Nnwẹr kw'Ozenga 4

Nkọhka s’Ibinọkpaabyi ọnang Mosẹs

1 Nya o, Mosẹs ọpọhna Ibinọkpaabyi bẹ́, "M’nsi yen, óde bẹ nna kaam itọhng ayong, m’odik kwaam kabir achera? Wanẹma, maben-m bẹ́, ‘Ọvaar Ibinọkpaabyi kọ koyinẹ okebha.’ "

2 Ọvaar Ibinọkpaabyi ọbọbh-ẹ bẹ́, "Bọng-ọttọhk f’atim ny’ọbọhk kwọ?" Kẹ ọpọhn-ẹ bẹ́, "Ochikwura e."

3 Ọvaar Ibinọkpaabyi oben-ẹ bẹ́, "Bharẹ ny’izek." K’ose kw’ọbharẹ ochikwura nwo ny’izek, ochikwura nwo ọbhakẹ ozeng ijọhk, Mosẹs ọrọbh, ọzọkọ nnam-nnam. 4 Nya o, Ọvaar Ibinọkpaabyi oben-ẹ bẹ́, "Nemẹ ọbọhk kwọ bọk-ẹ ny’ẹsara." K’ose kw’Mosẹs onemẹ ọbọhk ọbọka ijọhk njo, minna kw’ibir ibhakẹ izeng ochikwura ny’ikẹ k’ọbọhk. 5 Ọvaar Ibinọkpaabyi oben-ẹ bẹ́, "Si minna mfha bẹ machera bẹ́, Ọvaar Ibinọkpaabyi kw’ode Ibinọkpaabyi kw’ab’atte pabẹ: Abraham, ọmaana Isaak, ọttara Jekọb, kẹ kk’oyina okebh-ọ."

6 Nya o, Ọvaar Ibinọkpaabyi obir oben-ẹ bẹ́, "Yika ọbọhk ny’ọnọhma-baba kwọ ẹtaanga." K’ose kw’Mosẹs oyik ọbọhk kwẹ nya, m’okwu ọrọbha, ọbọhk kwẹ node okpokora, owur bẹ́ faan. 7 Ọvaar Ibinọkpaabyi noben-ẹ bẹ́, "Bir yika ọbọhk nwo ny’ọnọhma-baba kwọ." Minna kw’Mosẹs oyik ọbọhk nwo. Nọrọbh o, oze bẹ́, okpokora nwo kk’ọsa, ọbọhk nwo nobir ode mbengana mach’ifor sẹ ide.

8 Nya o, Ọvaar Ibinọkpaabyi oben bẹ́, "Ó̱de bẹ nna odik kwọ acher, m’kọ itọhng k’echeden-kọhka kabir ayonga, bẹ makpokpo achera amaana ẹkọhka ttong mfa. 9 Okenaka, óde bẹ nna nkọhka njoma mfa acher amaana, m’ikọ itọhng kabir ayonga, kaabha asi ny’ọraanga kw’Nile, abyenga ny’ogbin. Asi mbo p’nkk’akkaabha ny’ọraanga, mm’abhakẹ azeng izẹ ny’ogbin."

10 Mosẹs oben Ọvaar Ibinọkpaabyi bẹ́, "O Ọvaar Ibinọkpaabyi, tọma za maa, pyirẹ ma ch’ad-agbaak odik anang kaam ọtọhmnọng kwọ, kọ azong ma bẹ́, kaam nd-mgbaak ẹdẹngẹ, mbir nyekẹ odik."

11 Ọvaar Ibinọkpaabyi oben-ẹ bẹ́, "Anyi wọ ọnang ọnọng ẹmma ch’od-otima ọgbaak odik o? Anyi wọ ọsẹ-ẹ ọkpa itọhng, wanẹma, ọkpa ẹmma o? Anyi wọ ọsẹ-ẹ oze iyaan, wanẹma, ọkpa achen o? Ma, kaam Ọvaar Ibinọkpaabyi azang yirẹ? 12 Nya o, zọhng madidanma. Kaam m’nkkaan-ọ k’obenadik, mbir mkpebh-ọ ose kw’im’agbaak."

13 Okenaka, Mosẹs oben bẹ́, "O Ọvaar Ibinọkpaabyi, ototo, tọhm ọnọng ọdọk-ọdọk."

14 Nya o, Ọvaar Ibinọkpaabyi obhem ettem ọmaana Mosẹs, oben-ẹ bẹ́, "Aarọn kw’ode agbaanakka kw’ofon ẹkọma ch’Lẹvi, oning za. Kaam nzong bẹ́, kẹ okpo ọgbaakadik mawuriji. Kẹ oter okwuma z’eden bẹ́, okwu okebh-ọ. Ettem m’elebh-ẹ ọkpan bẹ́, ọzọ-ọ. 15 Kọ m’ad-agbaak odik anang-ẹ, abir akẹ-ẹ idik s’im’ọgbaak ny’ẹmma; kaam m’nkkaana bọnga anọng afa k’ọgbaakadik, mbira mgbaak bọnga ose kw’mm’asi. 16 Aarọn m’ọd-ọgbaak odik ọnang anọng mba k’ikọ k’eso. Kẹ mọd-ọgbaak idik mach’ode kọ oyenẹ wọ agbaakẹ, obir ode mach’ikọ ade Ibinọkpaabyi anang-ẹ. 17 Do ochikwura nwoma tima z’ọbọhk, ọfha ad-atima asi nkọhka s’ipe anọng ifor."

Mosẹs ọkpa nnam z’Ijip

18 Minna kw’Mosẹs od-okebha ọnyẹ kwẹ Jẹtro, oben-ẹ bẹ́, "Tte mkpa nnam z’Ijip, nd-nze óde anọng paam atim arukọ akpen za."

Jẹtro oben-ẹ bẹ́, "Zọhng k’ọdaam."

19 Wa ch’Mosẹs otim oning z’Midiyan, Ọvaar Ibinọkpaabyi kk’ẹ obena bẹ́, "Kpa nnam z’Ijip, kirẹ anọng mbo p’makamẹ bẹ́, mafhọ-ọ, nkk’apa-kpo." 20 Nya o, Mosẹs ọtọka kwanọng kwẹ, ọmaana ajinọngva pẹ, ọnana k’ẹnyanya, okwu ọtọka ochikwura kw’Ibinọkpaabyi otima. Makpa nnam z’Ijip.

21 Ọvaar Ibinọkpaabyi oben Mosẹs bẹ́, "Ó̱de apyirẹ z’Ijip, si ikkonọ-kkonọdik s’nnang-ọ ẹfa bẹ́, asi akọhka Phero. Okenaka, kaam m’nsẹ-ẹ ọgaangẹ ettem, obhum bẹ́, otte anọng paam ọbọhk mafona. 22 Nya o, ben Phero bẹ́, ‘Ọvaar Ibinọkpaabyi obenẹ bẹ́, Israẹl wọ ode ocheden-jinọngnwa kwaam. 23 Kaam kk’ọ mbena bẹ́, "Tte nnwa kwaam ọbọhk od-okpobh-m. Okenaka, ch’ikk’abhuma bẹ́, attẹ-ẹ ọbọhk ofona, kaam m’mfhọ ocheden-jinọngnwa kwọ." ’ "

24 Nya ch’iwa Mosẹs otim oning ny’ozenga nwo, Ọvaar Ibinọkpaabyi oyin okebh-ẹ ch’mabhingẹ ny’eden, ọkam bẹ́, ọfhẹ-ẹ. 25 Okenaka, Zipọra kw’ode kwanọng kw’Mosẹs otima ẹta ch’ẹjaabhẹ mach’imaana, obhirẹ ọnọm f’ojinọngnwa kwẹ, ọtọka otwu Mosẹs ny’mmokpatọkọ, oben bẹ́, "Fona m’izẹ nja, kọ ọttara kaam nkk’ọgba k’ọbada." 26 Nya o, Ọvaar Ibinọkpaabyi otte Mosẹs ọbọhk oruk. Ofona ny’ẹnọhmbhirẹ ndo, Zipọra oben bẹ́, "Fona m’izẹ nja kọ ọttara kaam nkk’ọgba k’ọbada."

27 Ny’ogbe nwo, Ọvaar Ibinọkpaabyi oben Aarọn bẹ́, "Zọhng za ch’anọng nna arukọ, akebha Mosẹs za." Minna kw’Aarọn ofon od-okebha Mosẹs z’egbe ch’Ibinọkpaabyi, ọbaak-ẹ. 28 Nya o, Mosẹs ọgbaak Aarọn idik njo maphyir s’Ọvaar Ibinọkpaabyi ikk’ẹ obena bẹ́, ọgbaak, ọttara nkọhka s’im’ipe ọnọng ifor s’Ọvaar Ibinọkpaabyi oben-ẹ bẹ́, osi.

29 Minna kw’Mosẹs ọttara Aarọn mad-ayerẹ ọkwa kw’asogbọhkọnọng p’Israẹl maphyir. 30 Aarọn otek bẹ idik njo maphyir s’Ọvaar Ibinọkpaabyi ikk’Mosẹs ọgbaaka, obir osi nkọhka ny’abẹ k’ikpakaana. 31 Wa anọng mbo macher amaana Mosẹs. Ch’mabhaang bẹ́, Ọvaar Ibinọkpaabyi kk’bẹ okwo ọza k’irem s’mad-atọka, maraka nso akpobha Ibinọkpaabyi.