1 ଇଦାଂପାଚେ ନିତ୍ରେମାପ୍ରୁ ମସାଂ ଇଚାନ୍‌, "ଏନେଙ୍ଗ୍ ପାର ଲାଗାଂ ହାଲ୍‌ଜି ତାଙ୍ଗେଙ୍ଗ୍‌ ଇନା, ଏବ୍ରିୟରିଂ ନିତ୍ରେମାପ୍ରୁ ପର୍‌ମେସ୍ୱର୍‌ ଇ କାତା ଇନାନ୍‌, ମା ହେବା କିନି କାଜିଂ ଏନେଙ୍ଗ୍ ମା ଲକୁରିଂ ହାଞ୍ଜେଙ୍ଗ୍ ହିଦା । 2 ମତର୍‌ ଜଦି ହେୱାରିଂ ହାନି କାଜିଙ୍ଗ୍ ମୁନା କିଜ଼ି ନଙ୍ଗ୍‌ ପା ବାଦା କିଦ୍‌ନାନ୍‌, 3 ଲାଗିଂ ହୁଡ଼ାଟ୍‌, ଏନେଙ୍ଗ୍‌ ଜମିତ ଗଡ଼ା, ଗଦ, ଉଟ୍‌, କଡି ଆରି ମେଣ୍ଡା ପସୁଙ୍ଗ୍‌ ଜପି ନିତ୍ରେମାପ୍ରୁ କେଇ ମାନାତ୍‌; ଲାଗିଂ ବେସି ବେମାର୍‌ ଆନାତ୍‌ । 4 ମତର୍‌ ନିତ୍ରେମାପ୍ରୁ ଇସ୍ରାଏୟରିଂ ଆରି ମିସ୍ରିୟରିଂ ପସୁଂ ବିତ୍ରେ ବିନେ କିନାର୍‌; ହେବେ ଇସ୍ରାଏଲ୍‌ ମାଜ଼ିର୍‌ତି ଇମ୍‌ଣାକାପା ପସୁଂ ହାଉକ୍‌ । 5 ନିତ୍ରେମାପ୍ରୁ ସମୁ ହପ୍‌ଚି ଇନାନ୍‌, ୱିଗାଲିଂ ନିତ୍ରେମାପ୍ରୁ ଇ ଦେସ୍ତ ଇ କାମାୟ୍‌ କିନାନ୍‌ ।"

6 ଆରେର ନାଜିଂ ନିତ୍ରେମାପ୍ରୁ ହେ କାମାୟ୍‌ କିତିସ୍‌, ହେବେ ମିସ୍ରିୟରିଂ ସବୁ ପସୁଂ ହାତିକ୍‌; ମତର୍‌ ଇସ୍ରାଏଲ୍‌ ମାଜ଼ିର୍‌ତି ପସୁଂ ବିତ୍ରେତାଂ ରଞ୍ଜାଙ୍ଗ୍‌ପା ହାୱିତିକ୍‌ । 7 ପାଚେ ପାର ମାନାୟ୍‌ ପକ୍‌ଚି ଇସ୍ରାଏଲ୍‌ତି ରଞ୍ଜାଙ୍ଗ୍ ପା ପସୁ ହାୱାତାକା ହୁଡ଼୍‌ତାର୍‌ । ଆତିସ୍‌ପା ପାର ୱାସ୍କି ଆଟ୍‌ୱା ଆତାତ୍‌ ଆରି ହେୱାନ୍‌ ମାନାୟାରିଂ ହାଞ୍ଜେଙ୍ଗ୍ ହିୱାତାନ୍‌ ।

8 ଆରେ ନିତ୍ରେମାପ୍ରୁ ମସା ଆରି ହାରଣ୍‌ତିଂ ଇଚାନ୍‌, "ଏପେଙ୍ଗ୍ ମୁଟା ବାର୍ତି କିଜ଼ି ବାଟିନି ନିସ୍‌ ଅୱାଟ୍‌, ଆରେ, ମସା ପାର ମୁମ୍‌ଦ ହେଦାଂ ଆକାସ୍‌ ନିପଣ୍ଡାଂ ଡ଼ଞ୍ଜେନ୍‌ । 9 ପାଚେ ହେଦାଂ ସବୁ ମିସର୍‌ ଦେସ୍‌ ଜପି ହାରୁ ଦୁଡ଼ି ଆଜ଼ି ମିସ୍ରିୟ ୱିଜ଼ାର୍‌ ମାନାୟ୍‌ ଆରି ପସୁଙ୍ଗ୍‌ ଗାଗାଡ଼୍‌ତ ପକାଗାଉ ପାହ୍‌ମି ହପିକିନାନ୍‌ ।" 10 ପାଚେ ବାଟିନି ନିସ୍‌ ଅଜ଼ି ପାର ମୁମ୍‍ଦ ନିଲ୍‌ତାର୍‌; ଆରେ, ମସା ଆକାସ୍‌ ନିପ ଡ଼ଞ୍ଚିଲେ, ୱିଜ଼ାର୍ ମାନାୟ୍‌ ଆରି ପସୁଙ୍ଗ୍‌ ଗାଗାଡ଼୍‍ତ ପକାଗାଉ ପାହ୍‌ମି ଆତାତ୍‌ । 11 ହେ ପାହ୍‌ମି କାଜିଙ୍ଗ୍ ଚୁଟ୍‌କିୟାର୍‌ ମସା ମୁମ୍‌ଦ ନିଲ୍‍ତେଂ ଆଡ୍‌ୱାତାର୍‌; ଇନେକିଦେଂକି ଚୁଟ୍‌କିୟାର୍‌ ଆରି ୱିଜ଼ାର୍‌ ମିସ୍ରିୟରିଂ ଗାଗାଡ଼୍‌ତ ପାହ୍‌ମି ଉବ୍‌ଜା ଆତାତ୍‌ । 12 ଇଦାଂ ପାଚେ ନିତ୍ରେମାପ୍ରୁ ପାରତି ୱାସ୍କି ଆଟ୍‌ୱା ଆତାତ୍‌, ହେବେ ହେୱାନ୍‌ ମସାତି କାଜିଂ ସମାନ୍‌ ନିତ୍ରେମାପ୍ରୁ ବଚନ୍‌ ପିସ୍ତି ହେୱାର୍‌ କାତାତ ମାନ୍‌ହିୱାତାର୍‌ ।

13 ଇଦାଂ ପାଚେ ନିତ୍ରେମାପ୍ରୁ ମସାଂ ଇଚାନ୍‌, "ଏନେଙ୍ଗ୍ ନାଣାଙ୍ଗେ ନିଙ୍ଗ୍‍ଜି ପାର ମୁମ୍‌ଦ ନିଲ୍‌ଚି ତାଙ୍ଗେଙ୍ଗ୍ ଇ କାତା ଇନା, ଏବ୍ରିୟରିଂ ନିତ୍ରେମାପ୍ରୁ ପରମେସ୍ୱର୍‌ ଇନାନା, ମା ହେବା କିଦେଂ ମା ମାନାୟାରିଂ ହାଞ୍ଜେଙ୍ଗ୍‌ ହିଦା । 14 ନଲେ ଇ ହଟ୍‌ ଆପ୍‌ ନି ୱାସ୍କି ବିରୁତ୍‌ତାଂ, ଆରେ, ନି ଆଡ଼୍‌ୟାର୍‌ ଆରି ମାନାୟାର୍‌ ବିତ୍ରେ ମା ସବୁ ବାନି ବେମାର୍‌ ପକ୍ତାନାଙ୍ଗ୍‌; ହେବେ ସବୁ ପୁର୍ତିତ ମା ଲାକେ ଇନେର୍‌ ହିଲେର୍, ଇଦାଂ ଏପେଙ୍ଗ୍ ପୁନାଦେର୍ । 15 ଇନେକିଦେଂକି ନଂ ପା ଆନ୍‌ ଜାର୍‌ କେଇ ଲାମାୟ୍‌ କିଜ଼ି ବେମାର୍‌ ହୁକେ ନିଙ୍ଗ୍‌ ଆରି ନି ମାନାୟାରିଂ ନାସ୍‌ କିତାଙ୍ଗେମା, ଆରେ, ଏପେଙ୍ଗ୍‌ ପୁର୍ତିତାଂ ନାସ୍‌ ଆତାଦେର୍‌ମା; 16 ମତର୍‌ ମିଙ୍ଗେଙ୍ଗ୍‌ ଜାର୍‌ ସାକ୍ତି ଚଚ୍‌ଚେଦେଂ ଆରି ସବୁ ପୁର୍ତିତ ଇନେସ୍‌ ମା ତର୍‌ ମାନ୍‌ଗାନାତ୍‌, ହାତ୍‌ପାନେ ଇଦାଂ କାଜିଂ ଆନ୍‌ ନିଙ୍ଗେଙ୍ଗ୍ ରଚ୍‌ଚି ଇଡ଼୍‌ଦାତାପ୍‌ନ୍ନା । 17 ଆତିସ୍‌ପା ଏପେଙ୍ଗ୍ ମା ମାନାୟାରିଂ ହାଞ୍ଜେଙ୍ଗ୍‌ ହିୱାଦାଂ ହେୱାର୍ ଜପି ଗରବ୍‌ କିନାଦେରା ? 18 ହୁଡ଼ାଟ୍, ଆନ୍‌ ୱାନି ଦିନ୍‌ତ ଇ ଲାକେ ସମୁ ମିସର୍‌ ଦେସ୍‍ତ ଇଲାକେ ବେସି ଆଞ୍ଜ୍‌ଗା ବାର୍‌ହା କିନାପ୍ ଜେ, ମିସର୍‌ ତାକେ ଆଗେତାଂ ଇନାୱାଙ୍ଗ୍‌ ପା ଆଜ଼ି ମାନ୍‌ଗୁତ୍‌ । 19 ଇଦାଂ କାଜିଂ ନଙ୍ଗ୍‌ ମାନାୟ୍‌ ପକ୍‌ଚି ଜମିତ ମି ପସୁଙ୍ଗ୍‌ ଇନା ଇନାକା ମାନାତ୍‌, ହେଦାଂ ସବୁ ବେଗି ତାହିକିୟାଟ୍‌, ଇନାକିଦେଂକି ଇମ୍‌ଣି ମାନାୟ୍‌ କି ପସୁ ଜମିତ ମାନ୍‌ଗିନିକ୍‌, ଇଞ୍ଜ ତାହିୱାୟାଆଉତ୍, ହେୱାର୍‌ ଜପି ଆଞ୍ଜ୍‌ଗା ପଡ଼୍‌ତିସ୍‌ ହେୱାର୍‌ ହାନାର୍‌ ।" 20 ହେପାଦ୍‌ନା ପାରତି ଆଡ଼୍‌ୟାର୍‌ ବିତ୍ରେ ଇମ୍‌ଣି ମାନାୟ୍‌ ନିତ୍ରେମାପ୍ରୁ ବଚନ୍‌ତ ପାଣ୍ଡ୍ରା ଆତିସ୍‌, ହେୱାନ୍‌ ବେଗି ଜାର୍‌ ଆଡ଼ିଏନ୍‌ ଆରି ପସୁକାଂ ଇଞ୍ଜ ତାହିୱାତାନ୍‌ । 21 ମତର୍‌ ଜେ ନିତ୍ରେମାପ୍ରୁତି ବଚନ୍‌ତ ମାନ୍‌ହିୱାତାନ୍‌, ହେୱାନ୍‌ ଜାର୍‌ ଆଡ଼ିଏନ୍‌ ଆରି ପସୁକାଂ ବାର୍‌ତ ପିସ୍ତାନ୍‌ ।

22 ଇଦାଂ ପାଚେ ନିତ୍ରେମାପ୍ରୁ ମସାଂ ଇଚାନ୍‌, "ଏନେଙ୍ଗ୍ ଆକାସ୍‌ ନିପ ଜାର୍‌ କେଇ ଲାମାୟ୍‌ କିୟା, ହେବେ ମିସ୍ରିୟ ୱିଜ଼ାର୍‌ ମାନାୟ୍‌, ପସୁ ଜମିତ କାଚ୍ରା ୱିଜ଼ୁ ଜପି ଆଞ୍ଜ୍‌ଗା ବାର୍‌ହା ଆନାତ୍‌ ।" 23 ପାଚେ ମସା ଜାର୍‌ ବେଡ୍‌ଗା ଆକାସ୍‌ ନିପ ଲାମାୟ୍‌ କିତିଲେ, ନିତ୍ରେମାପ୍ରୁ ବାଦାଡ଼୍ ଗାର୍ଜାନ୍‌ ଆରି ଆଞ୍ଜ୍‌ଗା ବାର୍‌ହା କିତାନ୍‌; ଆରେ, ବିଞ୍ଜି ପୁର୍ତି ନିପ ବେଗି ଆର୍ଦାତାତ୍; ଇ ଲାକେ ନିତ୍ରେମାପ୍ରୁ ମିସର୍‌ ଦେସ୍ତ ଆଞ୍ଜ୍‌ଗା ବାର୍‌ହା କିତାନ୍‌ । 24 ତା ପାଚେ ଆଞ୍ଜ୍‌ଗା ବାର୍‌ହା ଆତାତ୍‌ ଆରି ଆଞ୍ଜ୍‌ଗା ସାଙ୍ଗେ ସାଙ୍ଗେ ବିଞ୍ଜି ଚମ୍‌କାଆତାତ୍‌; ଇ ବାନି ଦୁକା ଲାହାଂ ଆଞ୍ଜ୍‌ଗା ବାର୍‌ହା ମିସର୍‌ ଦେସ୍‌ତ ରାଜିରଚ୍‌ଚିତାକେଣ୍ଡାପା ଇନେୱାଡ଼ାଙ୍ଗ୍‌ ଆୱାଦାଂ ମାଚାତ୍‌ । 25 ତା ପାଚେ ସବୁ ମିସର୍‌ ଦେସ୍‍ନି ଜମିନି ମାନାୟ୍‌ ଆରି ପସୁ ୱିଜ଼େ ଆଞ୍ଜ୍‌ଗା ହୁଦାଂ ହାତାର୍‌ ଆରି ଜମିନି ସବୁ କାଚ୍ରା ଆଞ୍ଜ୍‌ଗା ବାର୍‌ହାତ ନସ୍ଟ ଆତାତ୍‌, ଜମିନି ସବୁ ମାର୍‌କୁ ଡ୍ରିଙ୍ଗ୍‍ତିକ୍‌ । 26 କେବଲ୍‌ ଇସ୍ରାଏଲ୍‌ ମାଜ଼ିର୍‌ତି ମାନି ବାହା ଗସନ ଦେସ୍‌ତ ଆଞ୍ଜ୍‌ଗା ବାର୍‌ହା ଆୱାତାତ୍ ।

27 ଇଦାଂ ପାଚେ ପାର ମାନାୟ୍ ପକ୍‌ଚି ମସା ଆରି ହାରଣ୍‌ତିଂ କୁକ୍‍ଚି ଇଚାନ୍, ନଗୟ୍‌ ଆନ୍‌ ପାପ୍‌ କିତାଂନା; ନିତ୍ରେମାପ୍ରୁ ଦାର୍ମି, ମତର୍‌ ଆନ୍‌ ଆରି ମା ଲକୁ ଦସି ଆନାପ୍‌ । 28 ନିତ୍ରେମାପ୍ରୁ ଲାଗାଂ ପାର୍ତାନା କିୟାଟ୍‌; ଇନାକିଦେଂକି ପରମେସ୍ୱର୍‌କିତି ଗାର୍ଜାନ୍‌ ଆରି ଆଞ୍ଜ୍‌ଗା ବାର୍‌ହା ବେସି ଆତାତ୍‌ନା; ଆପ୍‌ ମିଙ୍ଗେଙ୍ଗ୍ ହାଞ୍ଜେଙ୍ଗ୍ ହିଦ୍‌ନାପ୍‌, ମିଦାଂ ଆରେ ମାଲା ଆଉତ୍‌ ।

29 ହେପାଦ୍‌ନା ମସା ତାଙ୍ଗେଙ୍ଗ୍ ଇଚାନ୍‌, "ଆନ୍‌ ଗାଡ଼୍‌ତାଂ ହସି ହାଚି ଦାପ୍ରେ ନିତ୍ରେମାପ୍ରୁ ଲାଗାଂ ଜାର୍‌ କେଇ ଲାମାୟ୍‌ କିନାଙ୍ଗ୍‌, ପାଚେ ବାଦାଡ଼୍‌ ଗାର୍ଜାନ୍‌ ବନ୍ଦ୍‌ ଆନାତ୍‌ ଆରି ଆଞ୍ଜ୍‌ଗା ବାର୍‌ହା ଆରେ ଆଉତ୍‌; ଆରେ, ଇ ପୁର୍ତି ଜେ ନିତ୍ରେମାପ୍ରୁତି, ହେଦାଂ ନିଜେ ପୁଞ୍ଜେଙ୍ଗ୍‌ ଆଡ୍‌ନାଦେର୍‌ । 30 ମତର୍ ଆନ୍‌ ପୁନାଙ୍ଗ୍, ଏନେଙ୍ଗ୍ ଆରି ନି ଆଡ଼୍‌ୟାର୍‌ ନେଞ୍ଜେଙ୍ଗ୍ ପାତେକ୍‌ ନିତ୍ରେମାପ୍ରୁ ପରମେସ୍ୱର୍‌ତିଂ ପାଣ୍ଡ୍ରା ଆଉରା ।" 31 ହେ ସମୁତ (ପେସି)* ଆରି ଗଅଁ ୱିଜ଼ୁ ନସ୍ଟ ଆତାତ୍‌, ଇନାକିଦେଂକି ଦନ୍ଦ୍‌ଣା ଜିକିମେହା ଆରି (ପେସି) ହସି ମାଚାତ୍‌ । 32 ମତର୍‌ ଗଅଁ ଆରି କେଡ଼୍‌ ଜନାଙ୍ଗ୍‌ ଗାଜା ଆୱାଦାଂ ମାଚିଲେ ନସ୍ଟ ଆୱିତିକ୍‌ । 33 ଇଦାଂ ପାଚେ ମସା ପାର ଲାଗାଂ ଗାଡ଼୍‌ ବାର୍ତ ହାଲ୍‌ଜି ନିତ୍ରେମାପ୍ରୁ ମୁମ୍‌ଦ ଜାର୍‌ କେଇ ଲାମାୟ୍‌ କିତିଲେ, ବାଦାଡ଼୍‌ ଗାର୍ଜାନ୍‌ ଆରି ଆଞ୍ଜ୍‌ଗା ବାର୍‌ହା ବନ୍ଦ୍‌ ଆତାତ୍‌, ବୁମିତ ଆରେ ବାର୍‌ହା ଆୱାତାତ୍‌ । 34 ହେପାଦ୍‌ନା ବାର୍‌ହା ଆରି ଆଞ୍ଜ୍‌ଗା ଆରି ବାଦାଡ଼୍ ଗାର୍ଜାନ୍‌ ବନ୍ଦ୍‌ ଆନାକା ହୁଡ଼୍‌ଜ଼ି ପାର ଆରେ ପାପ୍‌ କିତାନ୍‌, ଆରେ, ହେୱାନ୍ ଆରି ତା ଆଡ଼୍‌ୟାର୍‌ ଜାର୍‌ ଜାର୍‌ ମାନ୍‌ ଆଟ୍‌ୱା କିତାର୍‌ । 35 ପାଚେ ପାରତି ୱାସ୍କି ଆଟ୍‌ୱା ଆତାତ୍‌; ଲାଗିଂ ମସା ହୁକେ ଆତି ନିତ୍ରେମାପ୍ରୁତି ବଚନ୍‌ ଇସାବ୍ରେ ହେୱାନ୍‌ ଇସ୍ରାଏଲ୍‌ ମାଜ଼ିରିଂ ହାଜେଙ୍ଗ୍ ହିୱାତାନ୍‌ ।