ okpena Abigẹl. Abigẹl oyen ezonga, obir ojibh kwanọng. Okenaka, odim kwẹ ode ọkkamgbaranọng, obir oyena ẹmmaanatama; ofona k’efona ch’Kẹlẹb.

4 Ch’Devid otim oning z’ibyi s’anọng nna arukọ, ọbhaanga bẹ́, Nabal oning z’ogwo arọkimaan pẹ iphyabha.

5 Ofona nya, Devid ọtọhm ajinọngva ijobh, oben bẹ bẹ́, "Màkebha Nabal z’Kaamẹl, mazim-ẹ k’eche chaam. 6 Màben-ẹ bẹ́, ‘Tte odiriji oninga ọmaan-ọ, ọmaana ẹsọhmmọr chọ, ọttara ọttọhk kpenamkpen fọ maphyir! 7 Mmaang bẹ́, ogbe kw’mad-agwo arọkimaan iphyabha kk’obenga. Ch’iwa akker-arọkimaan pọ aning amaana mina, wa m’bẹ itama kotim. Ny’ogbe nwo maphyir kw’uwa maning z’Kaamẹl, ọttọhk mavanẹ fabẹ kobir odimẹ. 8 Bọbh atọhmnọng pọ, mm’atek-ọ bẹ́, ode odik ọkkọkka. Ofona nya, si ọphyaam nang ajinọngva paam, ch’ode bẹ́, mokwu k’odidaamagbe. Ototokinẹ, nang atọhmnọng pọ ọttara kaam nnwa kwọ Devid, okpenamkpen f’akpo ayena.’ "

9 Ch’ajinọngva p’Devid mapyirẹ za o, matek Nabal ẹkkaabha nda k’eche ch’Devid. Maninga nya atik.

10 Nabal ọpọhna ajinọngva p’Devid bẹ́, "Anyi wọ ode Devid nwa? Anyi wọ ode nnwa nwa kw’Jẹsẹ? Maamba atọhmnọng saabhada aning za abhaangẹ z’abotte k’mbọhk. 11 Kayen kw’im’ntọka ọchattọhk ọmaana asi paam ttara eten ch’ikk’mfha bẹ́, nnang anọng p’ad-agwu avu paam iphyabha, nnang ajinọng p’nna ibyi nzong s’mafon?"

12 Ajinọngva p’Devid makpa nnam abhana. Mapyirẹ za o, matek Devid odik kpenamkpen. 13 Devid oben ajinọngva pẹ bẹ́, "Màdabh akkangkkang pabọnga!" Minna kw’madabhẹ akkangkkang pabẹ, Devid obir ọdabh kwẹ. Ajinọng p’mm’apyirẹ ẹnọhna mayakẹ Devid nnam, ajinọng p’ade arọbh ijobh, maninga nya akkerẹ ekpo.

14 Ny’ogbe nwo, ọtọhmnọng wanẹ otek Abigẹl kw’ode kwanọng kw’Nabal bẹ́, "Devid ọtọhmọ azeng-eden p’abin z’ibyi s’anọng nna arukọ bẹ́, makwu azima atte kwamina. Ch’mapyirẹ ka, atte kwamina ọlẹkẹ bẹ. 15 K’odik ọkkọkka, wa ajinọng mba asi mina ejibha mawuriji, m’irem kpenamkpen k’abẹ k’mbọhk koze. Ny’ogbe nwo maphyir kw’mobir oninga ọmaana bẹ z’iwonọ, ọttọhk mavanẹ famina kodimẹ. 16 Ny’ogbe nwo maphyir kw’uwa mod-okkerẹ arọkimaan pamina ọnyọma bẹ, wa bẹ makkerẹ mina k’erungọ ọmaana k’ẹya. 17 Ofona nya, chibhẹ ọttọhk f’im’asi, okurọ bẹ́, itama nitik atte kwamina otik, ọttara ẹsọhmmọr chẹ maphyir. Ka, kẹ ode ọnọng kw’opyibhẹ ẹmmaana kw’ọnọng ina kẹ odik od-okpo ọgbaak ọnang."

18 Nya o, Abigẹl ogbe kokibhẹ, ọtọka abrẹd-duk arọbh ijobh, ọmaana otuk-zọhka ọfa, ọmaana arọkimaan achen p’nkk’abhaabha, ọmaana agwu-gbangbang achen p’nkk’akkanga, ọmaana aduk arọbh achen p’grep, ọmaana ogbogbokwa arọbh ijobh p’matim fig asi. Otinẹ byẹ maphyir ọnana k’nnyanya. 19 Pira nobenẹ atọhmnọng pẹ bẹ́, "Màchi-m eden, kaam m’nyakẹ bọnga nnam." Okenaka, odim kwẹ Nabal kotekẹ.

20 K’ose kw’Abigẹl ọyaarẹ ẹnyanya chẹ ọwọna egbe, oze Devid ttara ajinọng pẹ ch’mad-asaka akwu z’ikẹ k’ifor, kẹ od-okebha bẹ. 21 Ny’ogbe nwo, Devid kk’obena z’ettem bẹ́, "Ekkerẹ ch’nkkerẹ ekpo py’ojinọng nwa z’ẹgba maphyir ọfha ọttọhk fẹ oning odimẹ, ede k’ajaaka. Kẹ otera otima epyibha otuk-m! 22 Tte Ibinọkpaabyi ọnang awawunanọng p’Devid irem ọttar-ọttara, óde ophyinẹ k’ekpebha ntte ojinọngnwa kwẹ kpenamkpen oruk akpen."

23 K’ogbe kw’Abigẹl oze Devid, ọsẹr-ọsẹr ọsaka z’ẹnyanya chẹ, ọraka eso otwu ititika ny’izek ny’Devid k’ititika. 24 Ọttẹ-ẹ ny’ntọkọ, oben bẹ́, "Ttatta kwaam, tte epyima ede chaam manchenẹ. Ototokinẹ, tte kaam ọtọhmnọng kwọ mgbaak-ọ odik. Bhaanga idik s’ọtọhmnọng kwọ m’ọgbaak-ọ. 25 Tte ttatta kwaam oning ọnọngtama nwo kw’mayerẹ Nabal ọsaan. Kẹ ode k’ose kw’eche chẹ ede. Eche chẹ eyinẹ bẹ́, etwurọ. Etwurọ ndo ening ẹmaan-ẹ. Ṉ́nòde kaam ọtọhmnọng kwọ, ajinọngva p’ttatta kwaam ọtọhmọ kìnze. 26 Ofona nya, k’ose kw’Ọvaar Ibinọkpaabyi oruk akpen, kọ abir aruk, ch’Ọvaar Ibinọkpaabyi kk’ọsa bẹ́, ttatta kwaam oning izẹ okibhẹ, obir osi bẹ́, aning azeng mmo atuka. Tte awawunanọng pọ, ọmaana anọng p’makamẹ atte kwaam itama, maze irem mach’Nabal im’oze. 27 Nya o, tte ttatta kwaam ọtọka ẹnanga nda ch’kaam ọtọhmnọng kwẹ nchen-ẹ, ọnang ajinọng mbo p’ator-ẹ.

28 "Ototo, bina nang epinẹ ch’kaam ọtọhmnọng kwọ, kirẹ Ọvaar Ibinọkpaabyi m’osi avaarnọng afona ny’ntaak s’ikọ atte kwaam, okurọ bẹ́, kọ ad-asi erima ch’Ọvaar Ibinọkpaabyi. K’ose kw’arukọ akpen, tte ọnọng oning itama ọbhaang ọmaan-ọ. 29 Ó̱de ọnọng kpenamkpen od-okwubh-ọ bẹ́, ọfhọ-ọ, Ọvaar Ibinọkpaabyi kw’ode Ibinọkpaabyi kwọ, m’obubh-ọ ọgbagba, osok-ọ akpen. Ṉ́nòde akpen p’awawunanọng pọ, kẹ mọbharẹ bẹ mach’ẹta ch’ọbanttẹttẹ. 30 K’ogbe kw’Ọvaar Ibinọkpaabyi kk’ejibha kpenamkpen ch’ochekẹ ọnang atte kwaam ọsa, obir ọsẹ-ẹ oso kw’Israẹl, 31 ettem ọdọk atte kwaam odik mẹ̀yak bẹ́, okibhẹ izẹ, ọmaana bẹ́, ozeng mmo otuka odik. K’ogbe kw’Ọvaar Ibinọkpaabyi kk’atte kwaam ọda mawuriji, jima kaam ọtọhmnọng kwọ."

32 Devid ọpọhna Abigẹl bẹ́, "Ẹtọhnga ede ch’Ọvaar Ibinọkpaabyi, kw’ode Ibinọkpaabyi kw’Israẹl, kw’ọtọhm-ọ bẹ́, akebh-m menda. 33 Tte Ọvaar Ibinọkpaabyi ọdọ-ọ k’ezonga chọ, ch’akpa-m eden bẹ́, nning izẹ nkibhẹ menda, nning mbọhk saam oyenẹ mbira ntima ntuka odik. 34 K’odik ọkkọkka, k’ose kw’Ọvaar Ibinọkpaabyi kw’ode Ibinọkpaabyi kw’Israẹl orukọ akpen, kw’ọkpa-m eden bẹ́, nning-ọ itama nsi, wura ina asẹrẹ akwu akebh-m, ophyinẹ k’ekpebha, ojinọng kw’Nabal mawanẹ kw’uwura obir orukọ akpen kode."

35 Nya o, Devid ọtọka ekpo mbyo z’mbọhk s’Abigẹl, oben-ẹ bẹ́, "Zọhng bhana k’ọdaam. Kaam kk’ọ mmaanga. Kk’mbira nchera mmaan-ọ."

36 Abigẹl obina ọbhana, od-okebha Nabal z’ọsọhm ch’osok eninga mach’ọvaarnọng. Okebh-ẹ ch’ikk’atuk ọgwa maa obuma, iyagbin nining-ẹ k’mbọhk. Minna kw’Abigẹl omyi maa ewu esobha, kẹ odik kọgbaakẹ.

37 Ny’ekpebha, ch’atuk kk’Nabal attaana, kwanọng kwẹ otek-ẹ idik nja maphyir. Nabal ọphyakẹ maphyir k’ifor, oninga nya mach’ẹta. 38 Ọttọhk mach’iwu ijobh, ikwu ikpan, Ọvaar Ibinọkpaabyi obin Nabal, ope.

39 Ch’Devid ọbhaang bẹ́, Nabal kk’ọpa, oben bẹ́, "Ẹtọhnga ede ch’Ọvaar Ibinọkpaabyi kw’otuk ililẹkẹ s’Nabal ọnang-m. Kẹ kk’kaam ọtọhmnọng kwẹ eden ọkpa bẹ́, nning itama nsi. Obir otte Nabal ọbọhk ozeng mmo ọtọhka mpinẹ sẹ."

Nya o, Devid ọtọhm ẹkkaabha ọnang Abigẹl bẹ́, okwu ode kwanọng kwẹ. 40 Atọhmọ p’Devid mazeng z’Kaamẹl, mad-aben Abigẹl bẹ́, "Devid wọ ọtọhmọ mina bẹ́, mokwu ọtọk-ọ ad-ade kwanọng kwẹ."

41 Abigẹl ọraka eso otwu ititika z’izek, oben bẹ́, "Kirẹ e, kaam ọtọhmnọng kwọ kk’ifor nda bẹ́, mgbobhọ mmokpatọkọ s’atọhmnọng p’ttatta kwaam e." 42 Abigẹl obina, oduk-oduka ovura k’ẹnyanya. Atọhmnọng pẹ achen k’ẹpanọng mator-ẹ nya. Mator atọhmọ p’Devid mafona, ọd-ọba Devid.

43 Wa Devid kk’Ahinoam kw’ofon Jẹzrẹl okkikken ọtọka k’ọbada. Bẹ anọng afa makwu ade panọng pẹ. 44 Ṉ́nòde, Mikal, ominanwa kw’Saul, kw’uwa ode kwanọng kw’Devid, Saul kk’ẹ ọtọka ọnang Palti k’ọbada. Palti kẹ wa ode nnwa kw’Laish kw’ofon Galim.